الەمدىك ب ا ق-تاعى قازاقستان: ستراتەگيالىق اليانس، استىق رەكوردى، 5G جەتىستىكتەرى

وسى اپتادا شەتەلدىك باسىلىمدار ەلىمىز تۋرالى ءبىرقاتار حابار تاراتتى. ونىڭ ىشىندە قازاقستان مەن تۇركيا اراسىنداعى تۇراقتى قارىم-قاتىناستىڭ قازىر قانداي دەڭگەيگە كوتەرىلگەنى، سونداي-اق ەلىمىزدىڭ قىتايعا استىق جەتكىزۋدەن رەكورد جاڭارتقانى، مەملەكەت باسشىسى قاسىم-جومارت توقايەۆتىڭ 2024 -جىلى ءبىرقاتار حالىقارالىق ۇيىمدارعا، ونىڭ ىشىندە شانحاي ىنتىماقتاستىق ۇيىمىنا ءتوراعالىق ەتەتىنىن ايتقانى جانە 5G ەنگىزۋدەگى جەتىستىكتەرىمىزگە قاتىستى جاڭالىقتار بار. الەمدەگى باق قازاقستان تۋرالى نە جازعانىن Kazinform شولۋشىسىنىڭ ماتەريالىنان وقي الاسىز.

ستراتەگيالىق اليانستار: تۇركيا مەن قازاقستاننىڭ ىنتىماقتاستىعى

قازاقستان بۇرىن تۇركيانىڭ تۇراقتى ينۆەستيتسيالىق سەرىكتەسى بولسا، ەندى ستراتەگيالىق وداقتاسىنا اينالدى، ورتالىق ازياداعى ماڭىزدى بۋىندى قامتاماسىز ەتتى، ال ديپلوماتيالىق ۇيلەسىمدىلىك تۇراقتى ىنتىماقتاستىققا ىقپال ەتەدى. ەكى ەل اراسىنداعى ەكونوميكالىق، ستراتەگيالىق جانە باسقا باعىتتاعى قارىم- قاتىناس تۋرالى dailysabah اگەنتتىگى كولەمدى ماتەريال جاريالادى.

باسىلىم قازاقستان مەن تۇركيا اراسىنداعى ديپلوماتيالىق قاتىناستىڭ تاريحىنان باستاپ، بۇگىنگە دەيىنگى بايلانىسىن بايانداعان. سونىمەن قاتار، ساۋدا- ەكونوميكالىق قاتىناستاعى كورسەتكىشتەرىنە ايرىقشا توقتالعان.

2022 -جىلى قازاقستان مەن تۇركيا اراسىنداعى ساۋدا كولەمى 6,3 ميلليارد دوللارعا (188,62 ميلليارد تۇرىك ليراسى) دەيىن ءوستى، وسىنىڭ ارقاسىندا تۇركيا قازاقستاننىڭ ءتورتىنشى ءىرى ساۋدا سەرىكتەسى اتاندى. بۇل ەكونوميكالىق ىنتىماقتاستىقتىڭ تاعى ءبىر كورىنىسى رەتىندە تۇركيانىڭ قازاقستان ەكونوميكاسىنا 5 ميلليارد دوللاردان استام تىكەلەي ينۆەستيتسيا قۇيعانىن جانە ەلدەگى ەڭ ءىرى 10 ينۆەستور قاتارىندا تۇركيانىڭ پوزيتسياسى نىعايىپ كەلە جاتقانىن اتاپ وتۋگە بولادى، - دەپ جازدى dailysabah.

اگەنتتىكتىڭ اتاپ وتۋىنشە، تۇركيا ءۇشىن قازاقستان ينۆەستيتسيا سالۋعا تۇراقتى ارىپتەس قانا ەمەس، باعا جەتپەس وداقتاس ەلگە، اسىرەسە ورتالىق ازيا ايماعىندا ىقپالىن جۇرگىزەتىن ستراتەگيالىق ارناسىنا اينالدى.

