الماتىداعى اۆتوبۋس اپاتى: پروكۋرور سوتتالۋشىنى 8 جىلعا سوتتاۋدى سۇرادى

الماتى. KAZINFORM - الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ءۇش ادامنىڭ ءومىرىن قيعان اۆتوبۋس اپاتىنا قاتىستى سوت وتىرىسى ءوتىپ جاتىر.

بۇگىنگى جارىسسوزدە پروكۋرور ءىس بويىنشا ايىپتاۋ اكتىسىن وقىدى. ونىڭ ايتۋىنشا، 2023 -جىلدىڭ 22-جەلتوقسانى كۇنى كەشكە №47-باعىتتاعى اۆتوبۋستىڭ جولاۋشىسى دارحان احمەتجانوۆ پەن جۇرگىزۋشى ەرمەك شوكەبايەۆانىڭ اراسىندا جول اقىسىن تولەمەۋگە بايلانىستى جانجال شىققان.

«احمەتجانوۆ جۇرگىزۋشىنىڭ جول اقىسىن تولە دەگەن تالابىنا اشۋلانىپ، جۇرگىزۋشىدەن كولىكتىڭ رۇقسات ەتىلمەگەن جەرىندە توقتاتۋدى تالاپ ەتكەن. ءبىراق، جۇرگىزۋشى توقتاعان جوق، ويتكەنى ول بۇل جول ەرەجەسىن بۇزۋ ەكەنىن ءبىلدى. سودان كەيىن ايىپتالۋشى اۆتوبۋستىڭ جۇرگىزۋشىسى شوكەبايەۆاعا وڭ قولىمەن ەكى رەت سوققا جاساعان. شوكەبايەۆا وسى جاعدايدا بىرنەشە سەكۋندقا ەسىنەن تانىپ، جول بويىنداعى جاياۋ جۇرگىنشىلەر مەن كولىكتى قاققان»، - دەدى پروكۋرور.

پروكۋروردىڭ ايتۋىنشا، ايىپ تولىق دالەلدەنگەن. سوتتالۋشى كىناسىن تولىق مويىنداماعان.

«قۇرمەتتى سوت، سوتتالۋشىنىڭ جەكە باسىن، جابىرلەنۋشى تاراپتىڭ پىكىرىن، قىلمىستىڭ قوعامعا قاۋىپتىلىگىن ەسكەرە وتىرىپ، احمەتجانوۆ دارحان مارات ۇلىن ق ر ق ك 293-بابىنىڭ 1-بولىگى، ق ر ق ك 351-بابىنىڭ 3-بولىمىمەن كىنالى دەپ تانىپ 8 جىلعا باس بوستاندىعىنان ايىرۋدى سۇرايمىن»، - دەيدى ول.

بۇعان دەيىن سوتتالۋشى احمەتجانوۆ 293-باپتىڭ 1-بولىگى («بۇزاقىلىق») بويىنشا عانا كىناسىن مويىنداپ، ادامداردىڭ ولىمىنە جۇرگىزۋشىنى كىنالاعان بولاتىن.

ايتا كەتەيىك، ق ر جوعارعى سوتى الماتىداعى اۆتوبۋس اپاتىنا قاتىستى كەزەكتى سوت وتىرىسىن تىكەلەي ەفيردە كورسەتۋ تۋرالى شەشىم قابىلدادى. سول سەبەپتى كەزەكتى سوت وتىرىسىنىڭ ونلاين ترانسلياتسياسى جوعارعى سوتتىڭ YouTube-كانالىندا كورسەتىلدى.

ەسكە سالساق، وتكەن جىلى جەلتوقسان ايىندا الماتىدا № 47-باعىتتاعى قوعامدىق كولىكتىڭ ىشىندە دارحان احمەتجانوۆ جانجال شىعارىپ، جۇرگىزۋشى ايەلدى ۇرعان. سالدارىنان ايەل ەسىنەن تانىپ، كولىكتى باسقارا الماي، ايالدامادا تۇرعان ءبىر توپ ادامدى قاققان. اپات سالدارىنان 7 ادام زارداپ شەگىپ، 3 ادام قايتىس بولدى.

اۆتور

الما مۇقانوۆا