الماتىدا تۇندە جۇرەتىن اۆتوبۋستار كوبەيە مە

 الماتى. KAZINFORM - بيىل قاڭتار ايىندا الماتى قالاسىنىڭ 2030 -جىلعا دەيىنگى كولىك قاڭقاسىنىڭ ماستەر- جوسپارى بەكىتىلدى. وندا مەگاپوليستەگى قوعامدىق كولىكتەردى دامىتۋ جوبالارى كورسەتىلگەن.

 ءبىز بۇل قۇجاتقا سىلتەمە جاساي وتىرىپ، قالا اكىمدىگىنەن تۇنگى اۆتوبۋستاردىڭ جاڭا باعىتتارىن ىسكە قوسۋ جوسپارى بار- جوعىن سۇرادىق.

الماتى اكىمدىگىنىڭ مالىمەتىنە سايكەس، قازىرگى ۋاقىتتا ساعات 23:00-06:55 ارالىعىندا ءبىر باعىت بويىنشا تۇنگى اۆتوبۋستار جۇرەدى.

«قازىرگى تاڭدا الماتى قالاسىندا تۇنگى ۋاقىتتا حالىقارالىق اۋەجايدان «وربيتا-2» شاعىن اۋدانىنا دەيىن №3 مارشرۋت قىزمەت ەتەدى. بۇل مارشرۋتتىڭ جىلجىمالى قۇرامى 2 اۆتوبۋس. قوزعالىس ارالىعى - 65 مينۋت»، - دەپ حابارلادى اكىمدىكتەن.

سونداي- اق اكىمدىكتىڭ باسپا ءسوز قىزمەتى تۇنگى مارشرۋتتا جولاۋشى سانى كوپ بولماۋىنا بايلانىستى رەيستەر سانىن كوبەيتۋ جوسپارلانباعانىن حابارلادى.

«بۇل مارشرۋتتىڭ رەيستەر سانى قازىرگى جولاۋشىلار اعىمىنا ساي ەكەندىگىنە بايلانىستى رەيستەرىن كوبەيتۋ ماسەلەسى قاراستىرىلماعان. وسى مارشرۋتتىڭ بار ەكەنىن ەسكەرە وتىرىپ، الماتى قالاسىنىڭ كولىك قاڭقاسىنىڭ ماستەر- جوسپارىندا جاڭا تۇنگى مارشرۋت اشۋ ماسەلەسى دە قاراستىرىلماعان»، - دەيدى اكىمدىكتەن.