الماتىداعى سوڭعى جەر سىلكىنىستەرىن جاپون عالىمدارى زەرتتەيدى
استانا. KAZINFORM - سىرتقى ىستەر مينيسترلىگىنىڭ جانىنداعى KazAID قازاقستاندىق حالىقارالىق دامۋ اگەنتتىگى جاپون عالىمدارىن الماتىداعى جەر سىلكىنىسىن زەرتتەۋگە شاقىرىپ وتىر.
بۇل تۋرالى ۆەدومستۆونىڭ رەسمي وكىلى ايبەك سمادياروۆ ايتتى.
«2024-جىلعى 16-19-ءساۋىر ارالىعىندا قازاقستان رەسپۋبليكاسى سىرتقى ىستەر مينيسترلىگىنىڭ جانىنداعى KazAID قازاقستاندىق حالىقارالىق دامۋ اگەنتتىگى الماتى قالاسىندا سەيسميكالىق قاۋىپسىزدىك ماسەلەلەرى بويىنشا جاپون ماماندارىنىڭ قاتىسۋىمەن ارنايى سەمينار ۇيىمداستىرادى. ءىس-شارانى جاپونيانىڭ JICA حالىقارالىق دامۋ اگەنتتىگى، قازاقستاننىڭ قۇرىلىس سالاسىنداعى عىلىمي زەرتتەۋ جانە جوبالاۋ ينستيتۋتى، سونداي-اق، توتەنشە جاعدايلار جانە تابيعي اپاتتار قاۋپىن ازايتۋ ورتالىعى بىرلەسىپ ۇيىمداستىرادى»، - دەدى ول مينيسترلىكتىڭ باسپا ءسوز ءماسليحاتىندا.
ايبەك سمادياروۆتىڭ سوزىنشە، جاپون ماماندارى ورتالىق ازيانىڭ جانە كاۆكاز ەلدەرىنىڭ وكىلدەرىمەن سەيسميكالىق قاۋىپسىزدىك سالاسىنداعى تاجريبەسىن ءبولىسىپ، سەيسميكالىق وقشاۋلاۋ سالاسىنداعى وزىق تەحنولوگيالار مەن ستاندارتتار تۋرالى پىكىر الماسىپ، سەيسميكالىق قۇرىلىستاعى الەۋەتتى ىنتىماقتاستىقتى تالقىلايدى.
«سونداي-اق، ساراپشىلار الماتى جانە نوتو قالالارىنداعى سوڭعى جەر سىلكىنىستەرىن زەرتتەيدى. بۇل بولاشاقتا سەيسميكالىق تاۋەكەلدەردىڭ الدىن الۋ ستراتەگيالارىن ازىرلەۋگە ءوز سەپتىگىن تيگىزەدى»، - دەدى س ءى م رەسمي وكىلى.
