الماتىداعى كوك بازار جاڭارتىلادى
«كوك بازاردى» مودەرنيزاتسيالاۋ باستالدى. بۇل تۋرالى قالا اكىمى ەربولات دوسايەۆ مەدەۋ اۋدانى تۇرعىندارىمەن كەزدەسۋىندە ايتتى، دەپ حابارلايدى قازاقپارات ءتىلشىسى.

«جەلىلەردى رەكونسترۋكتسيالاۋ، ورتالىق كىرەبەرىستىڭ الدىنداعى بەتون جابىندىسىن جاڭارتۋ، تىرەك كونسترۋكتسيالارىن كۇشەيتۋ، اۋماقتى اباتتاندىرۋ جوسپاردا. بۇل جۇمىستار 2024-جىلدىڭ سوڭىنا دەيىن اياقتالادى»، - دەدى قالا باسشىسى.
ايتۋىنشا، قالا تۇرعىندارى مەن تۋريستەر ءجيى باراتىن تانىمال ورىننىڭ ءبىرى بولعاندىقتان، مودەرنيزاتسيا كەزىندە بازار جابىلمايدى. جۇمىس شاعىن اۋماقتاردا جۇرگىزىلەدى. رەكونسترۋكتسيا شىعىنىن بازار يەسى كوتەرەدى. سونىمەن قاتار ول قازان ايىندا وقۋشىلار سارايىن مودەرنيزاتسيالاۋدىڭ ەكىنشى كەزەڭى اياقتالاتىنىن اتاپ ءوتتى.
«جاڭعىرتۋ اياسىندا جىلىتۋ، جەلدەتۋ جانە اۋانى باپتاۋ، سۋمەن جابدىقتاۋ جانە كارىز جۇيەلەرىن اۋىستىرۋ، جاڭا ترانسفورماتورلىق پودستانتسيا ورناتۋ جۇمىستارى جۇرگىزىلىپ جاتىر. جۇمىس قازان ايىنىڭ سوڭىنا دەيىن اياقتالادى. سونىمەن قاتار، وبسەرۆاتوريادا جوندەۋ جۇمىستارى جاسالىپ، جاڭا ليفت پەن تەلەسكوپ ورناتىلادى. بۇل 2023-جىلدىڭ جەلتوقسان ايىندا بىتەدى»، - دەدى اكىم.