الماتىدا تاعى ءبىر اۆتوبۋس جول-كولىك وقيعاسىنا ۇشىرادى
الماتى. KAZINFORM - الماتىدا ءاشىموۆ جانە شالياپين كوشەلەرىنىڭ قيىلىسىندا قوعامدىق كولىكتىڭ قاتىسۋىمەن جول-كولىك وقيعاسى بولدى.
- بۇل جول-كولىك وقيعاسى بۇگىن ساعات 09:15 تە الماتىنىڭ ناۋرىزباي اۋدانىندا بولدى. ءاشىموۆ كوشەسىمەن سولتۇستىك باعىتتا كەلە جاتقان جۇك كولىگى ايالداما كەشەنىندە توقتاعان 137-مارشرۋتتىڭ اۆتوبۋسىنا سوقتىعىستى. اۆتوبۋس ينەرتسيا بويىنشا شىعىس جول جيەگىنە شىعىپ، جەكە ءۇيدىڭ قورشاۋىنا سوعىلدى. الدىن الا مالىمەتتەر بويىنشا، اپات سالدارىنان اۆتوبۋستىڭ 9 جولاۋشىسى زارداپ شەكتى. جول-كولىك وقيعاسىنىڭ باسقا دا ءمان- جايلارى انىقتالىپ جاتىر، - دەپ حابارلايدى قالالىق پ د باسپا ءسوز قىزمەتى.
قالانىڭ قوعامدىق دەنساۋلىق ساقتاۋ باسقارماسىنىڭ مالىمەتىنشە، № 7 م ك ب قابىلداۋ بولىمىنە جەتكىزىلگەن پاتسيەنتتەر قاجەتتى تەكسەرۋدەن وتۋدە. سەگىز ادامنىڭ جاعدايى تۇراقتى، ال اۋىر جاعدايدا جەتكىزىلگەن ءبىر ادام رەانيماتسيا بولىمىندە.
ەسكە سالايىق، 26-ماۋسىم كۇنى الماتىدا № 18 اۆتوبۋس اپاتقا ۇشىراپ، ءبىر ادام قازا تاپقان بولاتىن.
