الەمدەگى ەڭ ۇزىن تاس جولدىڭ سۋ استىنداعى تۋننەلى قازىلا باستادى - شەتەلدەگى قازاق باسپا ءسوزى
Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
ۇلى قولباسشى ءامىر تەمىردى ەسكە الۋ ءىس-شاراسى ءوتتى – ءو ز ا
سامارقاندتا ۇلى قولباسشى ءامىر تەمىردىڭ تۋعانىنا 689 جىل تولۋىنا وراي رۋحاني-ماڭىزدى ءىس-شارا ۇيىمداستىرىلدى. بۇل تۋرالى «ءو ز ا» اقپارات اگەنتتىگى مالىمدەدى.
حابارلامادا ايتىلعانداي، وبلىس جانە قالا باسشىلارى، قوعام بەلسەندىلەرى ەڭ الدىمەن ءامىر تەمىر كەسەنەسىنە بارىپ، زيارات ەتتى. قۇران وقىلىپ، رۋحىنا تاعزىم جاسالعان.
ودان كەيىن قالا ورتالىعىنداعى ءامىر تەمىر ەسكەرتكىشىنە گۇل شوقتارى قويىلدى.
- 1996-جىلى ءامىر تەمىردىڭ 660 جىلدىعىنا وراي سامارقاندتىڭ ءدال ورتالىعىندا ەڭسەلى ەسكەرتكىش ورناتىلىپ، كەسەنە مەن ونىڭ اينالاسى اباتتاندىرىلعان بولاتىن. بۇگىندە بۇل مەكەن وتانداستارىمىز بەن شەتەلدىك تۋريستەر ەڭ ءجيى كەلەتىن تاريحي-مادەني ورىنعا اينالعان، - دەپ جازادى وزبەكستاندىق ب ا ق.
الاشانكوۋ كەدەن بەكەتىنەن كىرىپ-شىققان كولىك سانى كوبەيدى - Harajorga
شىڭجاڭنىڭ الاشانكوۋ كەدەن بەكەتىنەن(«الاشانكوۋ-دوستىق» كەدەن بەكەتىنەن - اۆت.) جىلدىڭ 1-توقساندا شەكارادان كىرىپ-شىققان اۆتوكولىكتەر سانى 27 مىڭعا جۋىقتاپ، وتكەن جىلعى سايكەس مەزگىلدەگىدەن 37,21 پايىزعا ارتتى، دەپ حابارلاندى قىتايلىق Harajorga اقپاراتتىق جەلىسىندە.
اتالعان ب ا ق- تىڭ كەلتىرگەن دەرەكتەرىنە سۇيەنسەك، قىتايدىڭ الاشانكوۋ كەدەن بەكەتى شەكارا قورعانىس تەكسەرۋ پۋنكتىنىڭ مالىمەتىنشە، بيىل 1-توقساندا الاشانكوۋداعى شەكارا وتكەلىنەن كىرىپ- شىققان اۆتوكولىكتەر سانى 26 مىڭ 999 عا جەتىپ، وتكەن جىلعى سايكەس مەزگىلدەگىدەن 37,21 پايىز ارتقان. شەكارادان كىرىپ-شىققان ادام سانى 41 مىڭ 568 ادامعا جەتىپ، بۇلدا وتكەن جىلعىدان 20,19 پايىز ارتقان. شەكارادان كىرىپ-شىققان اۆتوكولىكتەر مەن ادامدارعا ءتيىمدى تاسىلدەر جولعا قويىلىپ، شەكارا وتكەلدەرىنىڭ كەدەننەن ءوتۋ ونىمدىلىگى كورنەكتى جوعارلاعان.
اتاپ ايتقاندا، بيىل جىل باسىنان بەرى «ءبىر بەلدەۋ، ءبىر جول» حالىقارالىق باعدارلاماسىنىڭ اياسىندا قىتاي مەن قازاقستان اراسىنداعى ادامداردىڭ شەكارادان كىرىپ-شىعۋى كۇن سايىن ارتىپ، شەكارا اتتاعان ساياحات دەڭگەيى جوعارىلاعان. جۇك كولىكتەرىنىڭ كەدەننەن ءوتۋى جاعىندا الاشانكوۋ شەكارالىق تەكسەرۋ بولىمدەرى جۇك اۆتوكولىكتەرىن جىلدام تەكسەرۋدى جۇزەگە اسىرعان.
الەمدەگى ەڭ ۇزىن تاس جولدىڭ سۋ استىنداعى قالقان تۋننەلى قازىلا باستادى - «حالىق گازەتى»
قىتايدا الەمدەگى ەڭ ۇزىن تاس جولدىڭ سۋ استىنداعى قالقان تۋننەلى قازىلا باستادى.