انكارا مەن استانانىڭ ديپلوماتيالىق مۇددەلەرىنىڭ ۇيلەسۋى ولاردىڭ اۋمالى- توكپەلى جاھاندىق لاندشافتتا ورتاق ماقساتتارى مەن ءوزارا ءتيىمدى قارىم- قاتىناسى بار ەكەنىن كورسەتەدى. ەكى ەل دە جىلدام وزگەرىپ جاتقان حالىقارالىق جۇيەگە بەيىمدەلە وتىرىپ، انكارا مەن استانا اراسىنداعى مۇندۆي جاقىنداستىق جالعاسىپ، ودان ءارى ىنتىماقتاستىق پەن ءوزارا ءىس- قيمىلعا ىقپال ەتۋى مۇمكىن، - دەپ تۇيىندەدى باسىلىم ماقالانى.

قازاقستان قىتايعا استىق جەتكىزۋدەن رەكورد ورناتتى

وتكەن جىلى 2,2 ميلليون توننا بيداي، ارپا، سويا، زىعىر جانە كۇنباعىس تۇقىمدارى قىتايعا جىبەرىلگەن. بۇل 2022 -جىلى جەتكىزىلگەن 615000 توننامەن سالىستىرعاندا الدەقايدا كوپ، ياعني بىلتىر ۇلكەن ءوسىم بولعان. بۇل تۋرالى eurasianet جازدى.

قىتايدىڭ كەدەندىك وتكەلدەرىندە COVID-19-بەن بايلانىستى سانيتارلىق رەجيمنىڭ السىرەۋى قازاقستانعا 2023 -جىلى ەلگە اۋىل شارۋاشىلىعى ونىمدەرى ەكسپورتىنىڭ كولەمىن وتكەن جىلمەن سالىستىرعاندا ءتورت ەسەگە ارتتىرۋعا مۇمكىندىك بەردى. وتكەن جىلى قىتايعا بيداي، ارپا، سويا، زىعىر جانە كۇنباعىس تۇقىمىن قوسقاندا 2,2 ميلليون توننا جونەلتىلگەن. بۇل كورسەتكىش 2022 -جىلى جەتكىزىلگەن 615000 توننا مەجەسىنەن عانا ەمەس، سونداي-اق بۇعان دەيىنگى رەكورد - 1,2 ميلليون توننادان دا ايتارلىقتاي كوپ. اتالعان رەكوردتىق كورسەتكىش 2019 -جىلى تىركەلگەن ەدى، - دەپ جازدى باسىلىم قازاقستاندىق eldala سايتىنا سىلتەمە جاساپ.

eurasianet مالىمەتىنشە، قىتاي نارىعىنىڭ قايتا ورالۋى قازاقستاندىق اگرارلىق سەكتورعا قيىن جاعدايدان شىعۋعا سەپتىگىن تيگىزدى. قىتايداعى كارانتين رەجيمى جانە قاتاڭ سانكتسيا سارساڭىنا تۇسكەن يراننان تولەم جاساۋ قيىنداعان سوڭ قازاقستاندىق فەرمەرلەر ءوز ءونىمىن تەك ورتالىق ازياداعى كورشىلەرىنە ساتۋعا ءماجبۇر بولعان. تولىعىراق مىنا سىلتەمەدەن وقۋعا بولادى.

قازاقستان 2024 -جىلى بىرنەشە بەدەلدى حالىقارالىق ۇيىمعا ءتوراعالىق ەتەدى - پرەزيدەنت توقايەۆ

مەملەكەت باسشىسى قاسىم-جومارت توقايەۆ وسى جىلدىڭ 3 قاڭتارىندا وتاندىق Egemen Qazaqstan باسىلىمىنا كولەمدى سۇحبات بەرگەن بولاتىن.

