الماتىدا ەۆەرەستتى باعىندىرعان الپينيستەردى سالتاناتتى تۇردە قارسى الدى
الماتى. KAZINFORM - عالامشاردىڭ ەڭ بيىك شىڭى ەۆەرەست شىڭىنا (8848 م) شىققان قازاقستاندىق الپينيستەر ماقسۇت جۇمايەۆ، انار بۋراشەۆا جانە ءالمىر قىمباتباي ۇلى ەلگە ورالدى.
ەكسپەديتسيانىڭ ماقساتى - قازاقستاننىڭ مەملەكەتتىك تۋىن الەمنىڭ ەڭ بيىك شىڭىندا كوتەرۋ.
الماتى اۋەجايىنا ەكسپەديتسيا قاتىسۋشىلارى - ەۆەرەستكە شىققان تاريحتاعى تۇڭعىش قازاق قىزى انار بۋراشەۆا مەن ونىڭ جەتەكشىسى، عالامشارداعى 14 سەگىز مىڭدىقتىڭ بارلىعىن باعىندىرعان اتى اڭىزعا اينالعان قازاق ءالپينيستى ماقسۇت جۇمايەۆتى، سونداي-اق ءالمىر قىمباتباي ۇلىن قارسى الۋعا كەلۋشىلەر كوپ بولدى.
قازاقستان رەسپۋبليكاسى قورعانىس مينيسترلىگىنىڭ ۇجىمى الپينيستەرگە كوماندانىڭ گيمالايدا بولعان ۋاقىتىندا، اسىرەسە كوتەرىلۋ كەزىندە، ەكسترەمالدى جانە كۇردەلى اۋا رايىندا كورسەتكەن باتىلدىعى مەن باتىرلىعى ءۇشىن العىس ءبىلدىردى.
«وسى ۋاقىت ىشىندە بىزگە جىلى لەبىزدەرى مەن تىلەكتەرىن جولداعان وتانداستارىمىزعا العىس ايتامىن. انار بۋراشەۆاعا ەۆەرەستكە شىعۋعا كومەكتەسۋ مەنىڭ ارمانىم ەدى. سول ماقساتقا جەتۋگە كومەكتەسكەن ادامدارعا راحمەت»، - دەدى ماقسۇت جۇمايەۆ.
ءوز كەزەگىندە انار بۋراشەۆا وسى ۋاقىت ىشىندە ونىڭ باستى موتيۆاتورى وتباسى بولعانىن اتاپ ءوتتى.
«وتباسىمنىڭ سۋرەتتەرى كۇرتەشەمنىڭ جۇرەك تۇسىنداعى قالتادا بولدى. تاۋعا شىقپاس بۇرىن ءبىز «پۋدجا» ءراسىمىن جاسادىق جانە تاۋدان كوتەرىلۋگە رۇقسات سۇراپ، امان-ەسەن ورۋلۋىمىزدى تىلەدىك. انامنىڭ دۇعاسى مەنى امان ساقتاپ قالعانىن دا بىلەمىن. ءبىزدىڭ ەكسپەديتسيامىزعا قىزىعۋشىلىق تانىتىپ، قولداۋ كورسەتكەن بارلىق وتانداستارىمىزعا راحمەت»، - دەدى انار بۋراشەۆا.
بۇعان دەيىن قازاق قىزى تۇڭعىش رەت ەۆەرەست شىڭىنا شىققانى تۋرالى جازعان بولاتىنبىز.
سونداي-اق قازاقستاندىق الپينيستەر 6186 مەتر بيىكتىكتە جاتتىعۋ جۇرگىزىپ جاتقانى تۋرالى جازعان ەدىك.
اۆتور
الما مۇقانوۆا
