الماتىنىڭ نەكە سارايى نەلىكتەن قاراۋسىز قالدى
الماتى. KAZINFORM - اباي داڭعىلىنىڭ بويىندا، الماتىنىڭ قاق ورتاسىندا ورنالاسقان نەكە سارايى قاراۋسىز بوس تۇر. جەرگىلىكتى ماڭىزى بار ساۋلەت ەسكەرتكىشىنە جاتاتىن عيماراتتىڭ بۇگىنگى جاعدايى ناشار.
تالاي وتباسى شاڭىراق كوتەرىپ، باقىت پەن شاتتىقتىڭ مەكەنى بولعان عيمارات 1971 -جىلى سالىنعان. الماتى بەلگىلەرىنىڭ بىرىنە اينالعان نىساننىڭ ساۋلەتشىلەرى - قازاقستاننىڭ ەڭبەك سىڭىرگەن ساۋلەتشىسى مالباعار مەڭدىقۇلوۆ پەن الەكساندر لەپپيك.
نەكە سارايىنىڭ سىرتىندا ونىڭ قىسقاشا تاريحى مەن عيماراتتىڭ مەملەكەت قورعاۋىندا ەكەنى جازىلعان. الايدا بۇگىنگى كۇنى نىساننىڭ سىمباتتى كەلبەتى بۇزىلا باستاعان. ءبىراز تۇستا عيماراتتىڭ قاسبەتى ۇگىتىلىپ قۇلاعان، اينالىسىنداعى باسپالداقتار سىنعان. ساراي اۋماعىندا قالىڭ ءشوپ ءوسىپ، ءتىپتى نىسانعا كەشكى ۋاقىتتا جارىق تۇسىرەتىن قۇرالداردىڭ ءبىرىن جاۋىپ قالعان.
قالاداعى تاريحي عيماراتتىڭ ناشار جاعدايىنا بايلانىستى الماتى اكىمدىگىنە ساۋال جولدادىق. اكىمدىكتىڭ باسپا ءسوز قىزمەتى 2016 -جىلى نەكە سارايى «التىن ءدان قازاقستان» كومپانياسىنا 20 جىلعا سەنىمگەرلىك باسقارۋعا بەرىلگەنىن، الايدا ارتىلعان مىندەتتەردىڭ تولىق ورىندالماۋىنان شارت سوت شەشىمىمەن بۇزىلعانىن حابارلادى.
- سەنىمگەرلىك باسقارۋشى مىندەتتەمەلەردى تولىق كولەمدە ورىنداماعاندىقتان، الماتى قالاسىنىڭ اكىمدىگى سەنىمگەرلىك باسقارۋ شارتىن مەرزىمىنەن بۇرىن بۇزۋ تۋرالى شەشىم قابىلدادى. كەلىسىمشارتتى بۇزۋ زاڭدى تارتىپتە جۇرگىزىلدى. الماتى قالالىق سوتىنىڭ قاۋلىسىمەن شەشىم زاڭدى كۇشىنە ەندى. نىسان الماتى قالاسى اكىمدىگىنىڭ باسقارماسىندا قالادى، نىساندى ودان ءارى پايدالانۋ ماسەلەسى پىسىقتالىپ جاتىر، - دەپ حابارلادى اكىمدىكتەن.
سونداي-اق شاھار باسشىلىعى «تاريحي- مادەني مۇرا وبەكتىلەرىن قورعاۋ جانە پايدالانۋ تۋرالى» قازاقستان رەسپۋبليكاسىنىڭ زاڭىنا سايكەس نەكە سارايىنىڭ اۋماعى اباتتاندىرىلاتىنىن مالىمدەدى. الايدا جۇمىستاردىڭ قاشان باستالاتىنى تۋرالى ناقتى مالىمەت بەرىلگەن جوق.
ەسكە سالايىق، الماتىدا بەيبىت جيىندار مەن شەرۋلەر وتكىزۋ ورىندارى وزگەردى.