9-ساۋىردە يانتسزى وزەنىنىڭ تەڭىزگە قۇيىلار تۇسىنداعى جياڭسۋ ولكەسى نانتۋن حايمەن اۋماعىنداعى 16 مەترلىك وتاندىق وتە ۇلكەن ديامەترلى «جيانحاي» قالقان ماشيناسى جولعا ءساتتى شىقتى. بۇل حايمەن-تايتسان يانتسزى وزەنى تۋننەلىنىڭ قالقاندى قازۋ جۇمىستارى باستالعانىن بىلدىرەدى. ول - قازىرگى ۋاقىتتا الەمدەگى ەڭ ۇزىن سۋ استىنداعى تاس جول قالقانى تۋننەلى، دەپ حابارلايدى «حالىق گازەتى» باسىلىمى.
قىتايلىق ب ا ق- تىڭ مالىمەتىنشە، تۋننەل جيانسۋداعى يانتسزى وزەنىنىڭ تەڭىزگە قۇيار ساعاسىندا ورنالاسقان. ول نانتۋننىڭ حايمەن اۋماعى مەن سۋچجوۋدىڭ تايتسان قالاسىن بايلانىستىرادى.
- بۇل جوبالىق جىلدامدىعى ساعاتىنا 100 شاقىرىم بولاتىن ەكى باعىتتى التى جولاقتى جەدەل تاسجول تۋننەلى. قالقان ۋچاسكەسىنىڭ جالپى ۇزىندىعى 9315 مەتر، ال ەڭ تەرەڭ بولىگى يانتسزى وزەنىنىڭ استىندا 75 مەتر جەردە ورنالاسقان. ونىڭ وتە الىس قاشىقتىعى، وتە ۇلكەن ديامەترى، سۋدىڭ وتە جوعارى قىسىمى، ۇلكەن كومۋ تەرەڭدىگى جانە كۇردەلى جۇمىس جاعدايلارى سياقتى ەرەكشەلىكتەرى بار، - دەپ جازادى «حالىق گازەتى».
سونداي وسى اپتادا «حالىق گازەتى» باسىلىمىندا «شەنياندا العاشقى «قىتاي-قازاقستان-وزبەكستان» ترانسشەكارالىق اۆتوموبيل كولىگى جەلىسى اشىلدى» دەگەن تاقىرىپتاعى اقپارات جارىق كوردى.
اتاپ ايتقاندا، 7-ساۋىردە شەنيان حالىقارالىق اۆتوموبيل كولىگى قۇراستىرۋ ورتالىعىنىڭ كەدەندىك قاداعالاۋ ورنىنان لياونين قالاسىنداعى جەرگىلىكتى كاسىپورىندار شىعارعان 20 توننا بالمۇزداق تيەلگەن ەكى TIR توڭازىتقىش جۇك كولىگى جولعا شىقتى.
قىتايلىق ب ا ق- تىڭ دەرەگىنشە، كولىك شىڭجاڭنىڭ تارباعاتايىنداعى باقتى پورتى ارقىلى ەلدەن شىعىپ، قازاقستاندى باسىپ ءوتىپ، وزبەكستاننىڭ استاناسى تاشكەنتكە جەتەدى. جولدىڭ ۇزاقتىعى - 8-10 كۇن. بۇل شەنياننىڭ العاشقى «قىتاي-قازاقستان-وزبەكستان» TIR ترانسشەكارالىق اۆتوموبيل كولىگى باعىتىنىڭ رەسمي اشىلۋىن بىلدىرەدى.
ايتا كەتەيىك، بۇل وتكەن جىلى شەنيان حالىقارالىق اۆتوموبيل كولىگىن قۇراستىرۋ ورتالىعى قۇرىلعاننان بەرگى ورتالىق ازيا ەلدەرىنە باعىت العان العاشقى كولىك.
يراندا باتىس ازياداعى ەڭ ۇلكەن گۇل كىلەمىنىڭ كورمەسى ءوتتى - ParsToday
يراننىڭ كارادج قالاسىنداعى شاھيد چامران ساياباعىنداعى گۇل باعىندا باتىس ازياداعى ەڭ ۇلكەن گۇل كىلەمى قويىلعان 11-كارادج قىزعالداق فەستيۆالى ءوتىپ جاتىر، دەپ جازدى ParsToday اقپارات اگەنتتىگى.
ParsToday اقپارات اگەنتتىگىنىڭ مالىمەتى بويىنشا، 200 مىڭنان استام قىزعالداق باداندارى بار 11-كارادج قىزعالداق فەستيۆالى ءساۋىردىڭ 4-11 ارالىعىندا گۇلدەر مەن وسىمدىكتەرگە اۋەسقويلاردى قابىلدايدى.
بۇل فەستيۆالدە 2700 شارشى مەتر اۋماقتى الىپ جاتقان تاياۋ شىعىستاعى ەڭ ۇلكەن گۇل كىلەمى كورسەتىلگەن.
