الماتىداعى باستاۋىش سىنىپ وقۋشىلارى ساباقتا ۇيىقتاي الادى

استانا. قازاقپارات - ول ءۇشىن ارناۋلى «ۇيىقتايتىن پارتا» دا بار. ەندى بالاقايلار ءۇزىلىس كەزىندە كوز ءىلىندىرىپ السا بولادى.

مەكتەپتەر زامان ۇدەرىسىنەن قالماۋدى كوزدەيدى. جاساندى ينتەللەكتىنى دە بارىنشا پايدالانىپ كەلەدى. مۇنىڭ ءبارى بالانىڭ عانا ەمەس، مۇعالىمنىڭ دە جۇمىسىن جەڭىلدەتەدى. وعان قوسا، ساباقتى قىزىق، مازمۇندى ەتىپ وتكىزۋگە سەپ. بۇل تۋرالى 24.kz حابارلادى. 

ۇزاق ۋاقىت تاپجىلماي وتىرۋ - بۇعاناسى بەكىمەگەن بالالارعا وڭاي ەمەس. ونىڭ ۇستىنە كەيبىرى الىستان كەلەدى. ەرتە تۇرعاندىقتان ۇيقىسى قانبايدى. كەپتەلىستە تۇرىپ تاعى شارشايدى. وسىنىڭ ءبارى وقۋشىنىڭ دەنساۋلىعىنا كەرى اسەر ەتۋى مۇمكىن. ەندى 20 مينۋتتىق ۇزىلىستە پارتالارىن سوزىپ، جاتىپ دەمالىپ الادى. مۇنى «ۇيىقتايتىن پارتا» دەيدى. بيىل الماتىداعى 15-گيمنازيانىڭ باستاۋىش سىنىپتارىنا تۇگەلدەي وسىنداي پارتا قويىلدى.

«ونىڭ ەرەكشەلىگى - وقۋشىلار قوڭىراۋ كەزىندە 15-20 مينۋت رەلاكس مينۋت وتكىزە الادى. ياعني جاتقىزىلعان پارتالاردا ۇيىقتاي الادى. قازىر عانا مىنە بالالار ۇيىقتاپ تۇردى. ول بالالاردىڭ دەنساۋلىعىنا، ساباقتا وزدەرىن قالاي ۇستاۋىنا، ساباقتاعى وقۋ ۇردىسىنە قالاي اسەر ەتەتىنىن ءبىز تاجىريبەدە باقىلاپ كورەمىز»، دەيدى №15-گيمنازيانىڭ مۇعالىمى راۋان جاناتحانوۆا.

ءبىلىم وشاعى الماتىداعى وزىق ۇلگىدەگى مەكتەپتەردىڭ قاتارىنان. بيىل 20 كابينەت قايتا جاڭعىرتىلدى. وعان قوسا، مۇعالىمدەر تۇگەلدەي جاساندى ينتەللەكتى ادىستەرىن ساباقتا قولدانۋ بويىنشا كۋرستان وتكەن. قازىر پايداسىن كورىپ وتىر. ارينە ول ۇستازدىڭ ورنىن الماستىرمايدى، ءبىراق جۇمىستى جەڭىلدەتەدى.

«شۆەيتساريادا مەموراندۋمعا قول قويعاننان كەيىن، مەكتەپتىڭ ۇستازدارى 100 پايىز وسى كۋرستى ءبىتىردى. بارلىعى ەمەس، ارينە، كەيبىرەۋىندە كەرەمەت جەتىستىكتەر بار. كەيبىرى ەندى ءتاي-ءتايلاپ كەلە جاتىر. كەز كەلگەن جۇمىسىمىز بولسىن سەناري جازۋ، عىلىمي ىزدەنىس جۇرگىزسەك تە، ءجاي مۇعالىم رەتىندە ساباعىمنىڭ جوسپارىن قۇرسام دا، ينتەللەكت مەنىڭ جۇمىسىمدى جاقسى جەڭىلدەتىپ بەرە الادى»، دەيدى №15-گيمنازيانىڭ ديرەكتورى بۇلبۇل وسپانبەك.

وعان قوسا، مەكتەپتە ەرەكشە تەاتر جۇمىس ىستەيدى. ساحناعا قاجەت زاتتار مەن كيىمدەر وقۋشىلاردىڭ ءوز قولدارىنان شىققان. سونداي-اق، ەرەكشە ۇلگىدەگى كىتاپحانا مەن پسيحولوگيالىق ستۋديا بار.