الماتىداعى جەر سىلكىنىسى: مەكتەپتەردە نە بولىپ جاتىر؟

استانا. KAZINFORM - الماتىداعى جەر سىلكىنىسى تاعى ءبىر مارتە ءدۇيىم ەلدى ءدۇر سىلكىندىردى. قالا كوشەلەرىندە كولىك كەپتەلىسى باستالىپ، بۇقارا باس ساۋعالاۋ ءۇشىن قالانىڭ سىرتىنا قاراي اسىقتى.

جۇمىس كۇنى بولعاندىقتان مەكەمە قىزمەتكەرلەرى دە جۇمىس ورىندارىن تاستاپ تىسقا شىققان. ال ءبىلىم وردالارىنداعى جاعداي قالاي؟ مەكتەپ وقۋشىلارى سىنىپتى تاستاپ سىرتقا شىعىپ ۇلگەردى مە؟

Massaget.kz تىلشىسى قالاداعى 8-مەكتەپ-گيمنازياعا بارىپ ءمان-جايدى ءبىلىپ قايتتى.

ءبىز بارعان ءبىلىم ورداسىنىڭ الدى ىعى-جىعى. بايقاعانىمىز، باستاۋىش سىنىپ وقۋشىلارى ەسىك الدىندا ءورىپ ءجۇر. مەكتەپ مۇعالىمدەرى مە، جوق الدە كوشەدەگى ەرىكتىلەرمە كەيبىر وقۋشىلارعا جامىلعى بەرىپتى.

جەتكىنشەكتەردىڭ ارقاسىنان ساباق سومكەسىن بايقامادىق. دەسەك تە ءبىر پاكەت اياق كيىمدى ۇستازدار ۇستاپ شىعىپتى.

بۇل مەكتەپتىڭ ىرگەتاسى 1967-جىلى قالانعان. 2013-جىلى سەيسميكالىق تەكسەرىستەن وتكەن. ءبىلىم ورداسىنىڭ 4 قاپتالىنان دا تىسقا شىعار ەسىك سالىنىپتى.

ۇستازدار وقۋشىلاردىڭ بۇعان دەيىن توتەنشە جاعداي كەزىندە قالاي ارەكەت ەتۋ كەرەكتىگى جونىندە بىرنەشە مارتە تاجىريبە جاسالعانى تۋرالى ايتتى.

8- مەكتەپ-گيمنازيا كوممۋنالدىق مەكەمەنىڭ باسشىسى ارداق سماعۇلوۆا 700 گە تارتا وقۋشىنىڭ 1 مينۋت 20 سەكۋندتا دالاعا شىعىپ ۇلگەرگەنىن ايتتى.

«قازىرگى ۋاقىتتا عيماراتتا ەشقانداي اقاۋ جوق. 1-اۋىسىمنىڭ بالالارى 1 مينۋت 20 سەكۋندتىڭ ىشىندە دالاعا مۇعالىمدەرمەن بىرگە سپورت الاڭىنا شىعارىلدى. ءبىراق كوپ بالالار وزدەرىنىڭ سىرت كيىمىن كيىپ ۇلگەرمەدى. ءبىر وتباسى ەۆاكۋاتسيالاۋ پۋنكتىندە قالىپ جاتىر. ولار مەكتەپتىڭ قاسىنداعى كوپقاباتتى ۇيدە تۇرادى ەكەن. ءبىز سۋدى، ءشايدى بارلىعىن دايىنداپ وتىرمىز. ۇيلەرىندە قالۋعا قورىققان جاندارعا كەلۋگە بولادى»، - دەيدى مەكتەپ باسشىسى.

ءبىرىنشى اۋىسىمدا باستاۋىش سىنىپتارى مەن 8-11- سىنىپتاردىڭ بالالارى وقيدى ەكەن. سونداي-اق 73 ۇستاز قىزمەت اتقارادى. بالالار ساباق قۇرالدارىن قالدىرىپ بىردەن دالاعا جۇگىرگەن ەكەن.

مەكتەپ باسشىلىعى الگوريتم بويىنشا جۇمىس ىستەپ جاتقاندارىن ايتتى. بۇگىن ساباق بولمايتىنىن كەسىپ ايتتى. الايدا ەرتەڭ وقۋشىلار مەكتەپكە كەلە مە، ونلاين وقي ما ول جاعى ناقتى بەلگىسىز.