الماتىلىق دارىگەرلەر ۋكراينادان كەلگەن 92 جاستاعى اجەيدى اياعىنا تۇرعىزدى
الماتى. KAZINFORM - الماتىلىق تراۆماتولوگتار 92 جاستاعى اجەيدىڭ جامباس سۇيەگىنە وتا جاسادى.
الماتى قالالىق قوعامدىق دەنساۋلىق ساقتاۋ باسقارماسىنىڭ مالىمەتىنشە، ۋكراينالىق انتونينا لاۆرينەنكو الماتىعا نەمەرەسىنە قوناققا كەلگەن. تۇندە اجەي ءوز بولمەسىندە قۇلاپ، وڭ جاق سان سۇيەگىنىڭ جابىق ۇرشىقاستار سىنىعى اۋىر جاراقاتىن العان. مۇنداي جاعدايدا شۇعىل حيرۋرگيالىق ارالاسۋ قاجەت. بۇل جاعدايدا تراۆماتولوگتار سان سۇيەگى بولىكتەرىن ىشكى بەكىتۋ ارقىلى قايتا ورنالاستىرادى، ايتپەسە، پاتسيەنت قوزعالا الماي قالۋى مۇمكىن.
92 جاستاعى اجەي شەتەلدىك بولعان سوڭ، نەمەرەسى كومەك ىزدەپ بىرنەشە جەكە كلينيكاعا بارعان. جاسى مەن وتا كەزىندە اسقىنۋ قاۋپىنە بايلانىستى وتا جاساۋعا اجەيدى ەشكىم قابىلدماعان.
«اجەم قۇلاعان سوڭ ونى قالالىق تراۆماتولوگيالىق ورتالىقتىڭ بىرىنە اپارىپ، العاشقى مەديتسينالىق كومەك الدىق. اجەمنىڭ جاسىنا بايلانىستى وعان وتا جاساۋ ۇسىنىلمادى... بۇل رەتتە بارلىعى اجەمە وتا جاساۋعا كەڭەس بەردى، ءبىراق ونىڭ جاسىنا بايلانىستى بىردە-ءبىر جەكە كلينيكا ونى قابىلدامادى. ءبىز 4-قالالىق كلينيكالىق اۋرۋحاناعا حابارلاستىق. اۋرۋحانانىڭ دارىگەرلەرى مەن مەدبيكەلەرىنەن قۇرالعان بريگادانىڭ قاتاڭ باقىلاۋىمەن بۇكىل تاريحىمىزدى زەرتتەپ، تەكسەرىس، سىناقتاردان كەيىن اجەمدى ەمدەۋگە الدى. گامما وزەكتى پايدالانىپ، وڭ جاق سان سۇيەگى بولىكتەرىنىڭ جابىق رەپوزيتسياسى وتاسى جاسالدى. وتادان كەيىن ءبىر اپتادان سوڭ اجەمىز ارنايى ءجۇرىس ارباسىمەن جۇرە الدى. قابىلداۋ ءبولىمىنىڭ مەڭگەرۋشىسى حايرويەۆ ماگادين ميكايلوۆيچكە جانە 4-قالالىق كلينيكالىق اۋرۋحانانىڭ ۇجىمىنا كاسىبي شەبەرلىگى ءۇشىن كوپ راحمەت. ءبىر جارىم اي وتكەن سوڭ، بۇگىن بىزدە باقىلاۋ تەكسەرۋ بولدى. اجەم قازىر تاياقپەن جۇرە الادى. مىڭ العىس» - دەيدى نەمەرەسى تيمۋر.
4-قالالىق كلينيكالىق اۋرۋحاناعا 1932-جىلى تۋعان ناۋقاس وڭ جاق جامباس بۋىنى ايماعىنداعى اۋرۋ سەزىمىنە جانە وڭ اياقتىڭ تىرەك فۋنكتسياسىنىڭ بۇزىلۋىنا شاعىمدانىپ تۇسكەن. ناۋقاس جاراقاتتى ءبىر كۇن بۇرىن وڭ جاق جامباس بۋىنىنا قۇلاپ العان. دياگنوزى: سۇيەك بولىكتەرىنىڭ ىعىسۋىمەن وڭ جاق سان سۇيەگىنىڭ جابىق ۇرشىقاستار سىنۋى. ناۋقاس بىردەن ورتوپەديالىق حيرۋرگيا بولىمىنە حيرۋرگيالىق ەمدەۋگە جاتقىزىلدى.
«ناۋقاس اۋرۋحاناعا جاتقان كۇنى ءبىز وعان شۇعىل جامباس سۇيەگى بولىكتەرىنىڭ جابىق رەپوزيتسياسىن قۇلىپتاۋشى ينترامەدۋلليارلىق يمپلانتپەن ىشكى بەكىتۋ وتاسىن جاسادىق. وتا 1,5 ساعاتقا سوزىلدى. حاتتاماعا سايكەس، ناۋقاس اۋرۋحانا جاعدايىندا اياعىنا تۇرعىزىلدى، ول ءجۇرىس ارباسى كومەگىمەن قوزعالا باستادى. ءبىر اپتادان سوڭ جاعدايى جاقسارىپ، اجەي امبۋلاتورلىق ەمدەلۋگە ۇيگە شىعارىلدى»، - دەدى 4-قالالىق كلينيكالىق اۋرۋحانانىڭ قابىلداۋ ءبولىمىنىڭ مەڭگەرۋشىسى، تاجىريبەلى تراۆماتولوگ-ورتوپەد ماگادين حايرويەۆ.
وتانى قابىلداۋ ءبولىمىنىڭ مەڭگەرۋشىسى م. حايرويەۆ، اسسيستەنت تراۆماتولوگ-ورتوپەد ن. كيساكوۆ، انەستەزيولوگ-رەانيماتولوگ ا. بيجانوۆ، وتالىق مەدبيكە ر. اۋباكىروۆا جاسادى.
