الماتىدا ورتەنگەن حوستەل قۇرىلىس تالاپتارى مەن ءورت قاۋىپسىزدىگى ەرەجەلەرىن بۇزا وتىرىپ سالىنعان

الماتىدا ورتەنگەن حوستەلدىڭ يەسى - «ك ۋ سا حالىك» ج ش س. ونى جالعا العان - «ALA Hostel» ج ش س. جالداۋ تۋرالى كەلىسىمشارت بيىل 21-قىركۇيەكتە جاسالعان، دەپ حابارلايدى Kazinform.

الماتى اكىمدىگىنىڭ مالىمەتىنشە، جەر ۋچاسكەسىنىڭ نىسانالى ماقساتى - دۇكەندى پايدالانۋ جانە قىزمەت كورسەتۋگە ارنالعان.

«بۇل نىسان ءبىر جارىم اي بۇرىن حوستەلگە اينالعان. حوستەلدىڭ الاڭى - 457 شارشى مەتر. ايتا كەتۋ كەرەك، «ساۋلەت، قالا قۇرىلىسى جانە قۇرىلىس قىزمەتى تۋرالى» ق ر زاڭىنا سايكەس ءۇي-جايلاردى قايتا جابدىقتاۋ كەزىندە رۇقسات قۇجاتتارىن الۋ كەرەك. بۇل رەتتە الماتى قالالىق جوسپارلاۋ جانە ۋربانيستيكا باسقارماسى قايتا جابدىقتاۋعا ارنالعان باستاپقى رۇقسات قۇجاتتارىن (ا پ ز، شەشىم) بەرمەگەن. دۇكەننەن حوستەلگە فۋنكسيونالدىق ماقساتى وزگەرگەن كەزدە سانيتارلىق-ەپيدەميولوگيالىق، قۇرىلىس تالاپتارى مەن ءورت قاۋىپسىزدىگى ەرەجەلەرىن ورىنداۋ قاجەت. سانيتارلىق-ەپيدەميولوگيالىق تالاپتاردىڭ 23-تارماعىنا سايكەس حوستەلدى جەرتولە جانە جەرتولە قاباتتارىندا ورنالاستىرۋعا تىيىم سالىنادى»، - دەلىنەدى حابارلامادا.

وسىلايشا حوستەلدىڭ جوعارىدا اتالعان مەكەنجاي بويىنشا سانيتارلىق-ەپيدەميولوگيالىق، قۇرىلىس تالاپتارى مەن ءورت قاۋىپسىزدىگى ەرەجەلەرىن بۇزا وتىرىپ، زاڭسىز ورنالاسقانى انىقتالدى.

3-27-قاراشادا الماتىدا «جاتاقحانا» اكسياسى ۇيىمداستىرىلدى. ناتيجەسىندە پروفيلاكتيكا جۇمىسى جۇرگىزىلدى، ءورت قاۋىپسىزدىگىنىڭ ەرەجەسى ءتۇسىندىرىلدى. سونداي-اق تەكسەرىس بارىسىندا ءورت قاۋىپسىزدىگى ەرەجەسىن ساقتاماۋدىڭ 350 دەن اسا دەرەگى انىقتالدى. بۇل حوستەل جۇمىسىن 1,5 اي بۇرىن باستاعان. مۇنى حوستەلدىڭ اكىمشىلىگى ايتتى، - دەدى قالالىق ت ج د باسشىسى نۇرلان اتىعايەۆ.

Stan.kz تىلشىسىنە بەرگەن سۇحباتىندا اتالمىش قوناق ۇيدە تۇراتىن وقيعا كۋاگەرى ايمۇرات كوز جۇمعانداردىڭ ىشىندە ونىڭ دوستارى بارىن ايتتى.

