الەمدەگى ەڭ ۇزدىك 100 جاعاجاي انىقتالدى
استانا. KAZINFORM - «الەمدەگى ەڭ كەرەمەت 100 جاعاجاي» اتتى جاڭا كىتابىن Lonely Planet باسىلىمى ۇسىندى، - دەپ حابارلايدى Tengritravel.kz ءتىلشىسى DailyMail باسىلىمىنا سىلتەمە جاساپ.
جيناقتان جاعاجايلاردىڭ سۋرەتتەرىن تاماشالاپ، ءار لوكاتسياعا قالاي جەتۋگە بولاتىندىعى تۋرالى اقىل-كەڭەستەردى وقۋعا بولادى. سونىمەن قوسا وندا جاعاجايدىڭ نە سەبەپتى ۇزدىكتەر قاتارىنا قوسىلعانى تۋرالى تۇسىنىكتەمە بار. تىزىمگە بريتان ارالدارىنداعى 5 جاعالاۋ، سونداي-اق كاريب تەڭىزى، گرەكيا، گاۆاي، سەيشەل ارالدارى، كەيپتاۋن جانە اۆستراليانىڭ جاعاجايلارى دا ەنگىزىلگەن.
«وسى ەكسپوزيتسيا ارقىلى ءوزىڭىز ءۇشىن الەمدەگى ەڭ تاڭعاجايىپ جاعاجايلاردىڭ ءتۇر-ءتۇرىن، ونىڭ ىشىندە ۇڭگىرلەردى، شىعاناقتاردى جانە اركالاردى؛ ميستيكاعا تولى تۇمان باسقان جاعاجايلاردى؛ قالالىق جانە سەرفينگكە ارنالعان جاعاجايلاردى اشىڭىز. الەمدەگى ەڭ تاڭعالارلىق جاعاجايلاردى نازارلارىڭىزعا ۇسىنامىز»، - دەلىنگەن Lonely Planet العى سوزىندە.
Lonely Planet تايلاندتاعى پحي-پحي ارالىن سيپاتتاي وتىرىپ، ونىڭ جاعاجايى 2022 -جىلدىڭ 1-قاڭتارىندا تۋريستەر ءۇشىن قايتا اشىلعانىن اتاپ ءوتتى. بۇعان دەيىن جاعاجاي ءتورت جىل بويى رەكونسترۋكسيالىق جۇمىستارعا بايلانىستى جابىلعان كورىنەدى.
«مايا شىعاناعى، ءتىپتى، «گولليۆۋدتىڭ تروپيكالىق جۇماق» ستاندارتتارىنا ساي كەلەدى. ءدال وسى جەردە لەوناردو دي كاپريو باستى ءرولدى سومداعان «جاعاجاي» بلوكباستەرى تۇسىرىلگەن بولاتىن»، - دەپ اتاپ ءوتتى Lonely Planet.
سونىمەن قاتار وكەانياداعى ەڭ تاڭعاجايىپ جاعاجايلار تىزىمىنەن نانۋيا لايلايداعى Blue Lagoon جاعاجايىن، فيدجيدەگى ياساۆا ارالدارىن، ۋپولۋداعى لالومانۋ جاعاجايىن، ساموانى، سونداي-اق تاپۋاەتاي جاعاجايىن، ايتۋتاكي ارالىن جانە كۋك ارالدارىن كورۋگە بولادى.
افريكا جاعاجايلارىنا كەلەر بولساق، جيناققا كەيپتاۋنداعى كەمپس بەي جاعاجايى، زانزيبارداعى منەمبا ارالى، ماۆريكييدەگى لە مورن جاعاجايى، ماداگاسكارداعى نوزي يرانجا جانە سەيشەل ارالدارىنداعى انس سورس د'ارگان جاعاجايى ەنگىزىلگەن.
Lonely Planet كىتابىنداعى ۇزدىكتەر قاتارىندا ءۇندىستانداعى اندامان ارالدارىنداعى رادحاناگار جاعاجايى، گواداعى پالولەم جاعاجايى، مالديۆ ارالدارىنداعى فۋلحادۋ ارالى، يندونەزياداعى پادار ارالى جانە ازيا قۇرلىعىنداعى كوپتەگەن كوزتارتارلىق جەر بار.