وتكەن اپتادا سۇحبات تۋرالى بىرنەشە شەتەلدىك باسپا ءسوز جازعانىن ايتقانبىز. دەگەنمەن وسى اپتادا دا پرەزيدەنتتىڭ سۇحباتىن جاريالاعان باسىلىمدار بولدى. سولاردىڭ ءبىرى - economictimes اگەنتتىگى.

قازاقستان پرەزيدەنتى قاسىم-جومارت توقايەۆ جاقىندا ەلدىڭ 2024 -جىلعى سىرتقى ساياساتىنا ەگجەي- تەگجەيلى توقتالىپ، استانا ۇلت مۇددەسىن ەسكەرە وتىرىپ، سىندارلى ءارى ساليقالى سىرتقى ساياساتتى جالعاستىراتىنىن ايتتى. ول قازاقستان 2024 -جىلى بىرنەشە بەدەلدى حالىقارالىق ۇيىمعا، ەڭ الدىمەن تۇركى مەملەكەتتەرى ۇيىمىنا، شانحاي ىنتىماقتاستىق ۇيىمىنا، ۇجىمدىق قاۋىپسىزدىك تۋرالى شارت ۇيىمىنا، ازياداعى ءوزارا ءىس-قيمىل جانە سەنىم شارالارى جونىندەگى كەڭەسكە ءتوراعالىق ەتەتىنىن اتاپ ءوتتى، - دەپ جازدى شەتەلدىك باسىلىم.

اعىلشىن باسىلىمىنىڭ مەملەكەت باسشىسىنىڭ سۇحباتىنا قاتىستى جازعان ماتەريالىن تولىعىراق مىنا سىلتەمەدەن وقي الاسىز.

قازاقستان ەۋرازيالىق ەكونوميكالىق وداقتا 5G ەنگىزۋ بويىنشا كوشباسشى ەل بولدى

ەل ۇكىمەتى گەوگرافيالىق كەدەرگىلەردى ەڭسەرە وتىرىپ، بارلىق تۇرعىنعا تەڭ مۇمكىندىكتەر ۇسىنىپ، بۇكىل ەلدە ينتەرنەتكە ۇزدىكسىز قول جەتكىزۋدى قامتاماسىز ەتۋگە تىرىسىپ جاتىر. مۇنداي مالىمەتتى caspiannews.com باسپاسى حابارلادى.

قازاقستان - ورتالىق ازيانىڭ ەڭ ءىرى ەلى، ەۋرازيالىق ەكونوميكالىق وداققا (ە ا ە و) مۇشە ەلدەر اراسىندا 5G ەنگىزۋ بويىنشا كوشباسشى ەل رەتىندە بۇل قىزمەتتەردى جەدەلدەتۋ جوسپارىن ىلگەرىلەتۋدە. 2023 -جىلعى ناۋرىز بەن جەلتوقسان ارالىعىندا وتكەن كونكۋرستىق اۋكتسيوندا وپەراتورلارعا جيىلىكتەر بەرىلگەلى ون ايدا 5G ەنگىزۋ جوسپارى كەستەدەن وزىپ كەلەدى، - دەپ جازدى باسىلىم وتاندىق zakon.kz اگەنتتىگىنە سىلتەمە جاساپ.

سونىمەن قاتار، caspiannews.com جازۋىنشا، قازاقستاننىڭ تەحنولوگيالىق بولاشاعىنا قاتىستى پرەزيدەنت باعدارلاماسى 5G-دى جەدەلدەتىپ ەنگىزۋدىڭ قوزعاۋشى كۇشى بولدى. قازاندا وتكەن «Digital Bridge 2023» فورۋمىندا قاسىم-جومارت توقايەۆ 2025 -جىلدىڭ سوڭىنا دەيىن بارلىق وبلىس ورتالىقتارىن جاڭا بۋىن بايلانىسىمەن قامتاماسىز ەتۋدى جەدەلدەتۋ قاجەت دەپ اتاپ وتكەنىن جازدى.

اۆتور

راحيلا تلەۋوۆا