الماتىلىق عالىمدار ەكولوگيانى تازارتۋدىڭ تىڭ ءادىسىن تاپتى
قازاق ۇلتتىق قىزدار پەداگوگيكالىق ۋنيۆەرسيتەتىنىڭ فيزيولوگ-گەنەتيكتەرى الماتى قالاسىنىڭ اۋاسىن تازارتۋدىڭ يننوۆاتسيالىق ءادىسىن ويلاپ تاپتى. ول ءۇشىن ءبىر توپ عالىم زياندى زاتتاردى بويىنا قارقىندى سىڭىرەتىن وسىمدىكتەردى وسىرمەك، دەپ حابارلايدى Kazinform.
قالا تۇرعىندارىنىڭ دەنساۋلىعى مەن ەكولوگيانى جاقسارتۋعا باعىتتالعان عىلىمي-وندىرىستىك جۇمىستار بيىل كوكتەمدە باستالادى.
وسىمدىكتەر الماتى وبلىسىنداعى كولدى اگروبيوستانساسىنىڭ بازاسىندا وسىرىلەدى. شامامەن 5 گەكتار جەرگە ارنايى سۇرىپتاۋدان وتكەن وسىمدىكتەر ەگىلىپ، ودان الىنعان كوشەتتەر اكىمدىكپەن اقىلداسا وتىرىپ، حالىق كوپ شوعىرلانعان اۋماقتارعا وتىرعىزىلادى.
«ءبىز قالادا جاسىل ارالدار ءوسىرۋدى جوسپارلاپ وتىرمىز. سوندا وسىمدىكتەر اۋانى زياندى قالدىقتاردان تابيعي جولمەن ءسۇزىپ، تازارتادى. بۇل ءتاسىل اسا ءتيىمدى. قورشاعان ورتانىڭ جاعدايىن ايتارلىقتاي جاقسارتىپ قانا قويماي، تۇرعىنداردىڭ دەنساۋلىعىنا دا پايدالى بولماق»، - دەيدى جوبا جەتەكشىسى، عالىم-فيزيولوگ اسقار قالەكەشوۆ.
كولدى اگروبيوستانساسى كەزدەيسوق تاڭدالىپ وتىرعان جوق. بۇرىن مۇندا بيولوگ زەرتتەۋشىلەر مەن بولاشاق بيولوگيا مۇعالىمدەرى زوولوگيا جانە بوتانيكا بويىنشا دالالىق زەرتتەۋ جۇمىستارىن جۇرگىزەتىن. ياعني پراكتيكالىق بازا بار.
اۋاداعى زياندى قالدىقتاردى قارقىندى سىڭىرەتىن وسىمدىكتەردى وسىرۋدەن بولەك، ادام اعزاسىن تازارتاتىن بيولوگيالىق بەلسەندى پرەپاراتتار دا دايىندالادى. ول ءۇشىن عالىمدار شىعىس قازاقستان وبلىسىنا ارنايى ەكسپەديتسيامەن اتتانادى.
سونداعى ەمدىك وسىمدىكتەردى، اتاپ ايتقاندا التاي ءۇشقاتىن الماتى وبلىسىنا جەرسىندىرۋ ارقىلى الىنعان ءونىمدى اعزانى ساۋىقتىرۋعا پايدالانادى.
اۋانى تازارتۋمەن اينالىساتىن توپتىڭ قۇرامىندا ەكولوگتار، فيزيولوگ-گەنەتيكتەر، دوكتورانتتار بولادى. عالىمدار 2024-جىلى 500 گە جۋىق كوشەت الۋدى جوسپارلاپ وتىر. ال 2025 تە الماتىنى كوگالداندىرۋعا كىرىسپەك. زەرتتەۋ گەنەتيكا جانە فيزيولوگيا عىلىمي زەرتتەۋ ينستيتۋتىمەن بىرلەسىپ جۇرگىزىلەدى.
ايتا كەتەيىك، الماتىنىڭ اۋاسىن تازارتۋ بويىنشا عىلىمي زەرتتەۋ قازاق ۇلتتىق قىزدار پەداگوگيكالىق ۋنيۆەرسيتەتىنىڭ ەسەبىنەن قارجىلاندىرىلادى.
