الماتىداعى 3 ادام ولگەن اۆتوبۋس اپاتى: اۆتوبۋستى قولىمەن تەجەگىشتى باسقان ستۋدەنت توقتاتقان
الماتى. KAZINFORM - الماتىدا اۆتوبۋس جۇرگىزۋشىسىن ۇرىپ، ءۇش ادامنىڭ ولىمىنە سەبەپكەر بولعان جولاۋشىعا قاتىستى كەزەكتى سوت وتىرىسى ءوتتى.
بۇگىن جابىرلەنۋشى تاراپ سوتتالۋشى مەن جاۋاپكەردەن ماتەريالدىق جانە مورالدىق وتەماقى تولەۋ جونىندە تالاپ قويدى.
«ازاماتتىق كودەكسكە سايكەس، «دۋمان ترانس» پەن شوكەبايەۆادان مورالدىق وتەماقى ءوندىرۋ تۋرالى تالاپ ارىز بەرە الامىز. اتا-انانىڭ ءارقايسىسى ءۇشىن 20 ميلليوننان، جيىنى 40 ميلليون تەڭگەنى ءوندىرىپ الۋدى تالاپ ەتەمىز. ونىڭ 4/1 بولىگىن، ياعني، 10 ميلليون تەڭگەسىن سوتتالۋشى احمەتجانوۆ، اۆتوبۋس جۇرگىزۋشىسى دە سولاي، ال «دۋمان ترانس» ج ش س زاڭدى تۇلعا بولعان سوڭ 20 ميلليون تەڭگە تولەۋى ءتيىس»، - دەدى جابىرلەنۋشىلەردىڭ ادۆوكاتتارى.
اۆتوبۋس اپاتىندا ەرى ايدوس المەنبايەۆتان ايىرىلعان ازاماتشا قۇسايىنوۆا ا. سوتقا 20 ميلليون تەڭگە كولەمىندە وتەماقى ءوندىرىپ الۋ تۋرالى تالاپ ارىزبەن جۇگىنگەن. سونىمەن قاتار، اپات كەزىندە ەرىنىڭ كولىگى زاقىمدانعان. ساراپشى شىعىندى 4 ميلليون 27 مىڭ تەڭگەگە باعالاعان. سونداي-اق جەرلەۋ مەن ەسكە الۋ شارالارىنا 2 ميلليون 320 مىڭ تەڭگە قارجى جۇمسالعان. وسىلايشا قۇسايىنوۆا سوتتالۋشىدان 6 ميلليون تەڭگە كولەمىندە ماتەريالدىق شىعىن ءوندىرۋدى تالاپ ەتتى. ودان بولەك مورالدىق شىعىن بويىنشا 20 ميلليون تەڭگەنىڭ 4/1 بولىگىن، ياعني، 5 ميلليون تەڭگەنى سوتتالۋشى، اۆتوبۋس جۇرگىزۋشىسى - 5 ميلليون تەڭگە، «دۋمان ترانس» ج ش س 10 ميلليون تەڭگە تولەۋى ءتيىس بولدى.
وسىدان سوڭ جول اپاتى كەزىندە اۆتوبۋستا بولعان كۋالەر شاقىرىلدى. جەڭىس تايبەك ەسىمدى ستۋدەنت اۆتوبۋس ىشىندە بولعان وقيعالانى ايتتى.
«اۆتوبۋس ىشىندە جولاقىنى تولەۋ ماسەلەسى بولدى. اۆتوبۋس جۇرگىزۋشىسى احمەتجانوۆتان جولاقىسىن تولەۋدى تالاپ ەتتى. كەيىن ول تولەدى ما بىلمەيمىن، ءبىرازدان سوڭ بالاعات سوزدەر ايتىلا باستادى. مەن جۇرگىزۋشنىڭ تۋرا ارتىنداعى ورىندىقتا وتىرعان ەدىم. جانىمدا دوسىم ءامىرحان بولدى. احمەتجانوۆ جۇرگىزۋشىنى ەكى رەت سوققانىن كوردىم. مەن ونى سوتتالۋشىنى ۇستاۋعا ارەكەت جاسادىم. جۇرگىزۋشى «تورموز، تورموز، ۇستاڭدار، سول كىنالى، قاشىپ كەتپەسىن، ۇستالسىن» دەپ ايقايلاعانى ەسىمدە. وسىدان سوڭ مەن بارىپ تەجەگىشتەن جۇرگىزۋشىنىڭ اياعىن الىپ، قولىممەن تەجەگىشتى باستىم. وسىلايشا اۆتوبۋستى توقتاتتىم. جول اپاتىنان مەنىڭ باسىم جارىلدى. اۆتوبۋستان شىققان سوڭ ولگەن ادامدى كوردىم، شوك جاعدايدا بولدىم»، - دەدى كۋاگەر جەڭىس تايبەك.
ەكىنشى شاقىرىلعان كۋا ستۋدەنت شاقانتاي ءامىرحان سوتتالۋشى اۆتوبۋستىڭ ارتقى ەسىگىنەن ءتۇسىپ كەتپەكشى بولعانىن ايتتى.
«الايدا جۇرگىزۋشى وعان ەسىكتى اشقان جوق. احمەتجانوۆ جۇرگىزۋشىگە SMS بارماي جاتىر دەدى. جۇرگىزۋشى «كەلەسى ايالداماعا دەيىن تولەپ قويىڭىز» دەدى. سوندا احمەتجانوۆ: «وسى جەردەن تاستاپ كەتىڭىز» دەدى. الايدا جۇرگىزۋشى ءجۇرىپ كەتتى. سوتتالۋشى بالاعات سوزدەرىن ايتا باستادى. جۇرگىزۋشى: «قولىڭنان كەلسە ىستە» دەدى. اينالاسى 10 سەكۋند ىشىندە قايعىلى جاعداي بولدى. جۇرگىزۋشى «تورموز، تورموز، شىعارماڭدار» دەدى. اپاتتان سوڭ سىرتتان كىسىلەر اۆتوبۋس ەسىگىن سىندىرىپ كىردى. جۇرگىزۋشى ايەل: «بارىنە وسى كىسى كىنالى» دەپ احمەتجانوۆتى كورسەتتى»، - دەدى شاقانتاي ءامىرحان.
وسىدان سوڭ سۋديا ت. شاكيروۆ كەلەسى سوت وتىرىسىن 24-ساۋىرگە شەگەرەتىنىن مالىمدەدى. وسىلايشا الماتىداعى اۆتوبۋس اپاتىنا قاتىستى سوت وتىرىسى وسىمەن بەسىنشى مارتە كەيىنگە شەگەرىلدى.
ەسكە سالساق، اۆتوبۋستا جۇرگىزۋشى ايەلدى ۇرعان دارحان احمەتجانوۆقا قاتىستى سوت وتىرىسى 20-ناۋرىزدا باستالعان ەدى.
ايتا كەتەيىك، وتكەن جىلى الماتىدا № 47-شى باعىتتاعى قوعامدىق كولىكتىڭ ىشىندە دارحان احمەتجانوۆ جانجال شىعارىپ، جۇرگىزۋشى ايەلدى ۇرعان. سالدارىنان ايەل ەسىنەن تانىپ، كولىكتى باسقارا الماي، ايالدامادا تۇرعان ءبىر توپ ادامدى قاققان.
اپات سالدارىنان 7 ادام زارداپ شەگىپ، 3 ادام قايتىس بولدى.
اۆتور
دۋمان ارعىنگەلدى
