الماتىداعى اۆتوبۋس اپاتى: سوتتالۋشى ءوزىن تەك «بۇزاقىلىق» بابى بويىنشا كىنالى دەپ سانايدى

الماتى. KAZINFORM - الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ابايسىزدا ءۇش ادامنىڭ ولىمىنە اكەلگەن بۇزاقىلىق جانە كولىكتىڭ قاۋىپسىز جۇمىسىن قامتاماسىز ەتۋ ەرەجەلەرىن بۇزدى دەپ ايىپتالعان سوتتالۋشىعا قاتىستى قىلمىستىق ءىس بويىنشا كەزەكتى سوت وتىرىسى ءوتتى. سوت وتىرىسى ونلاين-ترانسلياتسيا ارقىلى كورسەتىلدى.

ەسكە سالساق، وتكەن سوت وتىرىسىندا جابىرلەنۋشى تاراپ سوتتالۋشى مەن جاۋاپكەردەن ماتەريالدىق جانە مورالدىق وتەماقى تولەۋ جونىندە تالاپ قويعان بولاتىن. سوت بارىسىندا سوتتالۋشى دارحان احمەتجانوۆ، اۆتوبۋس جۇرگىزۋشىسى ەرمەك شوكەبايەۆا، «دۋمان ترانس» ج ش س وكىلى بۇل تاراپ ارىزدى قولدامايتىندارىن ايتتى.

ءوز كەزەگىندە «دۋمان ترانس» ج ش س وكىلى 47-باعىتتاعى اۆتوبۋستى ءوندىرۋشى سامارقاند اۆتوكولىك زاۋىتىنىڭ جازباشا جاۋابىن ۇسىندى.

«اۆتوبۋستارعا ورناتىلعان بەينەباقىلاۋ جۇيەسىنىڭ دىبىس جازۋ مۇمكىندىگى جوق»، - دەلىنگەن زاۋىتتىڭ جاۋابىندا.

سوت وتىرىسى بارىسىندا سوتتالۋشى مەن اۆتوبۋس جۇرگىزۋشىسى شوكەبايەۆاعا ناقتىلاۋ سۇراقتارى قويىلدى، ولار بۇرىنعى جاۋاپتارىن قايتالاپ ايتىپ بەردى. سونداي-اق سوت قىلمىستىق ءىس ماتەريالدارىن زەرتتەدى.

ال سوتتالۋشى احمەتجانوۆ 293-باپتىڭ 1-بولىگى («بۇزاقىلىق» ) بويىنشا عانا كىناسىن مويىنداپ، ادامداردىڭ ولىمىنە جۇرگىزۋشىنى كىنالادى. ونىڭ ايتۋىنشا، شوكەبايەۆا سوققىدان سوڭ ەسىن جوعالتپاعان.

«جۇرگىزۋشى ەرمەك شوكەبايەۆا ەسىن جوعالتقان جوق. مەن ونى ناقتى بىلەمىن. مەن ونى ۇرعان كەزدە ول ماعان اشۋلانىپ: «ءبىز قازىر سوعىلامىز، مەن ساعان كورسەتەمىن»، - دەپ، مەنى قورقىتۋ ءۇشىن گازدى باستى. وقيعا بولعان سوڭ، كولىكتەن شىعۋعا تىرىسقانىمدا ول: «ونى ۇستاڭدار»، - دەپ جاتتى»، - دەدى سوتتالۋشى دارحان احمەتجانوۆ.

اۆتوبۋس اپاتىندا قايتىس بولعان ايدوس المەنبايەۆتىڭ ايەلى اينۇر قۇسايىنوۆا دا اۆتوبۋس جۇرگىزۋشىسىن كىنالى سانايدى. ول جۇرگىزۋشى قوعامدىق كولىكتەگى بارلىق جولاۋشىنىڭ ومىرىنە جاۋاپتى ەكەنىن ايتتى.

ءوز كەزەگىندە اۆتوبۋس جۇرگىزۋشىسى ەرمەك شوكەبايەۆا باسقا كولىككە سوقتىعىسىپ، جولاۋشىدان ءوش الۋ تۋرالى ەشقانداي ويى بولماعانىن ايتتى.

سۋديا ت. شاكيروۆتىڭ شەشىمىمەن سوت وتىرىسى 25-ساۋىرگە شەگەرىلدى. بۇل سوت وتىرىسىندا ءجارىسسوز وتەتىن بولادى.

ايتا كەتەيىك، ق ر جوعارعى سوتى الماتىداعى اۆتوبۋس اپاتىنا قاتىستى كەزەكتى سوت وتىرىسىن تىكەلەي ەفيردە كورسەتۋ تۋرالى شەشىم قابىلدادى. سول سەبەپتى كەزەكتى سوت وتىرىسىنىڭ ونلاين ترانسلياتسياسى جوعارعى سوتتىڭ YouTube-كانالىندا كورسەتىلدى.

ەسكە سالساق، وتكەن جىلى جەلتوقسان ايىندا الماتىدا № 47-باعىتتاعى قوعامدىق كولىكتىڭ ىشىندە دارحان احمەتجانوۆ جانجال شىعارىپ، جۇرگىزۋشى ايەلدى ۇرعان. سالدارىنان ايەل ەسىنەن تانىپ، كولىكتى باسقارا الماي، ايالدامادا تۇرعان ءبىر توپ ادامدى قاققان. اپات سالدارىنان 7 ادام زارداپ شەگىپ، 3 ادام قايتىس بولدى.

وسىعان بايلانىستى سوتتتالۋشى دارحان احمەتجانوۆقا قاتىستى سوت وتىرىسى بيىل 20-ناۋرىزدا باستالعان ەدى.

اۆتور

دۋمان ارعىنگەلدى