الماتىداعى اللەيا 15 جىلدان كەيىن جاڭارتىلدى
الماتى. KAZINFORM - «حالىق قاتىساتىن بيۋدجەت» باعدارلاماسى اياسىندا 3 شاقىرىم اللەيا اباتتاندىرىلدى. الماتىدا تۇرعۇت ءوزال كوشەسىنەن مۇقانوۆ كوشەسىنە دەيىن ۇزىندىعى 2,6 ك م، جالپى اۋماعى 5,2 گەكتار بولاتىن بولىنگەن جولاقتا اباتتاندىرۋ جۇمىستارى اياقتالدى.
الماتى اكىمدىگىنەن ءمالىم ەتكەندەي، اتالعان ايماقتا جوندەۋ جۇمىستارى 15 جىل بۇرىن جۇرگىزىلگەن. الەيانى جاڭعىرتۋ بارىسىندا ساپالى ماتەريالدار قولدانىلدى. جول مەن جاياۋ جۇرگىنشىلەرگە ارنالعان ايماقتاردى جايلى ەتۋ ماقساتىندا ىڭعايلى ورىندىقتار، فۋنكتسيونالدى شامدار جانە بەرىك جابىن توسەلدى.
ساۋلەتشى ۆلاديسلاۆ فيلاتوۆ ازاماتتاردىڭ «حالىق قاتىساتىن بيۋدجەت» جوباسىنا اتسالىسۋى ساپالى قالالىق ورتانى قالىپتاستىرۋعا ىقپال ەتەتىنىن جەتكىزدى.
«ءارقايسىمىز «حالىق قاتىساتىن بيۋدجەت» باعدارلاماسىنا قاتىسۋ تۋرالى ويلانۋىمىز كەرەك. بۇل قالانى كوركەيتۋگە ۇلەس قوسۋدىڭ تاماشا مۇمكىندىگى. وسىنداي جوبالاردىڭ ارقاسىندا تۇرعىنداردىڭ يدەياسى شىندىققا اينالىپ جاتقانىن كورىپ وتىرمىز»، - دەيدى ول.
اباتتاندىرۋ اياسىندا 7810 شارشى مەتر جاڭا كەسپە تاس توسەلىپ، 4882 مەتر جيەكتاس ورناتىلدى، بۇل اللەيانىڭ كوركىن كەلتىرىپ، جاياۋ جۇرگىنشىلەر ءۇشىن ىڭعايلى ەتتى. ۇزىندىعى 10800 مەتر بولاتىن سۋ قۇبىرى جاسىل جەلەكتى سۋارۋعا ارنالعان. 21000 شارشى مەتر اۋماقتا كوگال ەگىلىپ، 2500 بۇتا وتىرعىزىلدى، 110 قوقىس جاشىگى جانە 150 جارىقتاندىرۋ باعاناسى ورناتىلدى، بۇل قاۋىپسىزدىك پەن جايلىلىقتى ارتتىرادى.
وسىلايشا، كورىكتەندىرۋ جۇمىستارىنىڭ ناتيجەسىندە جاڭارتىلعان اللەيا قالانىڭ فۋنكتسيونالدى جانە ەستەتيكالىق بولىگىنە اينالدى.
اۆتور
الما مۇقانوۆا
