الماتىداعى ەڭ كونە بازار جىل سوڭىنا دەيىن جاڭارتىلادى

الماتى. KAZINFORM - ەربولات دوسايەۆ تۇركسىب اۋدانىندا ورنالاسقان «الماتى-1» بازارىن جاڭعىرتۋ جۇمىستارىنىڭ بارىسىمەن تانىستى.

«الماتى-1» بازارى 1938 -جىلدان باستاپ جۇمىس ىستەيدى. اۋدانى 7 مىڭ شارشى مەتر، وندا جىلىتۋ جانە ينجەنەرلىك جەلىگە قوسىلماعان كونتەينەرلىك تيپتەگى 570 ساۋدا نۇكتەسى بار. وتكەن عاسىردىڭ 40-50-جىلدارىندا سالىنعان بازار عيماراتتارى توزعان جانە قاۋىپسىزدىك ستاندارتىنا سايكەس كەلمەيدى.

«بازاردى جاڭعىرتۋ اياسىندا ساۋداگەرلەر مەن كەلۋشىلەر ءۇشىن سونىڭ ىشىندە تەز بۇزىلاتىن ونىمدەردى ساقتاۋعا جانە جىلۋمەن قامتاماسىز ەتۋگە ارنالعان توڭازىتقىش كامەرالارى ءۇشىن قولايلى جاعداي جاسالادى. سونداي-اق جوبادا ليفتتەر، ەسكالاتورلار، جەر استى جانە جەر ءۇستى اۆتوتۇراقتار، مەيرامحانا اۋلاسى، جاياۋ جۇرگىنشىلەر ايماعى جانە تاعى باسقاسى كوزدەلگەن»، - دەپ اتاپ ءوتتى اكىمدىكتەن.

ءبىرىنشى كورپۋستىڭ ءبىرىنشى جانە ەكىنشى قاباتتارىنىڭ مەتالل قاڭقاسى تۇرعىزىلدى. ەدەن ارالىق بەتون قۇيۋ اياقتالدى. قازىرگى ۋاقىتتا باسپالداق سالىنىپ جاتىر. اۆتونومدى گاز قازاندىعىن مونتاجداۋ جۇمىستارى باستالدى.

قالا اكىمىنىڭ تاپسىرماسىنا سايكەس، ساۋداگەرلەر كونتەينەرلەردەن كوشىرىلەتىن ءبىرىنشى كورپۋستىڭ قۇرىلىسى وسى جىلدىڭ سوڭىنا دەيىن اياقتالۋعا ءتيىس.

جالپى، كەشەنگە ازىق-تۇلىك جانە كيىم-كەشەك بازارلارى، جالعا الۋشىلارعا ارنالعان ويىن الاڭدارى، مەيرامحانالار، اكىمشىلىك ءبولىم، حالىققا قىزمەت كورسەتۋگە ارنالعان باسقا دا ايماقتار، تيەۋ- ءتۇسىرۋ كىرەبەرىستەرى، جەر استى پاركينگى كىرەدى. جەكە ينۆەستيسيالاردىڭ جالپى سوماسى 7,3 ميلليارد تەڭگەدەن اسادى.

2021 -جىلى الماتىدا «راحات ك ز» بازارلارى مەن «الاتاۋ» بازارىنىڭ 4 بلوگى كۇردەلى جوندەۋدەن ءوتتى.

بۇگىندە قالادا ساۋدا قىزمەتىن رەتتەۋ تۋرالى زاڭعا سايكەس 33 بازار جاڭعىرتىلدى، تاعى توعىسىندا 2025 -جىلعا دەيىن جۇمىس اياقتالۋعا ءتيىس.

2022 -جىلدىڭ اقپانىندا مەملەكەت باسشىسى قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا ەلدەگى بازارلاردىڭ جۇمىسىن زاڭنامالىق تۇرعىدان رەتتەۋدى تاپسىرعان بولاتىن.

«ساۋدا-ساتتىقتاعى ءتيىمسىز دەلدالدىققا توقتاۋ سالاتىن كەز كەلدى. مىسالى، 3 ميلليون ادام تۇراتىن الماتى قالاسى مەن ونىڭ توڭىرەگىندەگى ەلدى مەكەن تۇرعىندارى تۇتىنۋ تاۋارلارىن كوبىنە «التىن وردا» بازارىنان الادى. الماتى وبلىسى مەن الماتى قالاسىنىڭ اكىمدەرىنە ۇكىمەتپەن بىرلەسىپ، بازاردا ءتارتىپ ورناتۋدى تاپسىرامىن. بۇل جەر پايداكۇنەمدەر ءۇشىن ناعىز مايشەلپەككە اينالعان. بۇعان الامتىداعى قاڭتار وقييعاسى كەزىندە انىق كوز جەتكىزدىك»، - دەگەن ەدى مەملەكەت باسشىسى.

اۆتور

الما مۇقانوۆا