الماتىنىڭ جاڭا اكىمى قالا تۇرعىندارىنا ۇندەۋ جاسادى

الماتى. KAZINFORM - دارحان ساتىبالدى Instagram جەلىسىندەگى پاراقشاسىندا الماتىلىقتاردى بىرىگىپ جۇمىس ىستەۋگە شاقىردى.

ول الماتى قالاسىنىڭ اكىمى رەتىندەگى العاشقى جۇمىس كۇنى مەملەكەت باسشىسىنىڭ قابىلداۋىنان باستالعانىن اتاپ ءوتتى.

- پرەزيدەنت قاسىم-جومارت كەمەل ۇلى قالامىزدىڭ بولاشاعىنا قاتىستى ءبىرقاتار ماڭىزدى تاپسىرما جۇكتەدى. تۇراقتى ەكونوميكالىق وسىمگە قول جەتكىزۋ، قالانىڭ ينفراقۇرىلىمىن كەشەندى جاڭعىرتۋ، جول-كولىك جۇيەسىن جاقسارتۋ، ەكولوگيالىق ماسەلەلەردى شەشۋ مەن ەكونوميكانى ءارتاراپتاندىرۋ - الداعى جۇمىسىمىزدىڭ باستى باعىتتارى بولماق، - دەپ جازدى ول.

سونىمەن قاتار قالا اكىمى ءوزى ايتقان باسىم باعىتتاردى كەزەڭ- كەزەڭىمەن جۇيەلى تۇردە جۇزەگە اسىراتىنىن ايتتى.

- الماتى - ارمان مەن مۇمكىندىكتەر مەكەنى. بۇل شاھارعا شىنايى جاناشىرلىقپەن، تىڭ سەرپىنمەن، ناقتى ىسپەن قىزمەت ەتۋ - مەن ءۇشىن ۇلكەن مارتەبە. ءبىر جاعادان باس، ءبىر جەڭنەن قول شىعارىپ، بىرىگىپ، تىزە قوسىپ ەڭبەك ەتسەك، ارۋ قالامىزدى ودان ءارى كوركەيتە الامىز. اسەم الماتىنىڭ ءاربىر كوشەسى مەن ءار تۇرعىنى ءۇشىن ناقتى وزگەرىستەر جاساۋ، ايانباي قىزمەت ەتۋ - ءبىزدىڭ باستى مىندەتىمىز، - دەلىنگەن اكىم جازباسىندا.

اۆتور

دوسبول اتاجان