الەمدە العاش رەت سوعىپ تۇرعان جۇرەك ءساتتى اۋىستىرىلدى
استانا. KAZINFORM - تايۆان ۇلتتىق ۋنيۆەرسيتەتى اۋرۋحاناسىنىڭ (NTUH) حيرۋرگتەرى تاريحتا العاش رەت سوعىپ تۇرعان دونورلىق جۇرەكتى ءساتتى اۋىستىردى. بۇل تۋرالى Fox News حابارلادى.
ترانسپلانتاتسيا كەزىندە جۇرەك وتتەگىمەن قانىققان قاندى ۇزدىكسىز ايدادى. ءداستۇرلى جۇرەك ترانسپلانتاتسياسى كريوكونسەرۆاتسياعا (سۋىقتا ساقتاۋعا) نەگىزدەلگەن. مۇنداي جاعدايدا ورگانعا قان اعىمى توقتايدى، بۇل بىرنەشە ساعات بويى وتتەگىنەن ايىرىلعان جۇرەك بۇلشىقەتىنە زاقىم كەلتىرۋى مۇمكىن. مۇنداي ترانسپلانتاتسيادا دەنەنىڭ جۇرەكتى قابىلداماۋ قاۋپى بار.
وپەراتسيادان كەيىنگى اسقىنۋلاردى دا بايقاۋعا بولادى. بۇعان جول بەرمەۋ ءۇشىن NTUH حيرۋرگتەرى ورگاندارعا كۇتىم جاساۋدىڭ ارنايى جۇيەسىن ازىرلەدى. ول دونوردىڭ جۇرەگىنە وتتەگىمەن قانىققان قاندى ءۇزىلىسسىز نەمەسە توڭازىتقىشسىز جەتكىزەتىن پورتاتيۆتى ءومىردى قولداۋ قۇرىلعىسى رەتىندە جۇمىس ىستەيدى.
بۇل جۇيە سورعىلار، وكسيگەناتورلار جانە رەزەرۆۋارلار ارقىلى جۇرەكتىڭ دەنەدەن تىس جۇمىس ىستەۋىن قامتاماسىز ەتەدى.
- العاشقى وتا كەزىندە توپ ارنايى قۇرىلعىعا جالعانعان دونوردىڭ جۇرەگىن ءالى سوعىپ تۇرعان كەزدە وپەراتسيالىق بولمەلەر اراسىندا جىلجىتتى. جۇرەك ترانسپلانتاتسيالاعان پاتسيەنت - ديلاتاتسيون كارديوميوپاتياسى بار 49 جاستاعى ايەل تەز قالپىنا كەلدى جانە جۇرەك بۇلشىقەتى دەنساۋلىعىنىڭ نەگىزگى كورسەتكىشى سانالاتىن جۇرەك فەرمەنتتەرىنىڭ وتە تومەن دەڭگەيىن كورسەتتى، - دەلىنگەن حابارلامادا.
ستەنفورد ۋنيۆەرسيتەتى مۇنداي ترانسپلانتاتسيانى 2023-جىلى باستاعانىمەن، ولاردىڭ ءادىسى ورگاندى ترانسپلانتاتسيالاۋ كەزىندە قىسقا يشەميالىق كەزەڭدەردى (10-30 مينۋت) قامتىدى. ءبىراق تايۆان حيرۋرگتەرىنىڭ ادىسىمەن جاسالعان ترانسپلانتاتسيادا جۇرەك سوعۋىن ءبىر سەكۋندقا دا توقتاتقان جوق.
- جۇرەك ونى العانعا دەيىن دە، ودان كەيىن دە سوعۋىن جالعاستىردى جانە ول ەش توقتاعان جوق، - دەدى NTUH ورگان ترانسپلانتاتسياسى توبىنىڭ جەتەكشىسى چەن يح-شۋرنگ.
ەسكە سالا كەتەيىك، انگليانىڭ ۇلتتىق دەنساۋلىق ساقتاۋ قىزمەتى جۇمىسىن توقتاتقانىن جازعانبىز.
