الماتىلىق دارىگەرلەر ەر ادامعا بىردەن ءۇش وتا جاساپ، اياققا تۇرعىزدى

Алматылық дәрігерлер ер адамға бірден үш ота жасап, аяққа тұрғызды
فوتو: مۋحتور حولدوربەكوۆ/kazinform

الماتى. KAZINFORM - الماتىدا وڭ جاق جامباستىڭ ارتقى شىعۋى، وڭ جاق سان سۇيەگى باسىنىڭ اسەپتيكالىق نەكروزى، وڭ جاق تىزە بۋىنىنىڭ بۇگۋ كونتراكتۋراسى دياگنوزى قويىلعان ەر ادامعا بىردەن ءۇش وپەراتسيا جاسالدى.

الماتىدا ورتالىق قالالىق كلينيكالىق اۋرۋحاناعا 44 جاستاعى ەر ادام تۇسكەن. ناۋقاس سوڭعى 6 اي بويى ۇيىندە تۇرا الماي، تەك جاتقانىن ايتقان. ءجىتى كلينيكالىق تەكسەرىستەن سوڭ وعان ءبىر ۋاقىتتا ءۇش بىردەي وتا جاساۋ تۋرالى شەشىم قابىلداندى.

الماتى قالالىق قوعامدىق دەنساۋلىق ساقتاۋ باسقارماسىنىڭ مالىمەتىنشە، ناۋقاسقا ءبىرىنشى كەزەكتە ۇرشىق ويىعىنىڭ ارتقى قاباتىنداعى اقاۋدى ەسكەرە وتىرىپ، دارىگەرلەر وڭ جاق جامباس بۋىنىنا العاشقى- ريەۆيزيالىق ەندوپروتەزدەۋ جاسادى. ەكىنشى كەزەكتە تىزە بۋىنىنىڭ قالىپتى بۇگىلۋىن قامتاماسىز ەتۋ ءۇشىن تىزە بۋىنىنىڭ يىلگىش بايلامدارىن كەسۋ بولدى، سوڭعى ءۇشىنشى وتا - تىزە بۋىنىنىڭ بىرتە-بىرتە سوزىلۋىنا ارنالعان يليزاروۆ توپسالى- ءبىزدى- وزەكتى اپپاراتىن ورناتۋ جاسالدى.

كىشى جىلىكتىك جۇيكە نەيروپاتياسى جانە كومپارتمەنت-سيندرومى سياقتى قاۋىپتى اسقىنۋلارعا بايلانىستى دارىگەرلەر وتادان كەيىنگى كەزەڭدە تىزە بۋىنىنىڭ بىرتىندەپ كەڭەيۋىن قامتاماسىز ەتە وتىرىپ، وتانى ءساتتى ورىنداپ شىقتى.

«يليزاروۆ اپپاراتى كومەگىمەن كۇن سايىن تۇزەتۋ جۇرگىزىلدى. بۇل كۇتىلگەن ناتيجەگە قول جەتكىزۋگە مۇمكىندىك بەردى. التى اي ىشىندە ناۋقاستىڭ جۇيكە جۇيەسى مەن قان تامىرى يكەمدىلىگىن جوعالتقان ەدى. وتا اسقىنۋسىز ءوتىپ، ءساتتى اياقتالدى»، - دەدى قانات تاۋەكەلوۆ.

ايتا كەتەيىك، ناۋقاسقا كۇردەلى وتانى تراۆماتولوگ-ورتوپەدتەر قانات تاۋەكەلوۆ، ارمان ابدۋرازاكوۆ، رۋسلان توكۋشەۆ پەن انەستەزيولوگتار جاساپ شىقتى.

سوڭعى جاڭالىقتار