الماتىدا قىتايشا سويلەيتىن گيدتەردى وقىتىپ، بىلىكتىلىگىن ارتتىرامىز - ەربولات دوسايەۆ

Алматы
فوتو: الماتى اكىمدىگى

استانا. KAZINFORM - وتكەن جىلى الماتىعا «شاڭحاي ىنتىماقتاستىق ۇيىمىنىڭ مادەني جانە تۋريستىك استاناسى» مارتەبەسى بەرىلگەن ەدى. ناتيجەسىندە ش ى ۇ ەلدەرىنەن كەلەتىن تۋريستەر سانى %27,6 ارتىپ، 323 مىڭ ادامعا جەتتى. بۇل تۋرالى قالا اكىمى ەربولات دوسايەۆ ايتىپ بەردى.

«سونداي-اق، بيىل «قىتاي حالىق رەسپۋبليكاسىنداعى قازاقستان تۋريزمى جىلى» بولىپ جاريالاندى. جىل بويى قىتايدىڭ ەڭ ماڭىزدى 3 تۋريستىك كورمەسىنە قاتىسۋ جانە شاڭحاي، گونكونگ، بەيجىڭ، قوسىمشا شيان قالالارىندا الماتى قالاسىنىڭ تۋريزم كۇندەرىن وتكىزۋ جوسپارلانىپ وتىر»، - دەدى ە. دوسايەۆ ۇكىمەتتىڭ بۇگىنگى وتىرىسىندا.

2024 -جىلدىڭ مامىر ايىندا الماتى قالاسىنىڭ اكىمدىگى تانىمال شەتەلدىك اقپاراتتىق پورتالداردا قالانىڭ تۋريستىك الەۋەتى تۋرالى ماركەتينگتىك ناۋقانداردى، بلوگەرلەر مەن تۋريستىك وپەراتورلارعا ارنالعان تۋرلاردى ىسكە قوستى. ولار وسى جىلدىڭ جەلتوقسانىنا دەيىن جالعاسادى.

«كورسەتىلەتىن قىزمەتتەردىڭ ساپاسىن ارتتىرۋ ماقساتىندا 2024 -جىلدىڭ ماۋسىمىنان تامىزىنا دەيىن قىتاي تىلىندە سويلەيتىن گيدتەردى وقىتۋ جانە ولاردىڭ بىلىكتىلىگىن ارتتىرۋ ۇيىمداستىرىلادى. جالپى جىل سوڭىنا دەيىن 15 ءىس-شارا وتكىزىلەدى. بۇل ش ى ۇ ەلدەرىنەن كەلەتىن تۋريستەر سانىن 400 مىڭ ادامعا دەيىن ۇلعايتۋعا مۇمكىندىك بەرەدى»، - دەدى مەگاپوليس اكىمى.

وسى جىلدىڭ شىلدە- تامىز ايلارىندا «گاستروفەست» گاسترونوميالىق-تۋريستىك فەستيۆالى مەن حالىقارالىق قوناق ءۇي فورۋمىن وتكىزۋ جوسپارلانىپ وتىر.

ايتا كەتەيىك، الماتىعا كەلەتىن شەتەلدىك تۋريستەر سانى %30 دەيىن ءوسىپ، 540 مىڭ ادامعا جەتتى. اسىرەسە، ءۇندىستاننان، يتاليادان، وڭتۇستىك كورەيادان، قىتاي، ۇلى بريتانيا جانە ا ق ش-تان تۋريستەردىڭ ءجيى كەلەتىنى بايقالعان.

اۆتور

ايجان سەرىكجان قىزى

سوڭعى جاڭالىقتار