الماتىدا سايران كولىنە قونعان اققۇتان وققا ۇشتى
الماتى. KAZINFORM - سايران كولىنە قونعان اققۇتانداردىڭ بىرەۋىنە وق اتىلدى. بۇل تۋرالى زووقورعاۋشى ناتاليا سۋلجيك Facebook-تەگى پاراقشاسىندا جازدى.
«بۇل قۇس قىزىل كىتاپقا ەنگەن اققۇتان بولىپ شىقتى. قاناتىن وق تەسىپ وتكەن. كەۋدەسى جىرتىلعان. ءبىز تاكسيمەن ونى «ايبوليتكە» جەتكىزدىك. اياقتارى دا سىنعان سەكىلدى. بۇل جاعداي قالاي بولعانىن بىلمەيمىن. بايعۇس قۇس قايىرىمدى ادامداردىڭ ورتاسىنا ءتۇستى، ولار قۇستى جىلى جەرگە اكەلگەن سوڭ، ماعان حابارلاستى»، - دەپ جازدى ناتاليا سۋلجيك.
الايدا ۆەتەرينارلار مەن زووقورعاۋشىلار قۇستى امان الىپ قالا المادى.
ەسكە سالايىق، قازاقستاندىق فوتوگراف دميتري دوتسەنكو سايران كولىنە قونعان اققۇتان مەن جابايى ۇيرەكتەردىڭ سۋرەتتەرىن جاريالاعان ەدى. ول سونداي-اق بالىق تىستەپ تۇرعان اققۇتاندى سۋرەتكە تۇسىرگەن بولاتىن.
«بۇل - ءبىزدىڭ الاتاۋدىڭ ەندەميك بالىعى. سوندىقتان مەن دە وتە قۇندى سۋرەت ءتۇسىردىم. ويلاپ قاراڭىزشى، 2024-جىلى ەكى ميلليون تۇرعىنى بار مەگاپوليستىڭ قاق ورتاسىندا ەندەميك ناعىز جابايى تابيعاتتى كورە الاسىز. بۇل - عاجاپ نارسە، ونى قورعاۋ كەرەك»، - دەپ جازعان بولاتىن الماتىلىق فوتوگراف Instagram-داعى پاراقشاسىندا.
ايتا كەتەيىك، 1971-جىلدان بەرى الماتىدا العاش رەت الماتى اكىمى ەربولات دوسايەۆتىڭ تاپسىرماسىمەن سايران كولى تازارتىلدى. كولدىڭ تۇبىنەن جانە جاعاسىنان 140 مىڭ تەكشە مەتردەن استام قوقىس پەن لاي شىعارىلعانىن حابارلاعانبىز.
