الماتىدا وتكەن جىلى وتاندىق جانە شەتەلدىك انشىلەردىڭ قاتىسۋىمەن 334 اۋقىمدى كونسەرت ءوتتى

Алматыда өткен жылы отандық және шетелдік әншілердің қатысуымен 334 ауқымды концерт өтті
فوتو: gov.kz

الماتىدا وتكەن جىلى قالا الاڭدارى مەن ستاديونداردا، ارەنالاردا ەلىمىزدىڭ بەلگىلى ارتىستەرى عانا ەمەس، سونىمەن بىرگە الەمدىك دەڭگەيدەگى جۇلدىزدار ونەر كورسەتتى. بۇل ءىس-شارالاردىڭ %86 ىن كوممەرتسيالىق جانە جەكە كومپانيالار ۇيىمداستىردى. بۇل تۋرالى الماتى قالاسى مادەنيەت باسقارماسىنىڭ باسشىسى عاني مايلىبايەۆ ايتتى، دەپ حابارلايدى Kazinform.

«2023 -جىل مادەني ءىس-شارالارعا تولى بولدى، قالامىزدا كوپتەگەن تانىمال ارتىستەر كەلدى. جىلدى قورىتىندىلاساق، الماتىدا شەتەلدىك انشىلەردىڭ 47، وتاندىق ارتىستەردىڭ 287 كونتسەرتى ءوتتى. ودان بولەك، اۋقىمدى ءىس-شارالار، ونىڭ ىشىندە حالىقارالىق فەستيۆالدار ءوتتى. تۇجىرىمدامالىق تۇرعىدان قاراستىرساق، وندا ءبىزدىڭ ءاربىر ءىس-شارامىز جەكە برەندكە اينالىپ، ءوز كورەرمەندەرىن تارتتى. قالا اكىمى مادەني استانامىز تۇرعىندار مەن قوناقتاردى قىزىقتى جوبالارمەن قۋانتىپ، وقيعالى ءتۋريزمدى دامىتۋعا جاعداي جاساۋ مىندەتىن قويىپ وتىر»، - دەدى عاني مايلىبايەۆ.

ەسكە سالساق، وتكەن جىلى 19 -جىلدىق ۇزىلىستەن سوڭ «ازيا داۋىسى» حالىقارالىق مۋزىكالىق فەستيۆالى وتكەن ەدى. ءىس-شارا اياسىندا وتاندىق ورىنداۋشىلار دا، الەمدىك دەڭگەيدەگى شەتەلدىك ارتىستەر دە ءۇش كۇن بويى ونەر كورسەتتى. فەستيۆالدىڭ حەدلاينەرى ايگىلى امەريكالىق The Black Eyed Peas توبى بولدى. سونىمەن قاتار بىلتىر The Spirit of Tengri زاماناۋي ەتنيكالىق مۋزىكا فەستيۆالى، سونىمەن بىرگە «ناۋرىز فەست»، «الماتى، ليۋبليۋ تەبيا»، «تۋعان كۇنىڭمەن، الماتى»، «ساعىندىم الماتىمدى» جانە «زيمني نوۆوگودني فەستيۆال» ءوتتى.

«مەگاپوليستە اۋقىمدى ءىس- شارالاردى وتكىزۋ ەكونوميكالىق وڭ اسەر ەتەدى. بۇل - جاڭا ۋاقىتشا جۇمىس ورىندارىن قۇرۋ، كوپتەگەن تۋريست تارتۋ، وقيعالى تۋريزمدى، قوناق ءۇي بيزنەسىن، مەيرامحانالار مەن جەرگىلىكتى بيزنەستى دامىتۋ دەگەن ءسوز. ەڭ باستىسى، جاس ارتىستەر مەن تانىمال جۇلدىزداردى ءبىر ساحنادا ونەر كورسەتۋگە مۇمكىندىك بەرۋ، ولاردىڭ اۋديتورياسىن كەڭەيتۋگە، ونەرىن ۇشتاۋعا سەپتىگىن تيگىزەدى. ءبىز ارتىستەر مەن ءىس- شارالاردى ۇيىمداستىرۋشىلارعا 2023 -جىلى بىرلەسىپ جۇمىس ىستەگەندەرى ءۇشىن العىس ايتامىز جانە كورەرمەندەر ءۇشىن 2024 -جىلعا ارنالعان مادەني مازمۇندى باعدارلاما دايىنداپ جاتىرمىز»، - دەدى الماتى قالاسى مادەنيەت باسقارماسىنىڭ باسشىسى عاني مايلىبايەۆ.

ايتا كەتەيىك، وتكەن جىلى سونداي-اق قالالىق مادەنيەت باسقارماسى Open air فورماتىندا ءىس-شارالار - فەستيۆالدار، كورمەلەر مەن كونتسەرتتەر ۇيىمداستىردى. ولار قالانىڭ ءار اۋدانىندا ءوتتى. وسىلايشا قالا تۇرعىندارىنا تەگىن كونسەرت كورۋگە مۇمكىندىك جاسالدى.

سوڭعى جاڭالىقتار