الەمدە العاش رەت باۋىر قاتەرلى ىسىگىنىڭ سوڭعى ساتىسىنداعى ناۋقاس امان قالدى

گونكونگ ۋنيۆەرسيتەتىنىڭ دارىگەرلەرى الەمدە ءبىرىنشى بولىپ باۋىر وبىرىنىڭ سوڭعى ساتىسىنداعى ناۋقاستى امان الىپ قالدى.

Kazinform اگەنتتىگى بۇل تۋرالى تاسس اقپارات اگەنتتىگىنە سىلتەمە جاساپ حابارلايدى.

Standard گازەتىنىڭ حابارلاۋىنشا، ەر ادامعا بۇل اۋرۋدىڭ سوڭعى، ءتورتىنشى ساتىسى دياگنوزى 2022-جىلدىڭ قاراشاسىندا قويىلدى. ونىڭ باۋىرىندا كولەمى 18,2 سانتيمەتر ىسىك انىقتالدى، ال مەتاستازدار جاقىن ورنالاسقان تامىرلارعا ەنىپ ۇلگەرگەن. سونىمەن قاتار وتكىر تسيرروزعا بايلانىستى وعان دا تۇراقتى تۇردە اۋرۋحاناعا بارىپ تۇرۋ قاجەت بولدى.

دارىگەرلەر الدىمەن ىسىكتى وتاعا جارامدى مولشەرگە دەيىن ازايتۋ ءۇشىن التى اي بويى ارنايى تەراپيا جۇرگىزدى، سودان كەيىن ودان پايدا بولعان تامىردا ترومب ءتۇزىلۋىنىڭ الدىن الدى. تامىز ايىندا وعان ۇلىنىڭ باۋىرىنىڭ ءبىر بولىگىن اۋىستىرۋ وتاسى ءساتتى ءوتتى.

مەديتسينالىق مەكەمەدە ۇزاق باقىلاۋدان كەيىن ەر ادام اۋرۋحانادان شىعارىلدى: قازىرگى ۋاقىتتا وبىردىڭ ءبىرىنشى ساتىسىنا جاتاتىن 1,5 سانتيمەتر ىسىك ءالى دە بار، بۇل رەتتە الىنعان سىنامالار وبىر جاسۋشالارىنىڭ قالىپتاسۋ پروتسەسى جوق ەكەنىن كورسەتتى. بۇل ىسىكتەردى كىشىرەيتۋ جانە ترانسپلانتاتسيالاۋ ارقىلى اسقىنعان باۋىر وبىرىن ءساتتى ەمدەۋدىڭ الەمدەگى العاشقى جاعدايى بولدى.

دارىگەرلەردىڭ ايتۋىنشا، قازىرگى ۋاقىتتا ۇقساس دياگنوز قويىلعان 100 ناۋقاس ەمدەلۋدە، تەراپيا ناتيجەسىندە %40 ىندا قاتەرلى ىسىك جاسۋشالارىنىڭ تولىق جويىلعانى تىركەلدى، ال %10 دان استامىنا قازىر باۋىر ترانسپلانتاتسياسى وتاسىن جاساۋعا بولادى.

دارىگەرلەر ءقازىر ەمدەۋ ادىستەمەسىن جەڭىلدەتىپ، گونكونگ ۇكىمەتىنەن قاجەتتى ءدارى-دارمەككە سۋبسيديا ءبولۋدى سۇراپ جاتىر.