الماتىدان قىزىلورداعا دەيىنگى تازا قازاقستان-ەستافەتاسى باستالدى
استانا. KAZINFORM - الماتى وبلىسى تارعاپ اۋىلى تۇسىنداعى كەمپينگ-الاڭدا اۋقىمدى ەكولوگيالىق باستاما - «Taza Qazaqstan» road-ەستافەتاسىنىڭ اشىلۋ ءوتتى، دەپ حابارلايدى ەكولوگيا جانە تابيعي رەسۋرستار مينيسترلىگى.
ءبىر اپتاعا جالعاساتىن اۋقىمدى ءىس- شارا بارىسىندا قاتىسۋشىلار الماتى، شىمكەنت قالالارى جانە جامبىل، تۇركىستان، قىزىلوردا وبلىستارى ارقىلى مىڭ شاقىرىمنان استام جولدى ەڭسەرەدى. اكتسيانىڭ باستى ماقساتى - قوعامدا جاڭا ەكولوگيالىق مادەنيەت قالىپتاستىرۋ، تابيعات پەن تاريحي مۇراعا قۇرمەتپەن قاراۋ جانە ازاماتتاردىڭ قورشاعان ورتا الدىنداعى جاۋاپكەرشىلىگىن ارتتىرۋ.
ەستافەتا اياسىندا تەك قوقىس جيناۋ عانا ەمەس، دەپۋتاتتاردىڭ حالىقپەن كەزدەسۋلەرى، جاستارعا ارنالعان open-air ءىس-شارالارى، قوعامدىق قابىلداۋلار جانە تازا اۋادا «چەمپيوندىق رۋح» جاتتىعۋلارى وتەدى. سونىمەن قاتار «ۆانداليزمگە جول جوق!» جوباسى شەڭبەرىندە «تۇلعالار تۇعىرى» مەموريالدىق كەشەنى، «اقىرتاس» ساراي كەشەنى، «بىرلىك» مونۋمەنتى جانە ەجەلگى ساۋران قالاشىعى سياقتى تاريحي نىساندار تازارتىلىپ، اباتتاندىرىلادى. وسىلايشا road-ەستافەتا تابيعاتتى قورعاۋ، مادەني مۇرانى ساقتاۋ جانە ەكولوگيالىق پاتريوتيزمدى قالىپتاستىرۋ مىندەتتەرىن توعىستىرادى.
«مەملەكەت باسشىسى ەگەر وسىنداي بەلسەندى جۇمىستى جالعاستىرا بەرسەك، قازاقستان ناعىز جاسىل ەل بولاتىنىن ايتتى. سوندىقتان قورشاعان ورتانى قورعاۋ، وعان ۇقىپتى قاراۋ تەك مىندەت قانا ەمەس، كۇندەلىكتى ءومىر سالتىمىزدىڭ اجىراماس بولىگىنە اينالۋى ءتيىس»، - دەپ اتاپ ءوتتى ەكولوگيا جانە تابيعي رەسۋرستار ۆيتسە-ءمينيسترى مانسۇر وشۋربايەۆ.
اكسيا اياسىندا بەلسەندىلەر مەن ۆولونتەرلەر جول جيەگىن، اۆتوتۇراقتار مەن كەمپينگ اۋماقتارىن تازالايدى. جۇمىس كۆادروكوپتەرلەر ارقىلى جۇرگىزىلگەن اەروبارلاۋ دەرەكتەرىنە سۇيەنە وتىرىپ ۇيىمداستىرىلادى. جينالعان قوقىس پوليگوندارعا جەتكىزىلمەك.
