الماتىداعى ءورت: يەمەننەن كەلگەن ستۋدەنتتەر وقيعا تۋرالى ايتىپ بەردى
الماتىداعى حوستەلدە تۇرىپ جاتقان ستۋدەنتتەر ءورت باستالعان كەزدە عيماراتتان قالاي شىققانىن ايتىپ بەردى، دەپ حابارلايدى Kazinform.
«ءورت بولىپ جاتقانىن ەستىپ، قۇجاتتارىمىزدى، كيىمدەرىمىزدى الىپ شىقتىق. ءورت شىققانىن ەستىگەندە قاتتى ۋايىمدادىم. ءبىرىنشى قاباتتا تۇرامىن. قاسىمداعىلار دا امان. بولمەمىز سىرتقى ەسىككە جاقىن ورنالاسقان. شىعا الماعاندار، تەرەزەدەن شىقتى. كەيبىرىنىڭ قۇجاتى ىشتە قالدى. مەن ءوزىم يەمەننەن كەلدىم. بۇل جەردە تۇرىپ جاتقانىما كوپ ۋاقىت بولمادى»، - دەيدى ستۋدەنت.
تاعى ءبىر شەتەلدىك ستۋدەنت جاتاقحانادان شىعۋ ءۇشىن تەرەزەنى سىندىرعانىن ايتتى.
«ءبىزدىڭ بولمەدە ءتۇتىننىڭ ءيىسى قاتتى بولدى. جانىمىزداعى ادامداردىڭ جاعدايى اۋىر ەدى. وزىممەن بىرگە كەرەك دۇنيەلەرىمىزدى الىپ ۇلگەرە المادىم. بۇل حوستەلگە كەلگەنىمە ءبىر كۇن عانا بولدى. كەشە كەشكە كەلدىم. وسىنداي جاعدايدىڭ ورىن العانى وكىنىشتى»، - دەيدى احمەد ابدۋلاحمەد ەسىمدى ستۋدەنت.
ەندى ءبىرى شۋدان، دابىلدان جانە ءتۇتىن يىسىنەن ويانعانىن جەتكىزدى.
«ءبىز شۋدان، دابىلدان جانە ءتۇتىن يىسىنەن وياندىق. ءبىر-ءبىرىمىزدى وياتا باستادىق. كورشى بولمەلەردى ارالاپ، ءبارىن سىرتقا شىعۋعا شاقىردىق. مەن مۇندا قونىستانعانىما ەكى اپتاعا جۋىقتادى. ءبىر بولمەدە جەتى ادام تۇرامىز»، - دەيدى حوستەل تۇرعىنى.
ەسكە سالايىق، الماتىدا حوستەل ورتەنىپ، 13 ادام قازا تاپتى. قالالىق توتەنشە جاعدايلار دەپارتامەنتىنىڭ مالىمەتىنشە، ءورت تۋرالى حابارلاما 30-قاراشا كۇنى ساعات 05:33-تە تۇسكەن. ءبىرىنشى ءورت ءسوندىرۋ ءبولىمى شاقىرتۋ ورنىنا 7 مينۋت ىشىندە جەتتى.
ورتتەن زارداپ شەككەن 2 ادام قالالىق جەدەل شۇعىل كومەك كورسەتۋ اۋرۋحاناسىنا جەتكىزىلدى. قالالىق دەنساۋلىق ساقتاۋ باسقارماسىنىڭ مالىمەتىنە سايكەس، ناۋقاستىڭ بىرىنە كومىرقىشقىل گازىنان ۋلانۋ دياگنوزى قويىلدى.
حوستەلدەن 59 ادام ەۆاكۋاتسيالانىپ، 56 سى جاقىن ماڭداعى مەكتەپكە ۋاقىتشا ورنالاستىرىلدى.
الماتى قالالىق توتەنشە جاعدايلار دەپارتامەنتىنىڭ باسشىسى نۇرلان اتىعايەۆتىڭ ايتۋىنشا، ەۆاكۋاتسيالانعان ادامداردىڭ كوبى - شەتەلدىكتەر.
ءورت بولعان حوستەلدەگى ءبىر ورىن قۇنى 2000 تەڭگەدەن باستالعان.
المالى اۋدانىنىڭ اكىمى ايدار جاقىبايەۆتىڭ ايتۋىنشا، حوستەلدە تۇرعانداردىڭ دەنى - ستۋدەنتتەر مەن جاس جۇمىسشىلار. پاكىستان مەن ءۇندىستاننان كەلگەن مەديتسينا ۋنيۆەرسيتەتىنىڭ ستۋدەنتتەرى دە بار.
ق ر پرەمەر-ءمينيسترى ءاليحان سمايىلوۆتىڭ وكىمىمەن ءورت سەبەبىن تەكسەرۋ جانە ونىڭ سالدارىن جويۋ جونىندەگى ۇكىمەتتىك كوميسسيا قۇرىلدى.
الماتى اكىمدىگى تاراتقان مالىمەتكە سايكەس، ءادي ءشارىپوۆ كوشەسىندەگى «اماتى حوستەل» Halyk Bank مەنشىگىندەگى عيماراتتا ورنالاسقان.
اكىمدىك مالىمەتى بويىنشا، قازا تاپقانداردىڭ كوبى - قازاقستاندىقتار.
ءورتتىڭ شىعۋ سەبەپتەرىن تەكسەرۋ ءۇشىن مينيستر، گەنەرال-مايور سىرىم ءشارىپحانوۆتىڭ باسشىلىعىمەن ت ج م-نىڭ جەدەل توبى وقيعا ورنىنا اتتاندى. ق ر قىلمىستىق كودەكسىنىڭ 292-بابىنا سايكەس قىلمىستىق ءىس تىركەلدى.
الماتى قالاسىنىڭ توتەنشە جاعدايلار دەپارتامەنتى شۇعىل جەلىنى ىسكە قوستى.
اۆتور
الما مۇقانوۆا
