الماتىداعى جەر سىلكىنىسى تۋرالى جالعان اقپارات تاراتقاندار ىزدەستىرىلىپ جاتىر

الماتىداعى پوليتسيا قىزمەتكەرلەرى جەر سىلكىنىسى تۋرالى جالعان اقپارات تاراتۋشىلاردى ىزدەستىرىپ جاتىر.

قۇقىق قورعاۋ ورگاندارى كەشە تۇندە قوعامدا نەگىزسىز دۇربەلەڭ مەن ۇرەي تۋدىرعان جالعان حابارلاردىڭ اۆتورلارىن انىقتاپ جاتقانىن ايتتى.

«جالعان اقپارات تاراتقانى ءۇشىن قىلمىستىق جاۋاپكەرشىلىك قاراستىرىلعان»، - دەپ ەسكەرتتى پوليتسيا دەپارتامەنتى.

ءتارتىپ ساقشىلارى ازاماتتاردى تەك رەسمي اقپارات كوزدەرىنەن الىنعان اقپاراتقا سەنۋگە شاقىردى.

ەسكە سالايىق، 23- قاڭتاردا الماتىدا جەر سىلكىنىسى بولدى. قازاقستان رەسپۋبليكاسى توتەنشە جاعدايلار مينيسترلىگى سەيسميكالىق ستانسيالار جەلىسى الماتى ۋاقىتى بويىنشا ساعات 2024-جىلعى 23- قاڭتاردا ساعات 00:09:02 دە (2024-جىلعى 22- قاڭتاردا گرينۆيچ بويىنشا 18 ساعات 09 مينۋت 02 سەكۋند) جەر سىلكىنىسى تىركەلگەنىن حابارلادى. جەر سىلكىنىسى MSK-64 شكالاسى بويىنشا الماتىدا 5 بال، شىمكەنت 2 بال بولىپ سەزىلگەن.

ارتىنشا جەر سىلكىنىسى تاعى دا سەزىلدى. كوپ ۇزاماي جەر سىلكىنىسىنىڭ ءۇشىنشى تولقىنى سەزىلدى.

سەيسميكالىق بولجاۋ كوميسسياسى الماتىداعى جاعداي بويىنشا قورىتىندى جاسادى. سەيسمولوگيالىق باقىلاۋلار مەن زەرتتەۋلەردىڭ ۇلتتىق عىلىمي ورتالىعىنىڭ بازاسىندا كوميسسيا الماتى بولجامدىق پوليگونىنىڭ اۋماعىنداعى سەيسميكالىق جاعدايعا باعالاۋ جۇرگىزەدى. ونىڭ قورىتىندىسى بويىنشا كوميسسيانىڭ كەزەكتەن تىس وتىرىسىنىڭ حاتتاماسى دايىندالادى.

«كوميسسيانىڭ قورىتىندىسىنا سايكەس كۇشتى جانە جويقىن جەر سىلكىنىسى كۇتىلمەيدى»، - دەپ جازىلعان حابارلامادا.

مەملەكەت باسشىسى قاسىم-جومارت توقايەۆ الدىن الا جوسپارلانعان جۇمىس كەستەسىنە سايكەس 24-25- قاڭتار كۇندەرى الماتىعا بارادى. بۇل تۋرالى پرەزيدەنتتىڭ باسپا ءسوز حاتشىسى بەرىك ءۋالي حابارلادى.

پرەزيدەنت مەگاپوليستەگى ءبىرقاتار نىساندى ارالايدى. سونىڭ ىشىندە قاڭتار وقيعاسىنان كەيىن كۇردەلى جوندەۋدەن وتكەن اكىمدىك عيماراتىنا بارىپ، قالاداعى جاعدايعا بايلانىستى جيىن وتكىزەدى.

الماتى قالالىق پوليتسيا دەپارتامەنتىنىڭ قىزمەتتەرى مەن بولىمشەلەرى قىزمەتتىڭ كۇشەيتىلگەن نۇسقاسىنا كوشىرىلدى. قالاداعى جاعداي تۇراقتى.

Massaget.kz