الماتىدا توك سوققان جۇمىسشى امان قالدى
الماتىلىق دارىگەرلەر جۇمىس ورنىندا ەلەكتر توگى سوققان ەر ادامنىڭ ءومىرىن امان الىپ قالدى، دەپ حابارلايدى Kazinform.

الماتى قوعامدىق دەنساۋلىق ساقتاۋ باسقارماسىنىڭ مالىمەتىنشە، ورتالىق قالالىق كلينيكالىق اۋرۋحانادا رەانيماتولوگتار 43 جاستاعى ناۋقاستىڭ جاعدايىن ءبىر قالىپقا تۇسىرگەن سوڭ № 4-قالالىق اۋرۋحانانىڭ كومبۋستيولوگتارىنا جىبەرگەن.
«ەر ادام «رەميزوۆكا» شاعىناۋدانىندا جۇمىس ىستەپ جۇرگەندە ەلەكتر توعى سوققان. وعان ەلەكتر جاراقاتى، %35 تەرميالىق كۇيىك دياگنوزى قويىلدى. ول سونداي-اق ەكىنشى دارەجەلى كۇيىك شوگى دياگنوزىمەن ورتالىق قالالىق كلينيكالىق اۋرۋحانانىڭ جانساقتاۋ بولىمىنە جاتقىزىلدى. كەيىن ەكى كلينيكا اراسىنداعى كەلىسىم بويىنشا ناۋقاس جەدەل جاردەم بريگاداسىمەن № 4-قالالىق كلينيكالىق اۋرۋحاناعا جەتكىزىلدى. كەلگەن ساتتەن باستاپ جانساقتاۋ بولىمىندە جان- جاقتى قارالدى»، - دەدى № 4-قالالىق كلينيكالىق اۋرۋحانانىڭ كۇيىك اۋرۋلارى ءبولىمىنىڭ مەڭگەرۋشىسى ەلدوس المەنوۆ.
ەر ادامنىڭ جاعدايى وتە اۋىر دەپ باعالاندى، ناۋقاس ۇزاق ۋاقىت بويى قارقىندى تەراپيا بولىمىندە ەمدەلدى.
وندا تىنىس الۋدى، جۇرەك قىزمەتى مەن دەنەنىڭ ومىرلىك ماڭىزدى فۋنكسيالارىن ساقتاۋدى قامتيتىن ەرتە رەانيماتسيا جاسالدى.
«قاتتى كۇيىكتى ەمدەۋ كوپ ۋاقىتتى ءارى كومبۋستيولوگ، رەانيماتولوگ، كارديولوگ، تەراپيەۆت، حيرۋرگ جانە باسقا دا دارىگەرلەردىڭ ارالاسۋىن قاجەت ەتتى. نەگىزى ەلەكتر توعى اعزانى زاقىمداپ، جۇرەك جۇمىسى، تىنىس الۋ، جۇيكە جۇيەسىنىڭ بۇزىلۋىنا، سونداي- اق كۇيىككە، باسقا دا جاراقاتتارعا اكەلۋى مۇمكىن. توقتىڭ قارقىنى جوعارى بولعان كەزدە قارىنشا فيبريللياتسياسى ءورشۋى مۇمكىن، بۇل بىرنەشە مينۋتتا ولىمگە اكەلەدى. ەلەكتر جاراقاتىنان سوڭ سترەسس سيندرومى سياقتى پسيحولوگيالىق زارداپ دا بولۋى مۇمكىن»، - دەدى № 4-قالالىق كلينيكالىق اۋرۋحانانىڭ انەستەزيولوگيا، رەانيماتسيا جانە قارقىندى تەراپيا ءبولىمىنىڭ مەڭگەرۋشىسى جاندوس داۋلەتبەكوۆ.
ەر ادامعا تەرى پلاستيكالىق حيرۋرگيا جاساۋ قاجەت بولدى. وعان اۋتودەرموپلاستيكا جاسالدى، ياعني دەنەنىڭ ساۋ تەرىسى زاقىمدالعان جەرگە اۋىستىرىپ سالىندى.
«بۇل ءادىس جارانىڭ تەز جازىلۋىن جانە تەز قالپىنا كەلۋىن قامتاماسىز ەتەدى. وپەراتسيانى حيرۋرگتار ەلدوس المەنوۆ، دياس داۋلەتبايەۆ جانە انەستەزيولوگ قاناتبەك رايىمبەكوۆ جاسادى. ەمنىڭ 52-كۇنى ناۋقاستىڭ جاعدايى جاقسارىپ، ۇيگە شىقتى»، - دەپ حابارلادى قالالىق قوعامدىق دەنساۋلىق ساقتاۋ باسقارماسىنىڭ باسپا ءسوز قىزمەتى.
اۆتور
دۋمان ارعىنگەلدى