الماتىدا زاڭسىز ويىن بيزنەسىن ۇيىمداستىرعان 14 ادام سوتتالدى

الماتى. KAZINFORM - الماتىدا بىلتىردان بەرى زاڭسىز ويىن بيزنەسىن ۇيىمداستىرۋ دەرەگى بويىشا 18 قىلمىستىق ءىس قوزعالىپ، 14 ادام سوتتالدى. بۇل تۋرالى وڭىرلىك كوممۋنيكاتسيالار قىزمەتىندە وتكەن باسپا ءسوز ءماسليحاتى بارىسىندا الماتى قالاسى ەكونوميكالىق تەرگەپ-تەكسەرۋ دەپارتامەنتى باسشىسىنىڭ ورىنباسارى سابىرعالي بالعاليەۆ ايتتى.

سپيكەردىڭ سوزىنشە، كازينو مەن ويىن اۆتوماتتارى زالدارى قاپشاعاي جانە اقمولا وبلىسىنىڭ شۋچە اۋدانىنان باسقا جەرلەردە اشۋ زاڭسىز.

«الماتىدا 2023 - جىلدان بەرى زاڭسىز ويىن بيزنەسىن ۇيىمداستىرۋ دەرەكتەرى بويىنشا 18 قىلمىستىق ءىس قوزعالىپ، 14 تۇلعاعا قاتىستى سوت ۇكىمى شىعىپ، ولار سوتتالدى، 3 ءىس قارالىپ جاتىر. دەپارتامەنت وندىرىسىندە - 5 قىلمىستىق ءىس تەرگەلۋدە. زاڭسىز اينالىمنان 111 مونيتور، 102 پروتسەسسور جانە ويىن تەرمينالى تاركىلەنىپ، 1500 تەرمينال جويىلدى. كۇدىكتى سايتتاردىڭ سىلتەمەسى بۇعاتتالدى»، - دەيدى ول.

ايتۋىنشا، جەدەل-تەرگەۋ ءىس-شارالارى بارىسىندا TikTok جەلىسىندە زاڭسىز ويىن بيزنەسىن ۇيىمداستىرۋ، ستاۆكالاردى قابىلداۋ، بانكتىك اۋدارىمدار ارقىلى ۇتىستاردى ەسەپتەۋ جانە بەرۋ فۋنكتسيالارىن قولدايتىن ونلاين قۇمار ويىندار فاكتىسى انىقتالدى.

«ونى تەكسەرۋ بارىسىندا، بىرنەشە ادامنىڭ ءتورت اي بويى زاڭسىز ويىن بيزنەسىن ۇيىمداستىرىپ، 13 ميلليونعا جۋىق كىرىس تاپقانى دالەلدەندى»، - دەدى سابىرعالي بالعاليەۆ.

اۆتور

الما مۇقانوۆا