بارلىعى اشىق-شاشىق جاتادى. روزەتكالار اشىق. تالاپتار ساقتالماعان. كوز جۇمعانداردىڭ اراسىندا دوستارىم دا بار. كوبى ستۋدەنتتەر، جۇمىس ىستەيتىندەر دە بار. شەتەلدىكتەر اراسىندا الجير، ءۇندىستاننان كەلگەن ستۋدەنتتەر. بالالار وقۋ وقيتىن، داياشى بوپ جۇمىس ىستەيتىن. مەن ءبىرىنشى قاباتتا تۇردىم، ويانسام، ەشتەڭە كورىنبەيدى. ال جەرتولەدە جاعداي ودان دا جامان بولدى. سوندىقتان شىعا الماعان سياقتى، - دەيدى ايمۇرات.

وستەل تۇرعىندارىن باسقا ورىنعا اۋىستىرىپ جاتىر. قولدارىنا جۇكتەرىن كوتەرگەندەردىڭ باسىم بولىگى جاستار. اراسىندا ەرەسەكتەر دە بار.

ايەلىم قازىر مايىتتەردى تانۋعا كەتتى. ەلەكتر جۇيەسىمەن ماسەلەلەر بولعانى راس. مايىتتەردى الىپ شىعارعاندا دا كومەكتەستىم. قازىر باسقا ورىنعا اپارا جاتىر. باسقا ەشتەڭە ايتا المايمىن، - دەدى ۆلاديمير ەسىمدى حوستەل تۇرعىنى Stan.kz تىلشىسىنە بەرگەن سۇحباتىندا.

پرەمەر-مينيستر ءاليحان سمايىلوۆتىڭ وكىمىمەن الماتى قالاسىنداعى حوستەلدە بولعان ءورتتىڭ سەبەپتەرىن تەكسەرۋ جانە ونىڭ سالدارىن جويۋ جونىندەگى ۇكىمەتتىك كوميسسيا قۇرىلدى.

ونىڭ قۇرامىنا مەملەكەتتىك جانە قۇقىق قورعاۋ ورگاندارىنىڭ باسشىلارى، سونداي-اق الماتى اكىمدىگىنىڭ وكىلدەرى كىردى. كوميسسيا ءتوراعاسى ق ر توتەنشە جاعدايلار ءمينيسترى سىرىم ءشارىپحانوۆ وقيعا ورنىنا شۇعىل اتتاندى.

پوليتسيانىڭ مالىمەتىنشە، قايتىس بولعان 13 ادامنىڭ تورتەۋى شەتەلدىك (رەسەي فەدەراتسياسىنىڭ 2 ازاماتى جانە وزبەكستاننىڭ 2 ازاماتى)، تاعى 9 ى - قازاقستان رەسپۋبليكاسىنىڭ ازاماتى. سوت- مەديتسينالىق ساراپتاماسى جاسالدى.

قالعان ۇشەۋىنىڭ جەكە باسى انىقتالىپ جاتقانىن جەتكىزدى.

بۇعان دەيىن كوبىسى پاكىستان جانە ءۇندىستان ازاماتتارى ەكەن دەگەن اقپارات شىققان. ءبىراق ولار ەمەس. دەگەنمەن بۇل حوستەلدە سول ەلدەردەن كەلگەن ازاماتتار كوپتەپ تۇرادى.

اكىمدىكتىڭ باسپا ءسوز قىزمەتى سونداي-اق حوستەل الماتىداعى جوعارى وقۋ ورىندارىنىڭ ستۋدەنتتەرىن ورنالاستىرۋ بويىنشا مەموراندۋم جاساماعانىن حابارلادى.

ستۋدەنتتەردەن بۇل جاتاقحانادا تۇرۋعا ءوتىنىش تۇسپەگەن، ستۋدەنتتەردى بۇل حوستەلگە ورنالاستىرۋ جۇمىسى ۇيىمداستىرىلماعان، - دەپ جازىلعان اكىمدىكتىڭ حابارلاماسىندا.

ءورت فاكتىسى بويىنشا الماتى قالاسى توتەنشە جاعدايلار دەپارتامەنتى ق ر قىلمىستىق كودەكسىنىڭ 292-بابى «ءورت قاۋىپسىزدىگى تالاپتارىن بۇزۋ» بويىنشا قىلمىستىق ءىس قوزعادى.