الماتىداعى سۋبۇرقاقتار قاي كۇنى ىسكە قوسىلادى
الماتى. KAZINFORM - وڭتۇستىك استانادا 1-مامىر كۇنى 60 فونتان ىسكە قوسىلادى. الماتى اكىمدىگىنىڭ مالىمەتىنشە، قالادا 66 كوممۋنالدىق سۋبۇرقاق بار. ونىڭ التاۋى جاڭارتىلىپ جاتىر.
«ودۋۆانچيك»، «اققۋ»، «قىزعالداق» سۋبۇرقاقتارى مەن ورتالىق مەملەكەتتىك مۇراجايى، ءال-فارابي اتىنداعى قاز ۇ ۋ جانە اۋەزوۆ اتىنداعى قازاق ۇلتتىق اكادەميالىق دراما تەاترى الدىنداعى فونتاندارعا جوندەۋ جۇمىستارى ءجۇرىپ جاتىر»، - دەپ حابارلادى قالالىق اكىمدىكتەن.
«الماتى - ورتاق ءۇيىمىز» اكسياسى اياسىندا سۋبۇرقاقتاردىڭ توستاعاندارىن، ءتۇبىن، قابىرعالارىن تازارتۋ جانە گرانيتتى پليتالاردى قالپىنا كەلتىرۋ جۇمىستارى جۇرگىزىلدى.
«ماماندار سۋبۇرقاقتاردىڭ ساندىك ەلەمەنتتەرىن سىرلاپ، ەلەكتر جابدىقتارى مەن سورعىلارىن، ەلەكتر جەلىلەرىن، سۋىق سۋمەن جابدىقتاۋ جانە كارىز جۇيەسىن تەكسەردى. كوممۋنالدىق قىزمەت كورسەتۋشىلەرمەن سۋمەن جابدىقتاۋ جانە ەلەكترمەن جابدىقتاۋ جۇيەلەرى قايتا ىسكە قوسىلدى. دايىندىق جۇمىستارى بارىسىندا اپاتتى ايماقتار دا انىقتالدى، قازىر سۋ جانە ەلەكتر جەلىلەرىن قالپىنا كەلتىرۋ جۇمىستارى اياقتالىپ قالدى»، - دەپ اتاپ ءوتتى الماتى اكىمدىگىنىڭ باسپا ءسوز قىزمەتى.
ءاربىر فونتاندا قاۋىپسىزدىكتى ساقتاۋ ماقساتىندا شومىلۋعا بولمايتىنى تۋرالى تاقتايشالار ورناتىلعان.
اۆتور
الما مۇقانوۆا
