الماتىداعى اۆتوبۋس اپاتى: مارقۇمنىڭ وتباسى جۇرگىزۋشىنى كەشىردى

الماتى. KAZINFORM - الماتىدا «5:32» سەريالىنىڭ پروديۋسەرى سەبەپكەر بولعان جول اپاتىنا قاتىستى سوت وتىرىسى بولىپ جاتىر.

ءىس المالى اۋداندىق سوتىندا ق ر قىلمىستىق كودەكسىنىڭ 345-بابىنىڭ 3-بولىگى بويىنشا ءىس قارالىپ جاتىر. 28 جاستاعى ايەلگە كولىك قۇرالىن باسقارۋ كەزىندە جولدا ءجۇرۋ قاعيدالارىن بۇزۋ، ونىڭ ىشىندە ابايسىزدا ادام ولىمىنە اكەپ سوعۋ بابى بويىنشا ايىپ تاعىلىپ وتىر.

سوت وتىرىسىندا انەل سارتايەۆا ءوز كىناسىن تولىق مويىنداپ، وكىنەتىنىن جەتكىزدى. سونىمەن قاتار، ول اپاتتىڭ قالاي بولعانىن ايتىپ بەردى.

«مەن تۇسكى ساعات 13:55-تە ۇيىمدە قالعان 4 ايلىق قىزىمدى تاماقتاندىرۋعا بارا جاتىر ەدىم. ماسانشى كوشەسىمەن كەلە جاتىپ، Lotus بيزنەس ورتالىعىنان كەيىن شلاگباۋمنان ءوتىپ، سول جاق باعىتتا كەلە جاتقان كولىكتەردى وتكىزدىم. اتالعان كوشەدە باعدارشام بولماعاندىقتان، جولدىڭ بوساعانىن كۇتتىم. مەن ماقاتايەۆ كوشەسىن كەسىپ ءوتىپ، ماسانشى كوشەسىمەن جوعارى قوزعالا باستاعاندا سوقتىعىستىق. كولىكتىڭ قاۋىپسىزدىك جاستىقشاسى اشىلىپ، ءبىراز ۋاقىت ەسىمدى جوعالتتىم. ادامدار ماعان كومەكتەسۋگە جۇگىردى، مەن بىردەن اۆتوبۋسقا قاراي بەت الدىم. جەدەل جاردەم شاقىردىم، ءبىراق تەلەفون جەلىسى بوس ەمەس ەدى. كەيىن پوليتسەيلەر كەلىپ، كولىك يەسىنىڭ كىم ەكەنىن سۇرادى. مەن بارلىق قاجەتتى قۇجاتتى بەردىم. تەرگەۋ اياسىندا مەن ءوز كىنامدى بىردەن مويىنداپ، ءار قوڭىراۋعا كەلىپ تۇردىم»، - دەيدى ول.

سوتتالۋشى سوتقا دەيىنگى تەرگەپ-تەكسەرۋ بارىسىندا ونىڭ وتباسى بارلىق جابىرلەنۋشىمەن كەزدەسىپ، مورالدىق جانە ماتەريالدىق شىعىندى وتەگەنىن اتاپ ءوتتى.

سونداي-اق سوت وتىرسىندا سارتايەۆا بارلىق جابىرلەنۋشى مەن مارقۇمنىڭ تۋىستارىنان كەشىرىم سۇرادى.

«مەن جابىرلەنۋشىلەردەن كەشىرىم سۇرايمىن. مەن بۇل جاعدايعا قاتتى وكىنەمىن جانە قانشالىقتى وكىنگەنىمدى سوزبەن ايتىپ جەتكىزە المايمىن. بۇل ۇلكەن قايعى ەكەنىن بىلەمىن. كوڭىل ايتامىن. وتىنەمىن، مەنى بارلىق بولعان جاعداي ءۇشىن كەشىرىڭىزدەرشى»، - دەپ جىلادى ايىپتالۋشى.

مارقۇمنىڭ اعاسى، جول اپاتىنان قازا تاپقان باۋىرى ساۋدا ورتالىعىنداعى اياق كيىم دۇكەنىندە جۇمىس ىستەگەنىن اتاپ ءوتتى. سول ول كۇنى اۆتوبۋسپەن جۇرگەن. كەشكە قاراي باۋىرىنىڭ جول اپاتىنا ۇشىراپ، ءمايىتحاناعا اپارا جاتقانىن بىلگەن.

سونداي-اق ول ايىپتالۋشىنىڭ اكەسى ماتەريالدىق جانە مورالدىق شىعىندى وتەۋدى ۇسىنعانىن، الايدا باس تارتقانىن ايتتى. ويتكەنى ولاردىڭ وتباسىندا اقشا ماسەلەسى جوق. سونداي-اق ول ايىپتالۋشىنى كەشىرەتىنىن جەتكىزدى.

ەسكە سالايىق، 26-ماۋسىم كۇنى قوعامدىق كولىك پەن جەڭىل ماشينا سوقتىعىسقان ەدى. سالدارىنان 16 ادام جاراقات الىپ، ءبىر ادام قازا تاپتى.

كەيىن قوعامدىق كولىك كامەراسى تۇسىرگەن بەينەجازبا جەلىدە تارادى.

اۆتوبۋستىڭ اپاتقا ۇشىراۋىنا «5:32» سەريالىنىڭ پروديۋسەرى سەبەپكەر بولعان.

كەيىن كۇدىكتى دەپ تانىلعان جەڭىل كولىك جۇرگىزۋشىسى انەل سارتايەۆا تەرگەۋ ۋاقىتىندا ءۇي قاماعىندا بولاتىنى تۋرالى جازعان ەدىك.

اۆتور
الما مۇقانوۆا