كەلتىرىلگەن دەرەكتەرگە سۇيەنسەك، اتالعان فەستيۆالدە قىزعالداقتىڭ 20 دان استام ءتۇرى ءارتۇرلى ءتۇستى، سونىمەن قاتار ماۋسىمدىق گۇلدەر مەن شەگىرگۇل مەن نارتسيس سياقتى وسىمدىكتەر بار.
يران مۇنايىنىڭ قىتايعا ەكسپورتى رەكوردتىق كورسەتكىشكە جەتتى - ParsToday
جاريالانعان دەرەكتەر يراننىڭ قىتايعا مۇناي ەكسپورتى تاۋلىگىنە 1,8 ميلليون باررەلدەن استام وسىمگە جەتكەنىن كورسەتەدى.
بيزنەسمەندەر مەن ساراپشىلاردىڭ دەرەكتەرى قىتايدىڭ يراننان مۇناي يمپورتى 2025-جىلدىڭ ناۋرىز ايىندا كورنەكتى دەڭگەيدە وسكەنىن كورسەتەدى.
ParsToday اگەنتتىگىنىڭ Mizan اقپارات اگەنتتىگىنە سىلتەمە جاساپ حابارلاۋىنشا، بۇل ءوسىم ا ق ش- تىڭ تەھرانعا قارسى ودان ءارى سانكسيالارى جەتكىزۋدى كۇشەيتۋى مۇمكىن دەگەن الاڭداۋشىلىقپەن بايلانىستى. قىتايدىڭ يراننان مۇناي يمپورتى ناۋرىز ايىندا تاۋلىگىنە 1,8 ميلليون باررەلدەن استى، بۇل تاريحتاعى ەڭ جوعارى كورسەتكىش، دەپ حابارلايدى Vortexa كەمە باقىلاۋ كومپانياسى.
يراندىق ب ا ق- تىڭ مالىمەتىنشە، بۇل قىتايدىڭ شاندۋن پروۆينتسياسىنداعى تاۋەلسىز مۇناي وڭدەۋ ورتالىعىنداعى تۇگەندەۋ دەڭگەيىنىڭ كوتەرىلۋىمەن سايكەس كەلەدى.
سونىمەن قاتار Kpler اناليتيكالىق فيرماسىنىڭ دەرەكتەرى يراننىڭ قىتايعا مۇناي ەكسپورتى ناۋرىز ايىندا تاۋلىگىنە 1,71 ميلليون باررەل بولدى، بۇل اقپانداعى تاۋلىگىنە 1,43 ميلليون باررەلدەن 20 پايىزعا جوعارى جانە سوڭعى بەس ايداعى ەڭ جوعارى كورسەتكىش بولعان.
يراننىڭ قىتايعا مۇناي ەكسپورتىن قاداعالايتىن تاعى ەكى ساۋدا كوزى ناۋرىز ايىنداعى يمپورتتى كۇنىنە سايكەسىنشە 1,67 ميلليون جانە 1,8 ميلليون باررەل دەپ باعالادى.
قازاقستان ۇلتتىق مۋزەيى ەلدى تانىپ-بىلگىسى كەلەتىندەرگە بىرەگەي مۇمكىندىك بەرەدى - TRT
8 قاباتتى مۋزەيگە قازاقستاننىڭ سان الۋان تاريحي كەزەڭدەرى، وسى جەرلەردى مەكەندەگەن كونە وركەنيەتتەر دامىتقان مادەني بايلىق جانە تامىرى ورتاق تۇرىك تاريحىنان سىر شەرتەتىن 220 مىڭنان استام تۋىندى قويىلعان. مۇراجاي شەتەلدىك تۋريستەر، اسىرەسە ەلورداعا كەلەتىن تۋريستەر ەڭ كوپ كەلەتىن مەكەنجايلاردىڭ ءبىرى رەتىندە ەرەكشەلەنەدى.
قازاقستاننىڭ ۇلتتىق مۋزەيى كەلۋشىلەردى 220 مىڭنان استام تاريحي جادىگەر ارقىلى ەلدىڭ تامىرى تەرەڭ تاريحىمەن جانە مادەني بايلىعىمەن تانىستىرادى.
بۇل تۋرالى وسى اپتادا تۇركيا راديو تەلەۆيزيا پورتالى حابارلادى.
تۇركيالىق ب ا ق- تىڭ مالىمدەۋىنشە، شامامەن 2500 -جىل بۇرىن ساف التىننان جاسالعان مىڭداعان جادىگەر ورنالاسقان «التىن» زال كەلۋشىلەردى ءوزىنىڭ تاماشالىعىمەن تاڭعالدىرادى. قازاقستاننىڭ تۇڭعىش «التىن ادامى» دا وسى زالدا ورنالاسقان.
تۇركيا راديو تەليەۆيزيا پورتالى ارى قاراي قازاقستاننىڭ ۇلتتىق مۋزەيى تۋرالى تولىعىراق تانىستىرعان.
اۆتور بەيسەن سۇلتان
