الەۋمەتتىك ازىق-تۇلىك ونىمدەرىنىڭ باعاسى ءتورتىنشى اپتا قاتارىنان تومەندەپ كەلەدى

استانا. KAZINFORM - ءبىر اپتاداعى الەۋمەتتىك ماڭىزى بار ازىق-تۇلىك باعاسىنىڭ جاعدايى سەنبى، 22-ماۋسىمدا ۆيتسە-پرەمەر سەرىك ءجۇمانعاريننىڭ توراعالىعىمەن وتكەن ۇكىمەت وتىرىسىندا تالقىلاندى.

Фото: ҚР Үкіметі
Фото: ҚР Үкіметі

10 تاۋار توبىنا باعانىڭ تومەندەۋ ءۇردىسى جالعاسۋدا: قاراقۇمىق جارماسى - 0,9 پايىز، كۇنباعىس مايى - 0,5 پايىز، قىرىققابات - 0,4 پايىز، سيىر ەتى، تۇز جانە قانت - 0,3 پايىز، كۇرىش - 0,2 پايىز، ماكارون، سۇزبە جانە ۇن - 0,1 پايىز. ساۋدا جانە ينتەگراتسيا ءبىرىنشى ۆيتسە-ءمينيسترى ايجان بيجانوۆا اتاپ وتكەندەي، باعا 8 وبلىستا تومەندەگەن، ونىڭ ىشىندە ۇلىتاۋ (0,8 پايىز)، اقتوبە (0,6 پايىز) جانە اتىراۋ (0,5 پايىز) وبلىستارىندا ايتارلىقتاي ارزاندادى. جالپى، ءبىر اپتا ىشىندە الەۋمەتتىك ازىق-تۇلىك باعاسىنىڭ ورتاشا يندەكسىنىڭ تومەندەۋى - 0,1 پايىز. بۇل كورسەتكىش ءتورتىنشى اپتا قاتارىنان تىركەلىپ وتىر. ءبىر ايدا ديناميكا 0,3 پايىز قۇرادى.

اۋىل شارۋاشىلىعى ۆيتسە-ءمينيسترى ەربول تاسجۇرەكوۆ وڭىرلەردە ەرتە ءونىم جيناۋ كەلىسىمشارتىنىڭ بارىسىن ايتتى. ءۇش مەگاپوليس - استانا، الماتى، شىمكەنت - ماۋسىمارالىق كەزەڭدە كوكونىستەردى تۇراقتى باعامەن جەتكىزۋ ءۇشىن ەلدىڭ جەتى وڭىرىنەن اۋىل شارۋاشىلىعى وندىرۋشىلەرىمەن تىكەلەي كەلىسىمشارتتار جاساي باستادى.

«استانا ءقازىردىڭ وزىندە 15 مىڭ توننا كوكونىسكە: كارتوپ، پياز، قىرىققابات، سابىزگە فورۆاردتىق كەلىسىمشارتتار جاساستى. شىمكەنت - 7,5 مىڭ تونناعا، الماتى - 16 مىڭ تونناعا. جەتكىزۋ ماۋسىم-شىلدە، قىركۇيەك-ءساۋىر ارالىعىنا جوسپارلانعان. سونداي-اق كۇزگى ءونىمدى جەتكىزۋگە قوسىمشا فورۆاردتىق شارتتار جاسالاتىن بولادى»، - دەپ مالىمەت ەتتى ۆيتسە-مينيستر.

سونداي-اق ەربول تاسجۇرەكوۆ وڭىرلەرگە الەۋمەتتىك ماڭىزى بار ازىق-تۇلىك تاۋارىنا باعانى تۇراقتاندىرۋ تەتىكتەرىن ىسكە اسىرۋ قاعيدالارىندا بەلگىلەنگەن قارجىلاندىرۋ مەرزىمى مەن شارتتارىن، ونىڭ ىشىندە اۋىل شارۋاشىلىعى تاۋارىن وندىرۋشىلەر مەن قايتا وڭدەۋ كاسىپورىندارىن قارجىلاندىرۋدىڭ 70 پايىز باعىتى بويىنشا تالاپتاردى ساقتاۋ قاجەتتىگىن اتاپ ءوتتى.

سوڭعى جاڭالىقتار