الماتىلىق دارىگەرلەر تاعى ءبىر ناۋقاستىڭ اياعىن 10 سانتيمەترگە ۇزارتتى
الماتى. KAZINFORM - الماتىلىق دارىگەرلەر وزدىگىمەن جۇرە الماي قالعان ناۋقاستىڭ جامباس بۋىندارىنا ەندوپروتەزدەۋ وپەراتسياسىن جاسادى.
الماتى قالالىق قوعامدىق دەنساۋلىق ساقتاۋ باسقارماسىنىڭ مالىمەتىنشە، 55 جاستاعى ناۋقاس جامباس سۇيەگى ايماعىنداعى اۋىرسىنۋ، ءجۇرىپ- تۇرۋىنىڭ قيىنداۋى مەن ءبىر اياعىنىڭ 10 س م-گە قىسقا بولۋىنا بايلانىستى ورتالىق قالالىق كلينيكالىق اۋرۋحاناسىنا جاتقىزىلعان.
«ناۋقاس جامباس موينىنىڭ ەسكى سىنۋىنىڭ سالدارىنان وڭ اياعىنىڭ 10 س م- گە قىسقارۋىنان زارداپ شەكتى. ۋاقىتىلى حيرۋرگيالىق ارالاسۋدىڭ بولماۋى سالدارىنان اياق ۋاقىت وتە كەلە قىسقارىپ، ناۋقاستىڭ ءومىر ءسۇرۋ ساپاسىن ەداۋىر ناشارلاتىپ، سوزىلمالى اۋىرسىنۋدى تۋدىردى جانە قوزعالىستى شەكتەدى»، - دەيدى تراۆماتولوگ داۋلەت چۋكمانوۆ
دارىگەردىڭ سوزىنشە، وپەراتسيا 1,5 ساعاتقا سوزىلدى.
«وتا ءساتتى ءوتتى، ناۋقاس قالپىنا كەلۋ پروتسەسىن باستادى. اياقتىڭ ۇزارۋى جانە ەندوپروتەزدى ورناتۋ ونىڭ قوزعالعىشتىعى مەن ءومىر ءسۇرۋ ساپاسىن ەداۋىر جاقسارتتى جانە قالىپتى فيزيكالىق بەلسەندىلىككە ورالۋعا جانە سوزىلمالى اۋىرسىنۋدان ارىلۋعا مۇمكىندىك بەردى»، - دەپ اتاپ ءوتتى داۋلەت چۋكمانوۆ.
بۇعان دەيىن وسىنداي دياگنوزبەن ءبىر ناۋقاسقا وپەراتسيا جاسالعانى تۋرالى جازعان ەدىك.
