الماتىدا ەسىرتكىمەن كۇرەس قالاي ءجۇرىپ جاتىر

الماتى. KAZINFORM - الماتىدا «Narkostop» جوباسى شەڭبەرىندە جىل باسىنان بەرى ەسىرتكى جارناماسى بەينەلەنگەن 50 مىڭعا جۋىق گراففيتي بويالعان.

مەملەكەت باسشىسى قاسىم-جومارت توقايەۆ 2022-جىلدىڭ 1-قىركۇيەگىندە قازاقستان حالقىنا جولداعان جولداۋىندا سينتەتيكالىق ەسىرتكىنىڭ قوعامعا قاۋپى تۋرالى ايتىپ، ءتيىستى ۆەدومستۆوعا ناشاقورلىقپەن جانە ەسىرتكى ساۋداسىمەن كۇرەسۋدىڭ كەشەندى جوسپارىن ازىرلەۋدى تاپسىرعان بولاتىن. بيىل اتىراۋ قالاسىندا وتكەن ۇلتتىق قۇرىلتاي كەزىندە پرەزيدەنت حالقىمىزعا قاۋىپ توندىرەتىن 5 كەسەلدىڭ قاتارىندا ەسىرتكى ساۋداسى مەن ناشاقورلىق ماسەلەسىن تاعى دا قوزعاپ ءوتتى.

پرەزيدەنت تاپسىرماسىنا وراي ەلىمىزدىڭ ەڭ ءىرى مەگاپوليسى - الماتىدا ناشاقورلىق جانە سينتەتيكالىق ەسىرتكىمەن كۇرەس قالاي ءجۇرىپ جاتقانىن الماتى قالاسى پوليتسيا دەپارتامەنتى ەسىرتكى قىلمىسىنا قارسى ءىس- قيمىل باسقارماسىنىڭ اعا جەدەل ۋاكىلى پوليتسيا مايورى داۋرەن كوبەيەۆ ايتىپ بەردى.

«مەملەكەت باسشىسى 2 جىل بۇرىنعى جولداۋىندا ەسىرتكى ماسەلەسىن قوزعاپ وتكەن بولاتىن. پرەزيدەنت تاپسىرماسىنا وراي 2023-جىلدىڭ 29-ماۋسىمىندا «قازاقستان رەسپۋبليكاسىندا ناشاقورلىققا جانە ەسىرتكى بيزنەسىنە قارسى كۇرەستىڭ 2023-2025-جىلدارعا ارنالعان كەشەندى جوسپارى» بەكىتىلگەن بولاتىن. بۇل الدىن الا بولجام بويىنشا سينتەتيكالىق ەسىرتكى قولدانىسىن %5-6 عا ازايتۋى قاجەت»، - دەدى پوليتسيا مايورى.

داۋرەن كوبەيەۆتىڭ ايتۋىنشا، قازىر ەسىرتكى ساۋداسىنىڭ كەزەكتى تولقىنى ءجۇرىپ جاتىر. پوليتسيا مايورى ونى توقتاتۋدىڭ جولى ەسىرتكى بيزنەسىنە قارجىلاي سوققى جاساۋ ەكەنىن ايتادى.

«قازاقستاندا ەسىرتكى ساۋداسىنىڭ العاشقى تولقىنى توقسانىنشى جىلدارى بولدى، 2000-جىلدارى گەروين ساۋداسى بەلەڭ الدى. قازىر سينتەتيكالىق ەسىرتكى تاراپ جاتىر. ءبىز ادامداردى ساقتاندىراتىن ارنايى بەينەروليكتەر جاساپ ءجۇرمىز. ءبىراق ءقازىر الەۋمەتتىك جەلىلەردە اقپارات اعىنى وتە قارقىندى. بۇگىن كورىلگەن بەينەروليك ەرتەڭ ۇمىتىلىپ كەتەدى. ءبىز وقۋ ورىندارىندا ءتۇسىندىرۋ جۇمىستارىن جۇرگىزەمىز. ءبىراق بۇل دا جەتكىلىكسىز، جاستاردىڭ ويىنان شىقپاۋى ءۇشىن بىزگە ۇلكەن قارقىن مەن الگوريتم قاجەت. ەسىرتكى بيزنەسى نەلىكتەن بىزدەن ءبىر قادام الدا جۇرەدى؟ سەبەبى وندا ميللياردتاعان اقشا اينالىمى بار. ءبىزدىڭ توننالاپ ەسىرتكىنى تاركىلەۋىمىز دە ۇلكەن ناتيجە بەرمەيدى. باتىستىڭ تاجىريبەسىنە قاراساق، ولار ەسىرتكى ساۋداسىنا قارجى جاعىنان سوققى بەرەدى. ياعني، قارجىلىق بارلاۋ قىزمەتتەرىنىڭ جۇمىسىن كۇشەيتۋ كەرەك»، - دەدى داۋرەن كوبەيەۆ.

