الەمدە تەز تارالاتىن وتە قاۋىپتى جۇقپالى اۋرۋلاردىڭ ەپيدەمياسى بايقالىپ وتىر - لۋكين

استانا. KAZINFORM - سەناتتا بيولوگيالىق قاۋىپسىزدىكتىڭ قازىرگى جاعدايى مەن بولاشاعى تالقىلاندى.

سەناتتىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ دەپۋتاتتارى بيولوگيالىق قاۋىپسىزدىك ماسەلەلەرى بويىنشا وتىرىس وتكىزدى. قاتىسۋشىلار وسى سالاداعى وزەكتى سىن-قاتەرلەردى، ونىڭ ىشىندە ينفەكسيالاردىڭ تارالۋ قاۋپى، باقىلاۋ جۇيەسىن جەتىلدىرۋ جانە مەملەكەتتىك ورگانداردىڭ ىنتىماقتاستىعىن ۇيلەستىرۋ ماسەلەلەرىن تالقىلادى. زەرتحانالاردى جاڭعىرتۋ، مامان دايارلاۋ جانە ورگاندار اراسىنداعى ءوزارا ءىس-قيمىلدى دامىتۋعا باسا نازار اۋدارىلدى.

كوميتەت ءتوراعاسى اندرەي لۋكين وتىرىس باسىندا بيولوگيالىق قاۋىپسىزدىك حالىقتىڭ دەنساۋلىعى مەن ەلىمىزدىڭ ەكونوميكالىق ءال-اۋقاتىنا تىكەلەي اسەر ەتەتىنىن اتاپ ءوتتى. ول باقىلاۋ جۇيەسىن جاڭعىرتۋ، زاڭنامانى جەتىلدىرۋ جانە مەملەكەتتىك ورگاندار اراسىنداعى ىنتىماقتاستىقتى نىعايتۋ قاجەتتىگىنە توقتالدى.

- بيولوگيالىق قاۋىپسىزدىك الەم قاۋىمداستىعىنا ماڭىزدى ماسەلە بولىپ وتىر، ول ەلىمىز حالقىنىڭ ەكونوميكاسى مەن الەۋمەتتىك ءال-اۋقاتىنا دا تىكەلەي اسەر ەتەدى. سوڭعى جىلدارى الەمدىك كەڭىستىكتە تەز تارالاتىن، حالىقتىڭ دەنساۋلىعى مەن ەل ەكونوميكاسىنا زيان كەلتىرەتىن وتە قاۋىپتى جۇقپالى اۋرۋلاردىڭ ەپيدەمياسى بايقالۋدا. سونىمەن قاتار قازىرگى جاعدايدا تەرروريستىك توپتار تاراپىنان بيولوگيالىق قارۋدى قولدانۋ قاۋپى مەن حالىقارالىق كولىك دالىزدەرى ارقىلى ەرەكشە قاۋىپتى ينفەكسيانىڭ كەلۋ قاۋپى بار. وسى ماسەلەلەردى قۇزىرەتتى ورگاندارىمىز تۇراقتى باقىلاۋدا ۇستاۋى ءتيىس، - دەدى اندرەي لۋكين.

قورعانىس مينيسترلىگىنىڭ ءبىرىنشى ورىنباسارى سۇلتان قامالەتدينوۆ وتىرىس بارىسىندا ەلىمىزدىڭ قارۋلى كۇشتەرىندە بيولوگيالىق قاۋىپسىزدىكتى قامتاماسىز ەتۋ شارالار اياسىندا بيولوگيالىق قاۋىپتەردى باسقارۋ ادىستەمەسى مەن 2024-2025 -جىلدارعا ارنالعان ءتيىستى جوسپاردى ازىرلەنگەنى تۋرالى ايتتى. دەنساۋلىق ساقتاۋ ءمينيسترىنىڭ ءبىرىنشى ورىنباسارى تيمۋر سۇلتانعازيەۆ وتاندىق ۆاكسينالار ءوندىرىسىن ارتتىرۋ، زاماناۋي تەحنولوگيانى ەنگىزۋ جانە ەرەكشە قاۋىپتى ينفەكتسيالارعا قاتىستى عىلىمي جوبالاردى جۇزەگە اسىرۋ قاجەتتىگىنە توقتالدى.

وتىرىسقا قاتىسۋشىلار بيولوگيالىق قاۋىپسىزدىك جۇيەسىن ودان ءارى جەتىلدىرۋ، مەملەكەتتىك ورگاندار اراسىنداعى ىنتىماقتاستىقتى كۇشەيتۋ جانە ىقتيمال بيولوگيالىق قاۋىپتەرگە دايىندىقتى ارتتىرۋدىڭ ماڭىزدىلىعىنا نازار اۋداردى. وتاندىق ۆاكسينا ءوندىرىسىن دامىتۋ، زەرتحانالاردى جاڭعىرتۋ جانە بىلىكتى ماماندار دايارلاۋ نەگىزگى باسىمدىقتار قاتارىنا جاتاتىنى ايتىلدى.