الەۋمەتتىك جەلىدە ماس كۇيدە بالاعات سوزدەر ايتقان تۇرعىن ۇستالدى
ورال. KAZINFORM - الەۋمەتتىك جەلىدە ارانداتۋشىلىق سوزدەر ايتىلعان بەينەجازبا تارادى.
وندا ءوزىن سەمەن اگافونوۆ دەپ تانىستىرعان ادام ۋكراينادا تۋىپ، قازاقستاندا تۇراتىنىن ايتادى. ۇلتتىق ار-نامىسقا تيەتىن بالاعات سوزدەر ايتىلعان روليكتە ورال، باتىس قازاقستان دەپ كورسەتىلگەن.
ب ق و پوليتسيا دەپارتامەنتىنىڭ باسپا ءسوز قىزمەتى اتالعان ادامنىڭ اقمولا وبلىسىنىڭ تۇرعىنى ەكەندىگىن جەتكىزدى. اقمولا وبلىستىق پوليتسيا دەپارتامەنتى ماس كۇيىندە بالاعات سوزدەر ايتقان، سونداي-اق سويلەگەن سوزىندە ۇلتتىق ار-نامىستى قورلاعان تۇرعىننىڭ ۇستالعانىن مالىمدەدى.
«وسى فاكتى بويىنشا سوتقا دەيىنگى تەرگەپ-تەكسەرۋ باستالدى. سونىمەن قاتار بالاعات سوزدەر بويىنشا اكىمشىلىك ءىس قوزعالدى. ءىس ماتەريالدارى قاراۋ جانە ءتيىستى شارالاردى قابىلداۋ ءۇشىن سوتقا جولداندى. پوليتسيا دەپارتامەنتى ازاماتتاردى سابىرلى بولۋعا، ارانداتۋشىلىققا بەرىلمەۋگە جانە زاڭسىز ارەكەتتەردەن اۋلاق بولۋعا شاقىرادى. پوليتسيا ەلىمىزدىڭ بارلىق تۇرعىندارىنىڭ مۇددەلەرىن قورعاۋدى جانە قۇقىقتىق ءتارتىپتى قامتاماسىز ەتۋدى جالعاستىرىپ جاتىر»، - دەپ حابارلادى ۆەدومستۆودان.