الماتى قالاسىندا قالا اكىمدىگى مەن پوليتسيا دەپارتامەنتىنىڭ ءىس-قيمىلدارىنان بولەك ەسىرتكىگە قارسى كۇرەس جۇمىسى «Narkostop» جوباسى اياسىندا ىسكە اسادى. ايتىلعان جوبا الماتىدا العاش رەت 2021-جىلى ىسكە قوسىلدى. گراففيتيدى بوياۋدان باستالعان جوبا بۇگىندە ءوزىنىڭ باعىتتارىن كەڭەيتىپ، ەسىرتكى بيزنەسىنەن قارسى جان-جاقتى كۇرەس جۇرگىزەدى.

«Narkostop» جوباسىنىڭ باعىتتارىن ەسىرتكى جارناماسىن بوياۋ، كيبەرۆولونتەرلىك، عىلىمي زەرتتەۋ، وقۋ ورىندارىنداعى لەكسيا مەن پروفيلاكتيكالىق جۇمىس دەپ بولۋگە بولادى. ءبىرىنشى باعىت اياسىندا ەسىرتكى جارناماسى بەينەلەنگەن گراففيتيلەر بويالادى. كيبەرۆولونتەرلىك جۇمىس بارىسىندا ەسىرتكىنى ناسيحاتتايتىن ونلاين رەسۋرستار انىقتالىپ، قۇزىرەتتى ورگاندارعا حابارلانادى. ال جوبانىڭ عىلىمي زەرتتەۋ باعىتى ەسىرتكىگە قارسى كۇرەستىڭ ءتيىمدى تاسىلدەرىن تاۋىپ، قولدانىستاعى تەتىكتەردى وڭتايلاندىرۋعا مۇمكىندىك بەرەدى. قالعان ەكى باعىت بويىنشا وقۋ ورىندارىندا جاستارعا ەسىرتكىنىڭ زيانى جونىندە اقپارات بەرىلەدى جانە ءارتۇرلى مەكەمەلەردە ترەنينگ، دوڭگەلەك ۇستەل سىندى جيىندار ۇيىمداستىرىلادى»، - دەدى «Narkostop» جوباسىنىڭ كۋراتورى نۇرجان جاكۋپوۆ.

«Narkostop» جوباسىنىڭ كۋراتورى 2024-جىلدىڭ باسىنان بەرى مەگاپوليستە ەسىرتكى جارناماسى بەينەلەنگەن 50 مىڭعا جۋىق گراففيتي بويالعانىن ايتتى.

«جوبا اياسىندا جىل باسىنان بەرى وقۋ ورىندارىندا 32 ءدارىس وتكىزىلدى. ۆولونتەرلەردىڭ جانە ەسىرتكى قىلمىسىنا قارسى ءىس-قيمىل باسقارماسىنىڭ كومەگىمەن 50 مىڭعا جۋىق گراففيتي بويالىپ، ەسىرتكى جارنامالارى جويىلدى. سونداي- اق جۇمىس توبى تاراپىنان عىلىمي زەرتتەۋ جۇمىستارى جۇرگىزىلىپ جاتىر. ناشاقور ادامدار ۋاقىت وتە كەلە ءوز-وزدەرىن باسقارا المايتىن اشۋشاڭ ادامدارعا اينالادى جانە ولار ءجيى وزدەرىنىڭ جاقىندارىنا، قارت اتا-انالارىنا قول كوتەرەدى. وسىنداي جاعدايدا ەسىرتكىگە تاۋەلدى ادامدى ماجبۇرلەپ ەمدەۋگە جاتقىزۋ ءۇشىن دە ءبىز قۇقىقتىق كومەك كورسەتەمىز. بيىل 50 دەن استام ادام ءبىزدىڭ مامانداردان قۇقىقتىق كومەك الىپ ۇلگەردى. ءبىز الماتى قالاسىنىڭ پسيحيكالىق دەنساۋلىق ورتالىعى جانە الماتى قالاسى پ د ەسىرتكى قىلمىسىنا قارسى ءىس-قيمىل باسقارماسىمەن سەرىكتەس رەتىندە تىعىز جۇمىس ىستەيمىز»، - دەدى ول.

اۆتورەلميرا ورالبايەۆا