الماتىنىڭ تاۋ بوكتەرىندە قۇرىلىس جۇرگىزۋگە موراتوري ەنگىزىلە مە - دوسايەۆ جاۋابى

الماتى. KAZINFORM - بۇل سۇراققا الماتى اكىمى بوستاندىق اۋدانىنىڭ تۇرعىندارىمەن كەزدەسۋىندە جاۋاپ بەردى.

«ەرمەنساي» شاعىن اۋدانىنىڭ تۇرعىنى تاۋ بوكتەرىنە جاقىن اۋدانداردا تۇرعىن ءۇي كەشەندەرىن سالۋعا موراتوري ەنگىزۋدى ۇسىندى.

- بىزدە ينفراقۇرىلىم، جولدار، كولىك ماسەلەسىنە بايلانىستى سۇراقتار شەشىلمەي جاتىپ، تۇرعىن ءۇي سالۋدىڭ ءمانى جوق. مۇنداي تۇرعىن ۇيلەر وزدەرىنىڭ عانا ەمەس، بۇكىل «ەرمەنسايدىڭ» جاعدايىن ۋشىقتىرىپ وتىر، - دەدى تۇرعىن.

ەربولات دوسايەۆ جەكە اۋماققا موراتوري ەنگىزۋ قۇقىعى جوق ەكەنىن اتاپ ءوتتى.

- وكىنىشكە قاراي، مەن جەكە موراتوري ەنگىزە المايمىن، مەنىڭ اكىم رەتىندە ونداي قۇقىعىم جوق. ءبىراق بۇل ماسەلەنى باسقا جاعىنان شەشىپ جاتىرمىز. ءبىز قانشاما قۇرىلىس جوباسىنا رۇقسات بەرمەي قويدىق. قۇرىلىس باستاۋعا رۇقسات بەرمەگەندىكتەن ماعان قارسى ادامداردىڭ قاراسى كوبەيدى. قازىر ولار قۇرىلىس جۇرگىزۋدىڭ باسقا جولىن تاپتى - جەكە تۇرعىن ءۇي قۇرىلىسى رەتىندە راسىمدەيدى. از قاباتتى قۇرىلىس پەن جەكە تۇرعىن ءۇي قۇرىلىسىن ناقتى اجىراتا الۋ ءۇشىن ءبىز ونەركاسىپ جانە قۇرىلىس مينيسترلىگىنە ۇسىنىس ەنگىزدىك. ەندى زاڭ جۇزىندە بۇل نورمالار بەكىتىلەدى دەپ ۇمىتتەنەمىز، - دەدى شاھار باسشىسى.