الماتىداعى اۆتوبۋس اپاتى: زارداپ شەككەندەردىڭ بارلىعى اۋرۋحانادان شىقتى

الماتىدا اۆتوبۋس اپاتى سالدارىنان زارداپ شەككەن ءۇش ادام اۋرۋحانادان شىعارىلدى. ولار وتكەن جىلدىڭ 22- جەلتوقسانىنان باستاپ ستاتسيوناردا بولعان جانە بارلىق قاجەتتى ەمدەۋ كۋرسىنان ءوتتى، دەپ حابارلايدى Kazinform.

الماتى قالالىق قوعامدىق دەنساۋلىق ساقتاۋ باسقارماسى حابارلاعانداي، زارداپ شەككەن ءۇش ادامنىڭ بارلىعى الماتى قالالىق 7№ كلينيكالىق اۋرۋحاناسىندا ەم العان. ەڭ سوڭعى شىعارىلعان 50 جاستاعى ايەل اۋرۋحانادا 13 كۇن جاتتى، ونىڭ ىشىندە بىرنەشە كۇن رەانيماتسيا جانە قارقىندى تەراپيا بولىمشەسىندە بولدى. ول كلينيكاعا اۋىر قوسارلاس جاراقات، بىرنەشە سىنىق جانە تراۆماتيكالىق شوكپەن تۇسكەن.

«ناۋقاسقا كەلەسىدەي وپەراتسيا جاسالدى: سول جاقتا اتسەتابۋليارلى تىرەك پەن بۇراندالارى بار رەكونسترۋكتسيالىق پلاستينامەن تىك شۇڭقىر ويدىمىن ورنىنا سالۋ. حيرۋرگيالىق ارالاسۋ ءساتتى جاسالدى. وپەراتسيادان كەيىنگى كەزەڭ اسقىنۋسىز ءوتتى. وڭالتۋ كەزەڭى ەرتە جۇرگىزىلدى، وپەراتسيادان كەيىن 7-تاۋلىككە ناۋقاس ەمدىك-ەڭبەك ۇسىنىمدارىمەن ۇيىنە شىعارىلدى»، - دەدى الماتى قالاسىنىڭ 7№ ق ك ا ديرەكتورى ماناس رامازانوۆ.

بۇعان دەيىن 7№ ق ك ا- نىڭ نەيروحيرۋرگيالىق بولىمشەسىندە ەم العان ەكى زارداپ شەگۋشى ۇيىنە شىعارىلعان. ولار 1987-جىلى تۋعان جول اپاتىنا ۇشىراعان اۆتوبۋستىڭ جۇرگىزگەن ايەل مەن 1968-جىلى تۋعان ەر ادام. بارلىق زارداپ شەككەندەرگە قاجەتتى مەديتسينالىق كومەك تولىق كولەمدە كورسەتىلدى.

ەستەرىڭىزگە سالساق، وتكەن جىلدىڭ جەلتوقسان ايىندا الماتىدا اۆتوبۋس ءبىر توپ ادامدى قاققان ەدى. پوليتسيانىڭ مالىمەتىنشە، 47№-باعىتتاعى قوعامدىق كولىكتىڭ ىشىندەگى جولاۋشى جانجال شىعارىپ، جۇرگىزۋشى ايەلدى ۇرعان. سالدارىنان ول ەسىنەن تانىپ، كولىكتى باسقارا الماي قالعان.

الماتىلىق دارىگەرلەر بۇگىن ايالدامادا بولعان اپاتتان زارداپ شەككەن ادامداردىڭ جاعدايىن ايتتى، دەپ حابارلايدى قازاقپارات ءتىلشىسى.

اپات سالدارىنان 7 ادام زارداپ شەكتى. جەدەل مەديتسينالىق قىزمەت كەلگەنشە ۇشەۋى قايتىس بولدى. تاعى ءۇش ادام ءتۇرلى جاراقاتتارمەن الماتى قالالىق 7№ كلينيكالىق اۋرۋحاناعا جاتقىزىلدى.

اۆتوبۋس جۇرگىزۋشىسىن ۇرعان جولاۋشىعا قاتىستى قىلمىستىق ءىس قوزعالدى.

كەيىن ول كۇدىكتى ۇستالىپ، ەكى ايعا قاماۋعا الىندى.

اۆتوبۋس اپاتىنىڭ سالدارىنان قازا تاپقان ءۇش ادامنىڭ ەكەۋى ەرلى-زايىپتى ۇستازدار بولعان. ولار الماتى وبلىسى قاراساي اۋدانىنا قاراستى كوكساي اۋىلىنداعى م. مامەتوۆا اتىنداعى ورتا مەكتەپتە جۇمىس ىستەگەن.