الەمدە ورىس تىلىنە قىزىعۋشىلىق كۇرت ازايدى
ءتىپتى، ول بۇرىنعىداي العاشقى وندىقتان دا كورىنبەدى. بۇل تۋرالى Aikyn.kz گازەتى inbusiness.kz-كە سىلتەمە جاساپ حابارلايدى.
Duolingo - دۇنيەجۇزىندەگى تىلدەردى ۇيرەنەتىن ەڭ تانىمال موبيلدى قوسىمشا. وسىعان بايلانىستى ول جىل سايىنعى ەسەبىندە الەم بويىنشا ميلليونداعان پايدالانۋشىلارىنىڭ ءوز قوسىمشاسى ارقىلى 2023 -جىلى قانداي تىلدەردى ۇيرەنگەنى تۋرالى دەرەكتەردى سارالاعان. ودان الەمدە قانداي تىلدەر بارىنشا سۇرانىسقا يە ەكەنىن، ادامزاتتىڭ قىزىعۋشىلىعى مەن مۇددەسى جىل سايىن قالاي وزگەرىپ وتىراتىنىن بىلۋگە بولادى.
سوندىقتان بۇل ماتەريال دا «Duolingo Language Report 2023» ەسەبى اتالعان قوسىمشا ارقىلى ءتىل ۇيرەنگەن پايدالانۋشىلاردىڭ 2022 -جىلعى 1-قازان مەن 2023 -جىلعى 1-قازان ارالىعىنداعى دەرەكتەرىنە نەگىزدەلگەن، - دەيدى inbusiness.kz سايتى.
كوشباسشى ءتىل قايسى؟
تالداۋ قورىتىندىسىندا انىقتالعانداي، ارينە، اعىلشىن ءتىلى كوش باستادى. حالىقارالىق قوعامداستىق اراسىندا بۇل ءتىل سول بويى ەڭ تانىمال شەت ءتىلى بولىپ قالدى.
الەمدە جۇرت ۇيرەنۋگە ەڭ ىنتىق تىلدەر رەيتينگىسىنىڭ العاشقى وندىعى كەلەسىدەي:
- اعىلشىن ءتىلى؛
- يسپان ءتىلى؛
- فرانسۋز ءتىلى؛
- نەمىس ءتىلى؛
- جاپون ءتىلى؛
- كورەي ءتىلى؛
- يتاليان ءتىلى؛
- حيندي ءتىلى؛
- قىتاي ءتىلى؛
- پورتۋگال ءتىلى.
بيىلعى جىلى اعىلشىن ءتىلى بىردەن 122 ەلدە ەڭ تانىمال شەت تىلدەرى اراسىندا «№1» اتاندى. وسى جىلى ازاماتتارى اعىلشىنشانى ۇيرەنۋگە بارىنشا قۇلىق بىلدىرگەن وسى ەلدەردىڭ قاتارى العاش رەت اۋعانستان، مالديۆ، مالتامەن تولىقتى. دەمەك، مىسالى، ميگراتسيالىق داعدارىستى باستان كەشىپ جاتقان امەريكاعا ەندى وسى ەلدەردەن دە ەميگرانتتار تولقىنىن كۇتۋگە بولاتىنداي.
كوپتەگەن مەملەكەتتە اعىلشىن ءتىلى كۇندەلىكتى تىرشىلىكتە قولدانىلماعانىمەن، ول ەكونوميكالىق قىزمەت، مىسالى، شەتەلدىك ينۆەستورلاردى تارتۋ، تۋريزم، سونداي-اق اكادەميالىق اقپارات الماسۋ، ايتالىق، الەمدەگى عىلىمي جاڭالىقتاردى اقپارات كوزدەرىنەن، عىلىمي جۋرنالداردان ءبىرىنشى بولىپ وقىپ، ءبىلۋ ءۇشىن قاجەت ەتىلەدى.
كەيىنگى جىلدارى اعىلشىن تىلىنە ازياداعى شاكىرتتەر كوبىرەك قىزىعۋشىلىق بىلدىرە باستادى. ءۇندىستانداعى (%40)، ۆەتنامداعى (%50) جانە قىتايداعى (%54) شاكىرتتەردىڭ كوبىسى اعىلشىن ءتىلىن ءبىلىم الۋ جانە كاسىبي مانساپتا ءوسۋ ءۇشىن ۇيرەنەدى.
رەيتينگتەن كورىپ تۇرعانىمىزداي، جىل سايىن تىزىمدە بولاتىن ورىس ءتىلىن پورتۋگال ءتىلى ىعىستىرعان. ودان بولەك، ۋكراين تىلىندە سويلەيتىندەر سانى كۇرت وسكەن.
«ساراپشىلاردىڭ پىكىرىنشە، بۇل فاكت اسا ماڭىزدى 2 مادەني بەتبۇرىستى كورسەتەدى. بىرىنشىدەن، ورىس تىلىنە دەگەن الەمدەگى سۇرانىس ۋكرايناداعى سوعىس سالدارىنان قۇلدىرادى. ەكىنشىدەن، حالىقارالىق قوعامداستىق، سونىڭ ىشىندە تۋريستەر تاراپىنان دا برازيليا مەن پورتۋگالياعا دەگەن قىزىعۋشىلىق ارتىپ كەلەدى. پورتۋگال ءتىلىن ۇيرەنۋگە ايماقتىڭ ليدەرى سانالاتىن برازيليانىڭ كورشىلەرى دە ىنتا-ىقىلاس تانىتۋدا. ناتيجەسىندە، بوليۆيا، پاراگۆاي، ۋرۋگۆاي جانە ۆەنەسۋەلادا حالىق كوپ ۇيرەنەتىن شەت تىلدەرى اراسىندا پورتۋگال ءتىلى ەكىنشى ورىنعا شىقتى»، - دەلىنگەن «Duolingo Language Report 2023» ەسەبىندە.
