الەمدە 2024-جىلى قانداي تابيعي اپاتتار بولدى

استانا. قازاقپارات - Kazinform اگەنتتىگى 2024-جىلى الەمدە بولعان ەڭ ءىرى تابيعات اپاتتارعا شولۋىن ۇسىنادى.

ءىرى تابيعات اپات دەگەندە ەلىمىزدە كەيىنگى 80 جىلدا تىركەلمەگەن بيىلعى تاسقىندى ايتپاي كەتۋ مۇمكىن ەمەس. سالدارىنان ءبىر مەزگىلدە بىرنەشە وڭىردە جالعىز باسپانا بولىپ ەسەپتەلگەن 17,6 مىڭعا جۋىق ءۇي مەن ساياجاي قۇرىلىستارى سۋ استىندا قالىپ، 8447 ءۇي اپاتتى دەپ تانىلدى.

3,5 ايدىڭ ىشىندە تيپتىك جوبالار بويىنشا 2576 ءۇي سالىنىپ، قايتالاما نارىقتان 5767 ءۇي مەن پاتەر ساتىپ الىندى. سونىمەن قاتار، 9156 ءۇي جوندەلدى.

بيىل تاسقىن ابىگەرگە سالعان مەملەكەت تەك قازاقستان عانا ەمەس. ومان، ب ا ءا، يران جانە يەمەندە نوسەر جاۋىن 32 ادامنىڭ ءومىرىن قيدى.

ال اۋعانستان مەن پاكىستانداعى سۋ تاسقىنى 1100 دەن استام ادامنىڭ ءومىرىن قيىپ، ونداعان مىڭ ادام جاراقات الدى.

فيليپپيندە، قىتايدىڭ حاينان پروۆينتسياسى مەن ۆەتنامنىڭ سولتۇستىگىندە بولعان ياگي تايفۋنى جۇزدەگەن ادامنىڭ ءومىرىن جالماپ، 16,6 ميلليارد دوللار شىعىن اكەلدى.

سونداي-اق مەكسيكاداعى داۋىل مەملەكەتتى 2,5 ميلليارد دوللار شىعىنعا ۇشىراتتى.

ا ق ش- تاعى «ميلتون» داۋىلى فلوريدانى ابىگەرگە سالىپ، اپاتتىڭ ەكونوميكالىق شىعىنى 85 ميلليارد دوللارعا باعالاندى.

يندونەزيادا باتىس سۋماترانى سۋ باسىپ، 16 كوپىردى قيراتىپ، جولداردى ءبۇلدىردى، 19 ادام كوز جۇمدى. ال جۋىقتا عانا سۋكابۋمي ارالىندا قاتتى جاڭبىردان كەيىن 200 گە جۋىق اۋىلدى سۋ باسىپ قالدى.

وڭتۇستىك افريكادا قالىڭ قاردان ەلەكتر قۋاتى مەن سۋ قۇبىرى بۇزىلىپ، ەكى ادام ءۇسىپ ءولدى.

بوليۆيادا 10 ميلليون گەكتاردان استام جەردى شارپىعان ورمان ءورتى 12 مىڭنان استام وتباسىعا زيانىن تيگىزدى.

ب ۇ ۇ باس حاتشىسى انتونيو گۋتەرريش دۇنيەجۇزىلىك قورشاعان ورتانى قورعاۋ كۇنىنە وراي سويلەگەن سوزىندە ادامزاتتى تابيعاتتى ايالاپ ۇستاۋعا ۇندەدى.

- ءبىز جەر شارىمەن «ورىس رۋلەتكاسىن» ويناپ جۇرگەندەيمىز. كليمات توزاعىنا اپارا جاتقان جولدان شىعۋىمىز كەرەك. ءبىر جۇباناتىن جايت، كولىك تىزگىنى ءوز قولىمىزدا. وسى تىزگىندى ۇستاپ وتىرعان ۇكىمەتتەر، كاسىپورىندار، جالپى ادامزات دۇرىس جولدى تاڭداۋعا ءتيىس، - دەگەن ەدى ب ۇ ۇ باسشىسى.

وسىعان دەيىن «سوڭعى 30 جىلدا تابيعي اپاتتان ەڭ قاتتى زارداپ شەككەن ايماق — ازيا» اتتى تاقىرىپتا ماتەريال جاريالاعان ەدىك.