الەمدە جىلىنا 2 ميللياردقا جۋىق بالا زورلىق- زومبىلىققا ۇشىرايدى
بالالارعا زورلىق-زومبىلىق كورسەتۋ پروبلەماسى بۇكىل قوعامدى الاڭداتادى. الەم بويىنشا جىلىنا 2 ميللياردقا جۋىق كامەلەتكە تولماعان بالا زورلىق-زومبىلىققا ۇشىرايدى. بۇل تۋرالى الماتىدا «كامەلەتكە تولماعان قىلمىس قۇرباندارىنىڭ قۇقىقتارىن قورعاۋدىڭ وزەكتى ماسەلەلەرى» تاقىرىبىندا وتكەن حالىقارالىق عىلىمي-تاجىريبەلىك كونفەرەنسيادا زاڭگەر ورىنباسار تىلەپبەرگەنوۆ ايتتى.
كونفەرەنسيا بالالارعا قاتىستى تۇرمىستىق زورلىق- زومبىلىق، زورلاۋ، سەكسۋالدىق سيپاتتاعى قورلىق ارەكەتتەرى، بۋللينگ، كيبەربۋللينگ جانە بالا قۇقىقتارىن بۇزۋدىڭ باسقا دا نىساندارى سىندى قوعام الاڭداتۋشىلىعىن تۋدىراتىن وتكىر ماسەلەلەر اڭگىمە وزەگىنە اينالدى.
شارادا كامەلەتكە تولماعانداردىڭ قۇقىقتارى مەن بوستاندىقتارىن الەۋمەتتىك، قۇقىقتىق، پسيحولوگيالىق، مەديتسينالىق قورعاۋ تەتىكتەرىن جانە ولاردىڭ قاۋىپسىزدىگىن قامتاماسىز ەتۋگە باعىتتالعان ساراپشىلاردىڭ پىكىرلەرى مەن ۇسىنىستارى تىڭدالدى.
«يۋنەسكو-نىڭ جانە حالىقارالىق ۇيىمداردىڭ مالىمەتىنشە، بۇگىنگى تاڭدا الەم بويىنشا 2 ميللياردتان استام بالا ءار-ءتۇرلى جاعدايدا (جەڭىل، اۋىر ۇرىس، وتباسىلىق، اكە- انا تىيىمى دا جاتادى) زورلىق- زومبىلىق كورەدى ەكەن. قازاقستان دا بۇل جاعدايدا الەمدىك قاۋىمداستىقتاردىڭ مۇشەسى رەتىندە كامەلەت جاسىنا تولماعان بالالاردى قورعاۋ مەن ولاردىڭ قۇقىن قورعاۋ باعىتىندا قولدان كەلەر شارالاردى جۇزەگە اسىرىپ كەلەدى. بالا بولاشاعىمىز، كەلەشەگىمىز. سوندىقتان دا ولاردىڭ قاۋىپسىزدىگىن قاداعالاۋ باستى ماسەلە بولۋى ءتيىس»، - دەيدى زاڭگەر ورىنباسار تىلەپبەرگەنوۆ.
ايتۋىنشا، ءاربىر ءسابي ءۇشىن ەڭ قاۋىپسىز ورىن- ونىڭ ءۇيى، وتباسى. سوندىقتان ەڭ الدىمەن بالا قۇقىعىن اتا-اناسى قورعاۋى كەرەك.
