الەمدىك 86 ۋنيۆەرسيتەتتىڭ گرانتىن جەڭىپ العان ايسۇلتان يتاليادا ءبىلىم العىسى كەلەدى

تۇركىستان. KAZINFORM - ارىستىق تۇلەك 4614000 ا ق ش دوللارى كولەمىندە گرانت جەڭىپ الدى.

ارىس قالاسىندا ورنالاسقان «ءبىلىم- يننوۆاتسيا» ليسەيىنىڭ 11-سىنىپ وقۋشىسى ايسۇلتان التىنبەك قازاقستاندىق وقۋشىلار اراسىندا رەكورد ورناتتى. قازىردىڭ وزىندە ونى الەمنىڭ ۇزدىك 86 ۋنيۆەرسيتەتى وقۋعا شاقىرىپ وتىر. ولاردىڭ اراسىندا ا ق ش، ماجارستان، ۇلى بريتانيا، يسپانيا، مالايزيا، اۋستراليا، كانادا، گەرمانيا جانە وڭتۇستىك كورەيا مەملەكەتتەرىندەگى حالىقارالىق دەڭگەيدە بەدەلگە يە 10 جەتەكشى ۋنيۆەرسيتەت بار. اتاپ ايتار بولساق، Budapest University of Technology and Economics, ەötvös Loránd University ،University of East London ،Albion College ،Hampshire College ،Drexel University ،DePaul University ،CU Boulder (University of Colorado Boulder)  ،Drake University ،Temple University سەكىلدى وقۋ ورىندارىنىڭ ارىستىق تۇلەككە تاڭداۋى تۇسكەن. بۇل جوعارى وقۋ ورىندارى عىلىم، تەحنولوگيا، بيزنەس جانە الەۋمەتتىك عىلىمدار سالاسىندا الدىڭعى قاتاردا.

- ينتەرنەت ارقىلى تەست تاپسىردىم. سونداي-اق كەيىنگى جىلدارداعى ساباق ۇلگەرىمىمنىڭ ناتيجەلەرىن تەست قورىتىندىسىنا قوسىپ، وقۋ ورىندارىنىڭ پوشتالارىنا جولدادىم. قازىرگى كەزدە كوپشىلىگىنەن شاقىرتۋ الىپ وتىرمىن. نەگىزى ءوزىمنىڭ بالا كۇنگى ارمانىم ۆەنگريادا وقۋ ەدى. دەگەنمەن بۇل ويىمنان قازىر اينىپ وتىرمىن. بۇگىنگى تاڭداۋىم يتاليا مەن مالازيا مەملەكەتتەرىنە ءتۇستى، - دەيدى ايسۇلتان.

تۇلەك بولاشاعىن IT سالاسىمەن بايلانىستىرعىسى كەلەدى. بۇل جولدا كوپ ىزدەنىپ، كوپ ەڭبەكتەنىپ ءجۇر. ال، ارمانى - قازاق تىلىندە سايت جاساۋ. بۇل پلاتفورما ارقىلى شەتەلدە ءبىلىم الۋدى ارماندايتىن تۇلەكتەرگە كومەك بەرمەك. حالىقارالىق ەمتيحاندارعا دايىندىق، قۇجاتتار جيناۋ جانە ۋنيۆەرسيتەت تاڭداۋ بويىنشا اقپارات وسى جەردە شوعىرلانادى.

- قاراپايىم اۋىل مەكتەبىندە وقيتىن بالالارعا كومەكشى قۇرال قاجەت. ولار دا شەتەلدە وقىعىسى كەلەدى. ءبىراق جولىن بىلمەيدى. مەن قولعا الىپ وتىرعان جوبادا ءاربىر وقۋشىلار ءوز انا تىلىندە اقپاراتتى ەركىن الاتىن بولاتىن. سونىمەن قاتار شەتەلدە وقۋ بويىنشا ءتۇرلى كەڭەس بەرەمىن، - دەيدى ول.

ايسۇلتانعا ۇسىنىلعان جالپى گرانت سوماسى - 4614000 ا ق ش دوللارىن قۇرايدى. بۇل حاباردى العاش ەستىگەندە قاتتى قۋانعانداردىڭ ءبىرى اتا- اناسى بولعان.

- ۇيدە جالپى جەتى اعايىندىمىز. مەنەن كەيىنگى ەكى قارىنداسىم بار. ءبىرى شىمكەنتتەگى نازاربايەۆ زياتكەرلىك مەكتەبىندە وقيدى. ەكىنشى قارىنداسىم - ءبىرىنشى سىنىپتىڭ وقۋشىسى. ال، مەنەن ۇلكەن اعالارىمنىڭ بارشاسى ءوز الدىنا وتاۋ قۇرىپ شىققان. مەنىڭ شەتەلدە وقۋىما تۋىستارىم مەن اتا-انام ەشقانداي قارسى بولعان جوق. قايتا قولداۋ ءبىلدىرىپ، كومەگىن بەرىپ جاتىر، - دەيدى ول.

ال، ايسۇلتاننىڭ سىنىپ جەتەكشىسى ەرايدىن پايىزحان شاكىرتىنىڭ بولاشاعىنان ۇلكەن ءۇمىت كۇتەدى.

- ايسۇلتان «شەتەلگە وقۋعا تۇسەم» دەگەن الدىنا ماقسات قويعان بولاتىن. ماقساتىنا جەتتى. بۇل - ونىڭ تاباندىلىعىنىڭ، اتا- اناسىنىڭ قولداۋى مەن ۇستازدارىنىڭ ەڭبەگىنىڭ ناتيجەسى. بۇل تابىس ستراتەگيا مەن قاجىرلى ەڭبەك كەز كەلگەن ەسىكتى اشاتىنىن دالەلدەيدى. ءبىز وسىنداي شاكىرتىمىزبەن ماقتانامىز. ونىڭ جەتىستىگى قۇرداستارىنا دا شابىت بەردى، - دەيدى ەرايدىن پايىزحان.