الماتىلىق بۇلدىرشىندەر اياز اتانىڭ كيىز ۇيىنە بارا الادى

استانا. KAZINFORM - الماتىدا اياز اتانىڭ ۇلتتىق ستيلدە بەزەندىرىلگەن مەرەكەلىك كيىز ۇيلەرى پايدا بولدى. بۇل تۋرالى قالا اكىمدىگى ءمالىم ەتتى.

ولار قالانىڭ ءۇش كورنەكتى جەرىندە: استانا جانە اباي اتىنداعى الاڭداردا جانە ارباتتا ورناتىلعان.

- اياز اتا قوناقتاردى قارسى الاتىن كيىز ۇيلەردىڭ ەسىگى كەلۋشىلەر ءۇشىن كۇن سايىن ساعات 15:00 دەن 21:00 گە دەيىن اشىق بولادى. قالا تۇرعىندارى مەن قوناقتارى 31 -جەلتوقسانعا دەيىن جاڭا جىلدىڭ باستى كەيىپكەرىمەن سۋرەتكە ءتۇسىپ، قۋانىش پەن عاجايىپتار اتموسفەراسىنا ەنە الادى. 31 -جەلتوقساندا كيىز ۇيلەر استانا الاڭىندا ءتۇن ورتاسىنا دەيىن جۇمىس ىستەيتىن بولادى، ال 2025 -جىلدىڭ باستالۋ ساتىندە مۇندا جاڭا جىلدىق كونسەرتتەن كەيىن وتشاشۋ بولادى، - دەلىنگەن اكىمدىك حابارلاماسىندا.

جاڭا جىلعا دەيىنگى قالعان كۇندەردە كيىز ۇيلەردىڭ جانىندا ءتۇرلى شىعارماشىلىق شەبەرحانالار، قىزىقتى ويىندار، بەزەندىرىلگەن ساحنالاردا جاندى قويىلىمدار جانە سۇيىكتى جاڭا جىلدىق كەيىپكەرلەرمەن كەزدەسۋلەر وتەدى.

شەبەرلەر مەن قولونەرشىلەر بۇكىل وتباسى ءۇشىن شەبەرلىك ساباقتارىن وتكىزەدى، وندا قوناقتار ءوز قولدارىمەن ەرەكشە جاڭا جىلدىق ويىنشىقتار جاساي الادى. اعاش شىرشا ويىنشىقتارىن بەزەندىرۋ، كرۋجكالاردى جارقىن سۋرەتتەرمەن جانە ساندىك ەلەمەنتتەرمەن بەزەندىرۋ، مۋزىكالىق قوراپتار جاساۋ جانە جاڭا جىلدىق تاقىرىپتا گيپس فيگۋرالارىن جانداندىرۋ مۇمكىن بولادى. بۇل ساباقتار بارلىعىنا وزدەرىن ناعىز شەبەر رەتىندە سەزىنۋگە جانە مەرەكەنىڭ ءبىر بولىگىن وزدەرىمەن بىرگە الىپ كەتۋگە مۇمكىندىك بەرەدى.

ەسكە سالساق، وسىعان دەيىن الماتىدا قوعامدىق كولىكتەر مەرەكەگە ساي بەزەندىرىلگەنىن جازدىق.