الماتىدا پوليتسەيگە قول كوتەرگەن ەر ادام قاماۋعا الىندى
الماتىدا پوليتسەيگە شابۋىل جاساعان ەر ادام قاماۋعا الىندى، دەپ حابارلايدى Kazinform.
قالالىق پوليتسيا دەپارتامەنتىنىڭ مالىمەتىنشە، 19- جەلتوقساندا تۇنگى ساعات 03:20 دا دوستىق داڭعىلى مەن سنەگين كوشەسىنىڭ قيىلىسىندا مامانداندىرىلعان پاترۋلدىك پوليتسيا باتالونىنىڭ ەكيپاجى كۇدىك تۋدىرعان «تويوتا» كولىگىن توقتاتتى.
«كولىكتىڭ ىشىندە جۇرگىزۋشى مەن ءتورت جولاۋشى بولعان، ولار بىردەن دورەكىلىك تانىتىپ، پوليتسيا قىزمەتكەرلەرىنىڭ زاڭدى تالاپتارىنا باعىنباعان. سونىمەن بىرگە، ءتورت ادام Toyota Camry جۇرگىزۋشىسىنە قاشىپ كەتۋگە مۇمكىندىك جاسادى. ول دا ماس كۇيىندە رۋلگە وتىرعان - بۇل وزگەلەرگە قاۋىپ ءتوندىردى دەگەن ءسوز. جۇرگىزۋشىنىڭ كىم ەكەنى انىقتالدى. ونى ۇستاۋ شارالارى جۇرگىزىلۋدە»، - دەپ اتاپ ءوتتى الماتى پوليتسيا دەپارتامەنتىنىڭ باسپا ءسوز قىزمەتىنەن.
سونداي-اق ءتارتىپ بۇزۋشىلاردىڭ ءبىرى پوليتسيا قىزمەتكەرىن ۇردى. بۇل ارەكەتتەر قازاقستان رەسپۋبليكاسى قىلمىستىق كودەكسىنىڭ 380-بابى «بيلىك وكىلىنە كۇش قولدانۋ» بويىنشا كۆاليفيكاتسيالاندى.
«وقيعاعا قاتىسۋشىلاردىڭ بارلىعىنا قاتىستى ق ر ق ك- ءنىڭ 379-بابى «بيلىك وكىلىنە باعىنباۋ» جانە ق ر ا ق ب ت ك- ءنىڭ 440-بابى «ۇساق بۇزاقىلىق» بويىنشا قىلمىستىق ءىس قوزعالىپ، ماتەريالدار جينالدى. ال، ءتارتىپ ساقشىسىنا قول كوتەرگەن ەر ادام قاماۋعا الىندى»، - دەپ قوستى دەپارتامەنتتەگىلەر.
بۇعان دەيىن الماتىدا جاستار مەن پوليتسەيلەردىڭ توبەلەسى ۆيدەوعا ءتۇسىپ قالعانى تۋرالى جازعان بولاتىنبىز.
