الەمدەگى ەڭ قارت ايەل 117 جاسقا تولدى
الەمدەگى ەڭ قارت ايەل ماريا برانياس مورەرا 117 جاسقا تولدى. ول ءتىپتى ۇزاق جاساۋدىڭ سىرىمەن دە ءبولىستى دەپ حابارلايدى بەلتا.
ماريا 1907 -جىلى امەريكانىڭ سان-فرانسيسكو قالاسىندا يسپاندىق وتباسىندا دۇنيەگە كەلگەن. ول 8 جاسقا تولعاندا اتا-اناسى تاريحي وتانىنا قايتامىز دەپ شەشىم قابىلداعان، - دەپ جازدى Guinness World Records.
كەيۋانانىڭ جاسى 117 اسسا دا دەنساۋلىعىندا ەشبىر اقاۋ جوق. تەك قۇلاعى ناشارلاۋ ەستيدى ءارى وزدىگىنەن قوزعالۋ قيىن. ءتىپتى ۇزاق جاساۋدىڭ سىرىن ىزدەپ جۇرگەن عالىمدار ونىڭ دەنساۋلىعىنا قىزىعۋشىلىق تانىتقان. ماريا ولار ۇسىنعان ارنايى زەرتتەۋگە قاتىسۋ جونىندەگى ۇسىنىستى قابىل العان.
قارت اجەنىڭ ۇيىندە 90 نان اسقان جاقىندارى دا بار ەكەن. ونىڭ ۇزاق جاساۋداعى سىرى تۇقىمىنداعى گەندىك ەرەكشەلىككە بايلانىستى بولۋى دا مۇمكىن دەگەن بولجام بار. الايدا، ماريانىڭ ءوزى بۇلاي عاسىر جاساۋدىڭ قۇپياسى وتباسىنداعى گارمونيا، دوستارمەن جىلى قارىم-قاتىناس، تابيعاتقا جاقىندىق، ەموتسيونالدى تۇراقتىلىق جانە ومىرگە دەگەن جاقسى كوزقاراس دەپ سەندىرەدى.
