الەمدىك جۇلدىزداردىڭ كونسەرتى قازىناعا 1 ميلليارد تەڭگەدەن استام قارجى اكەلۋى مۇمكىن
استانا. KAZINFORM - بيىل ەلىمىزدە الەمگە تانىمال بىرنەشە ءارتىس كونسەرت بەرەدى. «ا» ساناتىنداعى الەمدىك كونسەرتتەردەن ەل قازىناسىنا 1 ميلليارد تەڭگەدەن استام قارجى تۇسەدى دەگەن بولجام بار. تولىعىراق «استانا كونسەرت» كومپانياسىنىڭ پروديۋسەرى مالىك حاسەنوۆ ايتىپ بەردى.
- الداعى 3 جىل ىشىندە «A» ساناتىنداعى 10 نان استام كونسەرت وتكىزەمىز، بۇل ۇدەرىس قازىردىڭ وزىندە باستالىپ كەتتى. بيىلدى قورىتىندىلاي كەلە كونسەرتتەردى ۇيىمداستىرۋمەن اينالىساتىن كومپانيالار توبى 1 ميلليارد تەڭگەدەن استام سالىق تولەيدى دەپ ايتۋعا بولادى. ءبىز ءالى كونسەرتتىڭ ەكونوميكالىق جالپى اسەرى تۋرالى ايتقان جوقپىز. سەبەبى ءبىز دجەي لونىڭ استانا مەن الماتىداعى كونسەرتىنە كەلەتىن تۋريستەر سانى 18 مىڭ ادامعا جۋىقتايدى دەپ وتىرمىز. ال backstreet Boys توبى كونسەرتىنەن ودان دا جوعارى كورسەتكىش كۇتىپ وتىرمىز، - دەدى مالىك حاسەنوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، قازىر «استانا كونسەرت» كومانداسى جاڭا جوبالار بويىنشا كەلىسسوز جۇرگىزىپ جاتىر.
- 10 نان استام جۇلدىزبەن كەلىسسوز جۇرگىزىپ جاتىرمىز. جۇلدىزداردىڭ تۋر كەستەسىن ءبىلىپ، سونىڭ اراسىنا استانانى كىرىستىرۋ كەرەك. تۋر اياسىندا بيلەت باعاسى ءار كەزدە ءارتۇرلى بولادى، ونىڭ ۇستىنە لوگيستيكا مەن كونسەرتتىك باعدارلاماعا دا بايلانىستى، - دەيدى ول.
دەگەنمەن الەمدىك دەڭگەيدەگى كونسەرت ۇيىمداستىرۋشىلار الداعى ۋاقىتتا ەلىمىزگە كەلەتىن جۇلدىزداردىڭ ەسىمىن ازىرگە جاريالاماي وتىر.
- قازىر ءبىز ناقتى ەسىمدەردى جانە كىمنەن الدىن الا كەلىسىم العانىمىزدى ايتا المايمىز. كەلەسى جىلعا ءۇش راستالعان كەلىسىم بار. جوبالاردىڭ ازىرلىك دەڭگەيى — %70. الەمدىك دەڭگەيدەگى ورىنداۋشىلاردىڭ قازاقستاندا ونەر كورسەتۋىن ۇيىمداستىرۋ باعىتىندا جۇمىس ىستەپ جاتىرمىز، - دەيدى مالىك حاسەنوۆ.
بۇعان دەيىن حابارلاعانىمىزداي Backstreet Boys توبىنىڭ كونسەرتىنە بيلەت 14-شىلدەدە ساتىلىمعا شىعادى. كونسەرت الماتى جانە استانا قالاسىندا وتەدى.
ەسكە سالايىق، بيىل 1-تامىزدا الەمگە تانىمال پوپ-جۇلدىز دجەننيفەر لوپەس استانادا كونسەرت بەرەدى.
