الماتىداعى ايىپتۇراقتا مىڭنان اسا موپەد تۇر

Мопедтер
Фото: Видеодан алынған кадр

الماتى. KAZINFORM - الماتىدا جول-كولىك وقيعالارىنىڭ الدىن الۋعا، ولاردىڭ زارداپتارىنىڭ اۋىرلىعىن ازايتۋعا، جول قوزعالىسى ەرەجەلەرىن بۇزۋ تۋرالى دەرەكتەردى انىقتاۋ جانە جولىن كەسۋگە باعىتتالعان «قۇقىقتىق ءتارتىپ» جالپى رەسپۋبليكالىق جەدەل الدىن الۋ ءىس-شاراسىنىڭ ءۇشىنشى كەزەڭى جۇرگىزىلىپ جاتىر.

قالالىق پوليتسيا دەپارتامەنتى مالىمەتىنشە، وتكەن دەمالىس كۇندەرى مەگاپوليس جولدارىندا 2 مىڭعا جۋىق قۇقىقبۇزۋشىلىق انىقتالعان. ونىڭ باسىم بولىگىن ەلەكتروساموكات مەن موپەد پايدالانۋشىلارى جاساعان. جالپى ساموكاتتار مەن موپەدتەردى پايدالانۋ بويىنشا قۇقىق بۇزۋشىلىقتاردى انىقتاۋعا قاتىستى جەرگىلىكتى ءىس-شارا باستالعاننان بەرى 4800 موپەد جۇرگىزۋشىسى جانە 5200 ساموكات جۇرگىزۋشىسى اكىمشىلىك جاۋاپكەرشىلىككە تارتىلعان.

- 100 گە جۋىق اتا-انا بالالارىنا ساموكات پەن موپەد جۇرگىزۋگە رۇقسات بەرگەنى ءۇشىن جاۋاپكەرشىلىككە تارتىلدى. بۇل جالپى زاڭ مەن قاۋىپسىزدىك ستاندارتتارىنا قايشى كەلەدى، - دەدى الماتى قالالىق پ د جەرگىلىكتى پوليتسيا قىزمەتى باسقارماسىنىڭ باستىعى سەرىك شۋمايەۆ.

ونىڭ ايتۋىنشا، كەڭ اۋقىمدى رەيدتەر ناتيجەسىندە مىڭنان اسا موپەد، سونداي-اق 3 مىڭ 625 اۆتوكولىك مامانداندىرىلعان ايىپپۇل تۇراعىنا ورنالاستىرىلدى.

- جىل باسىنان بەرى ساموكاتتار مەن موپەدتەردىڭ قاتىسۋىمەن 463 جول-كولىك وقيعاسى ورىن الىپ، ناتيجەسىندە 500 ادام جاراقات الدى، 7 ادام قازا تاپتى. 68 جاعدايدا ەكى دوڭگەلەكتى كولىكتى بالالار جۇرگىزگەن، - دەدى سەرىك شۋمايەۆ.

سوڭعى جاڭالىقتار