الەمنىڭ ەڭ باي بەس ادامى ترامپ يناۋگۋراتسياسىنان بەرى 209 ميلليارد دوللار جوعالتتى
استانا. قازاقپارات - Bloomberg مالىمەتىنە سايكەس، دونالد ترامپتىڭ 20-قاڭتاردا وتكەن يناۋگۋراتسياسىنان كەيىنگى جەتى اپتانىڭ ىشىندە ءىس-شاراعا قاتىسقان ەڭ ءىرى بەس ميللياردەر 209 ميلليارد دوللاردان ايىرىلعان.
ونىڭ باستى سەبەبى جاڭا پرەزيدەنتتىڭ ەكونوميكالىق ساياساتىنا بايلانىستى تەحنولوگيا الپاۋىتتارى ۇلەسىنىڭ كۇرت تومەندەۋى جانە كومپانيالاردىڭ نارىقتاعى كورسەتكىشتەرىنىڭ ناشارلاۋى بولدى.
ەڭ كوپ جوعالتقان يلون ماسك بولدى، ونىڭ بايلىعى 148 ميلليارد دوللارعا تومەندەدى. بۇل - ميللياردەرلەر اراسىنداعى ەڭ ۇلكەن قۇلدىراۋ. جەلتوقساندا ونىڭ كاپيتالى رەكوردتىق كورسەتكىشكە، 486 ميلليارد دوللارعا جەتتى. ءبىراق سايلاۋدان كەيىن Tesla اكسيالارى كۇرت قۇلدىراي باستادى، ەڭ جوعارى كورسەتكىشىنىڭ 55 پايىزىن جوعالتتى.
10-ناۋرىزدا كومپانيا اكسيالارى %15,4 عا تومەندەدى. بۇل - 2020-جىلدان بەرگى ەڭ ناشار كورسەتكىش. بۇل Tesla-نىڭ نارىقتىق كاپيتاليزاتسياسىنىڭ 125 ميلليارد دوللارعا تومەندەۋىنە اكەلدى.
ترامپ Truth Social-دا اكسيالاردىڭ قۇلدىراۋىنا جاۋاپ رەتىندە Tesla-نى قولدايتىنىن جانە جاڭا ەلەكتروموبيل ساتىپ الاتىنىن ايتتى. سودان كەيىن كومپانيانىڭ اكسيالارى نارىققا دەيىنگى ساۋدادا %5 عا قىمباتتادى. ءبىراق ساراپشىلار بۇل ۋاقىتشا اسەر دەپ سانايدى.
ساراپشىلاردىڭ پىكىرىنشە، Tesla-نىڭ باستى ماسەلەسى ساياساتتا ەمەس، باسەكەلەستىك پەن ناشار ساتىلىم كورسەتكىشى قىتايلىق BYD كومپانياسى ەلەكتر كولىكتەرىن ساتۋدا Tesla نى باسىپ وزدى، ال ارزانىراق مودەل 2 دەن ($25000 عا) باس تارتۋى سۇرانىسقا اسەر ەتتى.
باسقا ميللياردەرلەر قانداي شىعىنعا ۇشىرادى؟
ا ق ش قور نارىعى سايلاۋدان كەيىن ءوسىم كورسەتتى، ءبىراق ترامپتىڭ ەكونوميكالىق ساياساتى ينۆەستورلاردىڭ كوڭىل كۇيىن تۇبەگەيلى وزگەرتتى. كانادادان، قىتايدان جانە مەكسيكادان كەلەتىن تاۋارلارعا جاڭا تاريفتەر، سونداي-اق ەكونوميكالىق بەلگىسىزدىك SP 500 يندەكسىنىڭ %6,4 عا تومەندەۋىنە اكەلىپ، ەڭ ءىرى كورپوراتسيالارعا اسەر ەتتى.
17-قاڭتاردان بەرى Amazon اكسيالارى %14 عا قۇلدىراعان دجەفف بەزوس 29 ميلليارد دوللار جوعالتتى. كومپانيالاردىڭ باسەكەگە ءتۇسۋى قيىن، ال قىتايلىق تاۋارلارعا تاريفتەردىڭ كوتەرىلۋى لوگيستيكالىق شىعىنداردى ارتتىرۋى مۇمكىن.
سەرگەي برين 22 ميلليارد دوللار جوعالتتى. Google-گە يەلىك ەتەتىن Alphabet رەتتەۋشى ورگانداردىڭ قىسىمىنا ۇشىرادى. سونىمەن قاتار جارنامادان تۇسەتىن تابىستىڭ ءوسۋىن باسەڭدەدى.
مارك تسۋكەربەرگ 5 ميلليارد دوللار جوعالتتى. مەتا قاڭتاردا نارىقتىق قۇننىڭ كۇرت وسۋىنە قاراماستان، اكسيالار كەيىننەن بارلىق تابىسىن جوعالتتى. بەرنارد ارنو دا 5 ميلليارد دوللار جوعالتتى. ويتكەنى LVMH اكتسيالارى سايلاۋدان كەيىن باستاپقىدا %20 ءوستى، ءبىراق سودان كەيىن ءساندى تاۋارلارعا سۇرانىستىڭ تومەندەۋىنە بايلانىستى قايتادان قۇلدىرادى.
ەسكە سالا كەتەيىك، يلون ماسك دونالد ترامپ ساياساتىنىڭ كەسىرىنەن بايلىعىنىڭ تورتتەن ءبىرىن جوعالتتى.
